تفسير سفر الرؤيا - حـ 12 ✟ الانبا رافائيل فى ها أنا أتى سريعا
بسم الاب والابن والروح القدس الاله الواحد امين .
احنا حاليا شغالين في الرؤيا بتاعة الختوم . افكركم في الختم الاول خرج فرس لونه ابيض قلنا ده رمز للسيد المسيح الغالب والمنتصر . وبعدين فرس احمر يرمز الى العصور اللي فيها سفك دماء واستشهاد . وكأن ربنا بيطمنا قبل ما يورينا الفرس ورينا ورانا الغلبة بتاعة الفرس الابيض . وبعدين فرس اسود يعبر عن ايام اللي فيها هطرتقات وبدع . وبعدين فرس باهت او اصفر او اخضر زي ما بيجي في الترجمة . وده بيرمز لبدعة كبيرة انتشرت في ربع الارض . وتنكر الوهية المسيح .
بعد كده في الختم الخامس شاف معلمنا يوحنا اللاهوتي تحت المذبح نفوس الذين ذبحوا من اجل الله . وكأن بعد ما ورانا التاريخ بتاع الكنيسة اللي فيه نصرة وفيه تعب . بيبقى كانه بيورينا ايه ثمرة التعب ده ؟ ان احنا يبقى لنا نصيب في الابدية السعيدة .
الختم السادس درسناه قبل كده اللي هو فيه زلزال كبير . واعلان غضب الله على الناس الاشرار . وغير المؤمنين اللي ما قدموش توبة ولا رجعوا لربنا . في
الاصحاح السابع دلوقتي هندرسه بيتكلم عن حماية الله لاولاده وعبيده .
قبل الختم السابع . الختم السابع هناخده بعدين . هو مجرد اول ما يتفتح الختم السابع هيبتدي رؤيا جديدة اللي هي بتاعة الابواق . و الابواق معناها صوت عالي جدا يعلن غضب الله على الشر والخطية . طبعا نتيجة الغضب هيحصل اذية للناس الاشرار . فبيسبق الاول ربنا يعلن انه هيحمي اولاده من اي اضرار هتيجي على العالم . ودي ترجع الذاكرة للضربات العشر اللي حصلت ايام موسى . كان شعب الله في حماية . و المصريين كانوا لانهم بيعرضوا الاوثان وقتها وكانوا ضد ربنا . وكانت الضربات بتيجي عليهم . وخصوصا الضربة الاخيرة بتاعة قتل الابكار . هم بني اسرائيل احتموا في دم خروف الفصح اللي دبح في ليلة خروجهم . وحطه من الدم بتاعه على القائمتين والعتبة العليا . اشارة الى الصليب بتاع المسيح . وجوة البيت بتاعهم قفلوا الابواب و ياكلوا الخروف اشارة للافخارستية .
نبص بقى في الاصحاح السابع
بيقول بعد هذا رأيت اربعة ملائكة واقفين على اربع زوايا الارض. ممسكين اربع رياح الارض لكي لا تهب ريح على الارض ولا على البحر ولا على شجرة ما .
هنا اربعة ملائكة واضح ان الملايكة دول مخلوقات روحانية احنا عارفين طبعا و و بينفذوا تعليمات ربنا واوامره وخطته بالنسبة للبشرية وكل الخليقة. وواضح من الكلام ده ان فيه ملايكة حوالينا في لمكان كل ملاك له وظيفة وله دور في خدمة البشر. زي ما قال معلمنا بولس ان هم ارواح خادمة مرسلة لخدمة العاتدين ان يرثوا الخلاص.
كلمة اربعة اربع زوايا الارض معناها الشرق والغرب والبحري والقبلى . منظر صليبي. واقفين يعني معناها مستعدين متأهبين ان هم ينفذوا تعليمات ربنا. واربع زوايا الارض معناها بقى ايه ماسكين الارض كلها من جميع جوانبها.
قال هنا بقى ممسكين اربع رياح طبعا الرياح فعلا بتيجي من جميع النواحي. تلاقي في موسم رياح جنوبية في موسم رياح شمالية رياح شرقية او هكذا. فالرياح دية طبعا ظاهرة طبيعية اه ربنا خلقها علشان دورة الحياة في الكرة ارضية يعني الرياح دي بتسبب ان انتقال حبوب اللقاح بتاعة النباتات وتغيير الاجواء وتغيير مثلا السحاب يجيب امطار في مناطق ناشفة يعني الرياح دي لها دور ربنا خلقه من اجلها. لكن طبعا لما تكون رياح شديدة جدا بتبقى عواصف ممكن تحطم البيوت والاشجار والدنيا كلها. فلما يقول ان في اربع ملايكة ماسكين الرياح معناها ان فيه سلطان لله من خلال الملايكة دول ان الرياح دي ما تضرش البشر.
عشان كده قال ما امسك اربع رياح الارض لكي لا تهب ريح على الارض ولا على البحر ولا على شجرة ما.
طبعا الارض والبحر معناها الكرة الارضية كلها بما فيها اليابس والماية. والشجر ده يعني عينة من الخلائق اللي ربنا خلقها على ارض من اجل الحياة. فكأن ربنا بيقول في وقت معين هيحصل ان الرياح دي تهجم على الارض بتدمرها. بس انا ماسكها بواسطة اربع ملائكة للمعاد المعين من الله.
الريح بقى اللي بييجي على الارض ممكن يكون ريح تعليم غلط ممكن يكون ريح خطايا بتنتشر. وانتم بتلاحظوا ان في كده موجات من الافكار بتهجم على البشر. موجة زي الالحاد مثلا موجة زي الاباحية موجة زي شزوز الجنسي. حاجات زي كده. تلاقي فيه ريح جاي بيكتسح كل الناس ده احيانا بتبقى يقول لك ترند يعني موضة كده تاخد لها يومين تلاتة كل الشباب متعلق بها . دي رياح . واحيانا تبقى مدمرة واحيانا تبقى خفيفة .
ليه ربنا بقى ماسك الرياح دية ؟ عشان هنشوف العدد التاني رأيت ملاكا اخر طالعا . من مشرق الشمس معه ختم الله الحية . معه ختم هيقول له كمان شوية انه هيختم العبيد بتوع ربنا على جباههم . طبعا الختم دوت يرمز لملكية الله للانسان . زي ما بالظبط لما يكون عندك كتاب وكتبت عليه اسمك او ختمت عليه بختمك . او مثلا في كنايس عندنا الكتب بتاعة الصلوات ممكن تتختم بختم الكنيسة فيبقى عارفين ان الكتاب ده بتاع الكنيسة . لو وجد في اي مكان انت بتشوف عليه الختم ترجعه تاني للكنيسة . فالختم علامة الملكية .
وعلامة كمان الاستعداد ان احنا نبقى ذبيحة . ان في المدابح بتاعة الحيوانات الذبيحة التور ولا العجل ولا الخروف اللي هيتدبح بيعدي الاول على الدكتور البيطري يفحصه لا يكون فيه مرض يعدي الناس لو لقاه سليم بيختمه عشان يدخل على المجذرة .
فاحنا لما نتختم معناها ملك ربنا ومستعدين نذبح من اجله في يعني الاستشهاد او موت اللحظي زي ما قال معلمنا بولس لاننا من اجلك نمات كل النهار . فهو شاف ملاك طالع من مشرق الشمس مشرق الشمس معناها النور معنا من حاجة الهية . لان الغروب يرمز للموت وللظلام وللنهاية الوحشة . لكن الشرق دايما يرمز للبدايات والرجاء والامل المتجدد في كل يوم .
ختم الله الحي كتير من الاباء قالوا الختمة هو روح القدس . لان احنا لما بنتختم في سر المعمودية بندهن بالميرون ده اسمه ختم الله الحي .
بولس الرسول في غلاطية ستة سبعتاشر يقول لاني حامل في جسدي سمات الرب يسوع . ايه سمات الرب يسوع ؟ اللي هي الالامات . اي انسان مسيحي مفروض ان هو يشيل في كيانه الداخلي نوع من التعب والالم كشركة في الام المسيح . ويقدر يقول مع بولس الرسول حامل في جسده سمات الرب يسوع . هذا هو الختم اللي احنا بنختم به . ويقول معلمنا بولس في كورنثوس التانية . صح واحد ، الذي يثبتنا معكم في المسيح وقد مسحنا هو الله الذي ختمنا ايضا . واعطى عربون الروح في قلوبنا . يبقى اذا الختم هو الروح القدس اللي احنا بنتمسح به يوم المعمودية في سر الميرون .
الملاك بقى اللي معه ختم الله الحي دوت يقول لك فنادى بصوت عظيم الى الملائكة الاربعة . الذين اعطوا ان يضروا الارض والبحر . خلي بالكم في الاول ربنا قال اربع ملايكة ماسكين الرياح عشان متهبش و هنا يجى الوقت اللي يسمح ربنا ان الرياح تضر. بس اعطوا ان يضر الارض والبحر. و ما قالش بقى يضر الاشجار. هنشوف ليه كلمة الاشجار ما تنضرش .
الملاك اللي خارج ومعه ختم الله الحي نادى بصوت عظيم بينبه الملايكة الاربعة. يقول لهم لا تضروا الارض ولا البحر ولا الاشجار حتى نختم عبيد الهنا على جباههم. يبقى هنا معناها ان احنا هنبقى في حماية. وخلي بالكم كلمة عبيد الهنا لان احنا دايما بنتمسك ان احنا ابناء
والمسيح قال لا ادعوكم عبيدا بل احباء . طب ليه هنا بيقولوا عبيد الهنا ؟ لان صحيح احنا ابناء لكن ما زلنا عبيد . ما ننساش دية . ولذلك في اليوم الاخير احسن واحد فينا هيسمع كلمة جميلة ربنا يقول له نعمن ايه العبد الصالح والامين . كنت امينا في قليل فاقيمك على الكثير ادخل الى فرح سيدك . فنحن عبيد لالهنا لان المسيح ابن الله . من اجلنا صار عبد عشان يخلينا ابناء الله . فمش معقولة نبقى الله ونسيب المسيح عبد . فاحنا نشترك مع المسيح فبنوتة للاب زي ما هو اشترك معنا في ان احنا عبيد للاب . عشان كده المسيح لما بيتكلم مع الاب يقول له ابي والهي . واحنا كمان نتكلم مع الاب نقول له ابي والهي . بس المسيح ابن الاب بالطبيعة احنا ابناء الاب بالنعمة بالتبني .
والمسيح صار انسان فصار عبد للاب بالتجسد . لكن احنا عبيد الاب ده حسب الطبيعة . فتشاركنا مع المسيح في بنوته تشارك معنا في عبوديتنا .
هنا بقى قال الملاك اللي معه الختم ختم الله الحي . قال للملايكة الاربعة اوعوا استنوا ما تطلقوش الرياح اللي هتدمر الارض والبحر . حتى نختم عبيد الهنا على جباههم .
هنا وعايز اقول ان كلمة الاشجار اللي ذكرت في العدد رقمت اتنين ترمز الى اولاد الله او عبيد الله . زي ما احنا بنقول مثلا في المزمور الاول اللي بنصلي به كل يوم في باكر . ان الانسان اللي بيلهج فيه ناموس ويب نهارا ليلا فيكون كشجرة مغروسة على مجاري المياه ثمرها في حينها وورقها لا يذبل . وكل ما يصنعه ينجح فيه . لكن الاشرار عاملين زي الورق الاصفر اللي واقع في الارض . يذريه الرياح . او زي ما الكتاب المقدس وصفهم زي عشب الحقل . العشب ينمو ويدبل بسرعة . لكن الشجرة تبقى ثابتة . عشان كده احنا اشجار مزروعين ونامين . يقول لك الصديقك كان نخلة يزهو كمثل ارز لبنان ينمو . فدي احنا اشجار مثمرة . لما نكون ثابتين في المسيح . وثابتين عند مجرى النهر اللي هو الكتاب المقدس . واسم الرب يسوع . يعني مجرى النهر زي مزمور الاول شرحه هو كلمة الله . طول ما انت قاعد جنب الكتاب المقدس تشرب منه طول النهار . تبقى ثابت ولك جدر وشبعان ورويان و متمر فلما تيجي الضربات ما تأثرش فيك . والتسبيحة بتقول مجرى النهر ده هو اسم ربنا يسوع المسيح لما نقعد نناديه طول الوقت . كتاب مقدس واسم المسيح . وطبعا مجرى النهر برضه هو الروح القدس العامل في الكنيسة من خلال الاسرار . الانسان اللي بيتناول باستمر ثابت في المسيح ده يبقى شجرة مثمرة .
عكسها بقى الاشرار اللي هو عشب الحقل . ينبت سريعا ويصبر سريعا . لدرجة كمان في مزمور سبعة وتلاتين يقول معلمنا داوود النبي قد رأيت الشرير عاتيا . عاتيا يعني جبار . وارثا مثل شجرة شارقة ناضرة . طب قال لها ده هنا الشرير بقى زي الشجرة قال بس خلي بالك . عبر فاذا هو ليس بموجود والتمسته فلم يوجد . يعني حاجة زائلة . دايما نصرة الشر بتبقى الى قليل . لكن الانسان اللي سابت في ربنا يبقى زي الجبل الذي لا يتزعزع . عشان كده لما تلاقي فيه شر بينتشر او بينتصر ما تنزعجش لانه بيبقى حاجة مؤقتة لازم تزول .
جه بقى الملاك اللي هيختم عبيد الهنا على جباههم اشمعنا الجباه ؟ الجبهة ترمز للفكر . الواحد لما يقعد يفكر بيعمل ايده كده يعني كاني باستحضر فكر . فالذاكرة كانها هنا في الجبة . فهيختم العبيد على الجباه علشان يقدس الفكر ويخصصة لله ده بتاع ربنا بس . يا ريت يا رب انت تقدس فكري بحيث زي ما بنقول في الصلاة في القداس لا نعرف اخر سواك . اسمك القدوس هو الذي دعي علينا . يبقى الانسان ذهنه ده مقدس لله .
طبعا ده بيفكرنا ان احنا لما نيجي بنتدهن بالميرون خلي بالكم . بنتدهن اول رسمة هنا في الجبهة . ده تقديس الفكر . وبعدين ينزل ابونا على المناخير تقديس الشم . وبعدين على الفم في تقديس الكلام والتذوق . وبعدين على الودن تقديس السمع . وعلى العين تقديس الرؤيا . والعين والودن تاني . دول تمن الرسومات بتوع الحواس . بعدين يرشم على الصدر وعلى البطن علامة تقديس اعماق الانسان . ما داخل احشاؤه . وبعدين اتنين على سلسلة الضهر . سلسلة الضهر اشارة الى الاستقامة والثبات في المسيح . لان الواحد بيبقى صالب طوله عن طريق سلسلة الضهر . كده اتناشر رسم في الوجه وفي مقدمة الانسان وضهره . وبعدين يرشم بقى في الايدين في المفاصل ، اتنين في الكتف وواحدة فوق وواحدة تحت واتنين في الكوع واتنين في الراس . يبقى كده اتنين اربعة ستة وزيهم هنا ستة يبقوا اتناشر . وزيهم في الرجلين برضه اتنين كده عند الحوض واتنين في الركبة واتنين في الكعب . يبقى اتناشر واتناشر واتناشر . هم دول ستة وتلاتين رسمي . دور الحواس بتتقدس دي الاعماق دي الارادة . وبعدين دي الاعمال ورجلينا عشان يقدس المسيرة . ماشيين في سكة ربنا . كل دي الختم بتاع ربنا . صرنا ملك المسيح . لازم اذكر نفسي . وكل واحد فينا يفكر نفسه ان انا دهنت صرت ملك لربنا . ما ينفعش ما ينفعش . طب حاجة بيني وبينكم . ان الواحد فكره يروح لحد غير المسيح . ان الكلام غير المسيح . الودان للعينين . عشان كده كل خطية هي انحراف عن التكريس لله اللي اخدناه بالختم المقدس يوم الميرون .
سمعت عدد المختومين مية اربعة واربعين الفا مختومين من كل سبط من بني اسرائيل . ايه الرقم ده ؟
مية اربعة واربعين هي حاصل ضرب اتناشر في اتناشر . ومضروبين في الف . الف ده يرمز الابدية . لان الكتاب قال لنا ان يوم عند الرب كالف سنة والف سنة كيوم واحد . فيبقى دوت رقم بيرمز للابدية . الاتناشر رقم له سر عجيب جدا . الواحد يقعد يتأمل في ايه ؟ رقم اتناشر ده . هتلاقي اليوم فيه اتناشر ساعة اتناشر بالليل . السنة فيها اتناشر شهر . جماعة اللي بيعدوا يقول لك الدستة اتناشر . ايه رأيك ؟ السيد المسيح اختار اتناشر من تلاميذه سماهم رسل . ابناء يعقوب كانوا اتناشر راجل وبقى اتناشر سبط . ايه الرقم ده فى سر
فاباءنا قالوا ده حصل ضرب تلاتة في اربعة. تلاتة هو الثالوث . واربعة هي اقطار الارض شرق وغرب بحري وقبلى . فمعناها الرقم اتناشر يعبر عن العبادة المنظمة. ان الارض كلها تعرف الثالوث القدوس. طب في اتناشر ليه ان العهد قديم اتناشر والعهد الجديد اتناشر. يبقى مية اربعة واربعين فالف يبقى حياة ابدية. طبعا احنا متفقين من الاول زي ما الاباء علمونا ان سفر الرؤية مليان اشارات ورموز.
فالمية اربعة واربعين الف دول مش رقم حقيقي. ده رقم رمزي. تعبير هي معناها النفوس من كل اقاصي الارض. عهد قديم وعهد جديد ارتبطت بالثالوث في الحياة الابدية. خلي بالك النفوس من كل اقطار الارض ادي اربعة. عهد قديم عهد جديد ده اتناشر في اتناشر. مرتبطين بالثالوث اللي هو رقم تلاتة. بعدين حياة ابدية اللي هو الالف. فاذا ما هواش ربنا قاعد يعد بعداد لغاية ما وصل مية اربعة واربعين الف وقال بقى ان ده ما يدخلوش. مش ممكن. لان المكان هناك يتسع للكل زي ما هنشوف دلوقتي.
وقال مختومين من كل سبت من بني اسرائيل. ايه اسباط بني ده عهد قديم. طب هل في الابدية دي برضو مذكورة في اسباط وفي اليهود لسة لهم وجود وكيان وتميز. في الحقيقة لازم نفهم ان الله لما اختار ابونا ابراهيم كجد لشعب مختار كان حاجة واحدة بس ان ياتي المسيح من نسله. ابراهيم كان له ابنين اسماعيل واسحاق ربنا اختار اسحاق. اسحاق كان عنده يعقوب وعيسى ربنا اختار يعقوب. يعقوب عنده اتناشر ولد ربنا اختار يهودا عشان يأتي المسيح من هذا النسل المقدس.
جه المسيح فاصبح دلوقتي الدور اللي كانت بتقوم به اسرائيل انتهى . فاصبح ما فيش التميز . عشان كده قيل ساعة ميلاد المسيح نور تجلى للامم ومجدا لشعبك اسرائيل . يبقى اسرائيل مجده ان هو ينور للشعوب الاخرى من خلال مجيء المسيح . طبعا هم ما فهموش كده . هم فهموا ان احنا شعب الله المختار وبقية الامم دول ما لهمش اي لازمة ولا وجود عند الله . ربنا ده بتاعنا احنا بس . كأن ربنا ما خلقش غيرهم . طبعا ده كلام مش مظبوط . هم اختيروا لمهمة ما . عندما تنتهي المهمة ينتهي التميز بتاعها . انا هشبهها زي ايه ؟ حاجة من اللي احنا عايشين فيها . تخيلوا انه جم في مثلا ارض المعارض عندنا في القاهرة . عملوا مستشفى ميداني عشان عزل الحالات بتاعة كورونا . طيب خلاص كورونا انتهت يبقى المستشفى دي ما لهاش وجود . يشيلوها بقى اساسا ده معرض . عشان كده ربنا اختار الشعب ده عشان ييجي منه المسيح . جه المسيح خلاص بقى الاختيار دوت خلص مهمته . انتهت المهمة بتاعته . حضرتك بتروح الكلية عشان تدرس . اخدت البكالوريوس خلاص وعلاقتك بالكلية ما بقاش لها وجود حاليا .
عشان كده كلمة مختومين من كل سبط من بني اسرائيل كلمة ايضا رمزية . طب ايه الرمزية اللي فيها ؟ هو ذكر هنا اسامي الاسباط . يقول لك سمعت عدد المختومين من يهودا اثنى عشر الف مختوم. كل واحد من دول له معنى الاسم نفسه له معنى . يهودا يعني الحمد . اشكرك يا رب . راؤبين يعني الرؤيا . جاد يعني الفرح او التشدد
اشير يعني السرور والغبطة نفتالي يعني مصارعات او متسعة . منس النسيان شمعون السمع لاوي الاقتران . يا الساكر الفرز او الاعتزال . هاقول لكم كل حاجة معناها ايه . زبولون الثبات . يوسف يعني الزيادة بنيامين يعني ابن اليمين .
دي معناها ايه ؟ النفوس التي يختم على جباهها علشان تكون ملكية ربنا وفي حماية ربنا من الشر لازم يكون عندهم روح الشكر . ادي كلمة يهوذا . لازم يكون رؤيا وشايفين السماء حلو قدام عينيهم . زي رؤوبين . لازم يكون عندهم فرح ومتشددين في عمل الله مش مرخاخين ده جاد . لازم يكونوا مسرورين وعندهم غبطة مش كآبة . ده اشير . لازم يكون عندهم اتساع في الصراع الروحي ضد الشيطان . ده نفتالي . لازم ننسى الشر والخطية والازية وما نقعدش شايلين من الناس ده منسى . لازم نسمع صوت ربنا . ده شمعون . لازم نقترن بالمسيح . ده لاوي . لازم نعتزل عن الشر والعالم . ونبقى بتوع ربنا ده هي الساكر . لازم نثبت في المسيح ده زابلون لازم ننمو ونزداد في النعمة ده يوسف لازم نكون عن يمين المسيح في مجيئه التاني ده بنيامين .
من الملاحظات الجميلة ان راؤوبين مفروض هو البكر . لكن هو ابتدى بيهوذا لان يهودا هو السبت اللي جه منه السيد مسيح . ودي معناها ان عندما اقترن بالمسيح يقدمني وابقى بكر في المسيح بعد ما كنتش بكر . و لم يذكر في السلسلة دي افرايم . لانه من زمان انشق عن سبط يهوذا من ايام ابن سليمان اللي هو اسمه رحبعان . وده يربعان . فان شقوا فاي انسان ينشق عن الكنيسة وعن ايمانها وعن ربنا . ما يبقالوش وجود في الابدية السعيدة . دان لم يذكر في الاسامي ديا بالرغم انه احد اسباط اسرائيل .
بعض المفسرين قالوا لان ( الانتى كريس ) هيجي من دان وكلمة دان يعني الله يدين فمعناها ان دا قضاء الله على كل انسان لا يثبت في المسيح .
طيب في كمان هو ذكر يوسف بالرغم ان يوسف ساعة ما ابوه يعقوب باركه قال له انت هتاخد نصيب سبطين خلا افرايم ومنسا كأنهم زي يوسف . عشان كده هو ذكر منسا وبدل ما يذكر ايفرايم ذكر يوسف . وجاب سبط لاوي اللي ما كانش محسوب من ضمن الاتناشر في اثناء توزيع الميراث . حطه في الابدية السعيدة وشال دان اللي هو منه من يعاكس المسيح .
وبعد كده يقول في العدد رقم تسعة بعد هذا نظرت واذا جمع كثير لم يستطع احد ان يعد يعني كان قال لنا مية اربعة واربعين الف وان ده رقم رمزي . لان برضو نظن ان الناس اللي داخلين السما عددهم محدود واللي هيجي بعد كده ما لوش نصيب قال لا لا لا الباب مفتوح . لا تخف ايها القطيع الصغير فان اباكم قد سرة ان يعطيكم الملكوت . مسرة الله يريد ان جميع الناس يخلصون . هكذا احب الله العالم . كلنا بنفرح ان انسان يتوب . كلنا نفرح ان انسان يرجع لربنا . حتى اللص اليمين . الانسان في اواخر حياته لما قدم توبة دي حاجة جميلة . الانسان اللي في بداية حياة يعيش مع ربنا حاجة اجمل . وانتم كلكم كشعب الله تفرحوا بعودة اي انسان خاطئ . عشان كده يقول نظرتوا الى جمع كثير لم يستطع احد ان يعده . من كل الامم والقبائل والشعوب والالسنة . حاجة تفرح عايزكم تسرحوا كده ايه منظر السما لما تلاقي فيها من كل الشعوب حاضرين . وكل واحد شكل غير التاني . طبعا احنا الشعوب الاسمراني والابيضاني والوش ومش عارف جنوب شرق اسيا وغيره وغيره . كل ده هيبقى مع بعضيهم في الابدية السعيدة . يربطها مع بعض الايمان الواحد . ومحبة المسيح لان هو المخلص الوحيد . دول بقى منظرهم ايه ؟ قال واقفون امام العرش وامام الخروف . واقفون معناها فرحانين ومستعدين . بيهتفوا هتاف النصرة . امام العرش اللى هو عرش الاب وامام الخروف كلمة رمزية ترمز للمسيح لانه ذبح من اجل خلاصنا .
متسربلين بثياب بيض . طبعا متسربل معناها الرجلين متغطية . وده اشارة للحشمة والوقار اللائقين بحضور الله .
وارجو لما نسمع كلمة متسربل نفهم ان احنا قدام ربنا لازم نكون في حشمة ووقار . يليق به سواء في الكنيسة او واقفين نصلي في البيت . بثياب بيض ثياب بيض علامة النقاوة وفي ايديهم سعف النخل علامة الغلبة والنصرة والفرحة زي المنظر بتاع شعب العبرانيين لما استقبلوا السيد المسيح في اورشليم يوم احد الشعانين .
وهم ماسكين السعف دوت و ثيابهم بيض فرحانين يصرخون بصوت عظيم قائلين الخلاص لالهنا الجالس على العرش وللخروف .
يصرخون هنا معناها الهتاف الجميل . احيانا تحسه كده في القداس او في التسبحة . الكنيسة بتترج من صراخ الشعب الفرحان . طوبى للشعب العارفين الهتاف بنور وجهك يا رب يسلكون . واحنا عايزين دايما نصرخ مش لازم الحنجرة هي اللي تصرخ . ويبقى الصوت مزعج . لكن القلب من الداخل بيصرخ حتى ولو في صمت . عارفين المنظر بتاع حنا ام صموئيل وهي واقفة في الهيكل بتصرخ من قلبها لكن شفايفها بتتحرك ما حدش سامع صوتها . لدرجة عال الكاهن ظنها سكرا وقال لها انت سكرانة ليه ؟ قالت له انا مش سكرانة ده انا نفسي مرة انا بصرخ لربنا . ففي انسان قلبه بيصرخ حتى لو لم يتكلم .
يصرخون بصوت عظيم قائلين . شف بقى التسبيحة الجميلة دي . الخلاص لالهنا . الخلاص لالهنا معناها انت وحدك المخلص . اي خلاص نلناه منسوب لك . ليس باجتهادنا ولا بمعلوماتنا ولا دراستنا لكن هي نعمة انت منحتها لنا .
الخلاص لالهنا جالس على العرش ده الاب وللخروف اللي هو الابن وقلنا كلمة الخروف كلمة رمزية نظرا لان المسيح ذبح من أجلنا
وجميع الملائكة كانوا واقفين حول العرش والشيوخ والحيوانات الاربعة . منظر بقى الواحد عمال يقول يا رب امتى نشوف المناظر الجميلة دي ؟ يبقى الملايكة واقفين حول العرش والناس كلها موجودة بتهتف بتسابيح . يعني تخيلوا الجمال والاصوات الملائكية واصوات البشر اللي بيسبحوا . الشيوخ هم الاربعة وعشرين شيخ او اربعة وعشرين قسيس . والحيوانات الاربعة اتكلمنا عنها قبل كده .
وخروا امام العرش على وجوههم وسجدوا لله قائلين امين . طبعا السجود علامة الحب والفرح والخضوع وعلامة الامتنان يا رب احنا ممنونين لك ان انت خلقتنا وعاطيتنا هذه النعمة ان احنا نتمتع بصلاحك وجمالك وبهائك ومجدك .
قالوا له ايه بقى ؟ الكلم دي اللي اخدت منها الكنيسة تسبيحة البصخة . قالوا له البركة والمجد والحكمة والشكر والكرامة والقدرة والقوة لالهنا الى ابد الابدين امين . تخيلوا بقى التسبحة دي لما يقعدوا يكرروا فيها طول الوقت زي ما بنقول لك القوة والمجد والبركة والعزة . البركة كلمة البركة معناها الكلمة الجيدة فلوغوس . ايه فلوغوس باليوناني . كلمة جيدة . احنا بنقول كلام حلو عن ربنا . المجد الحكمة بتاعة ربنا . بنقول له لك الحكمة لك البركة لك المجد . والشكر الشكر معناها ان احنا ممنونين لنعمتك وبنقبلها . والكرامة والقدرة والقوة لالهنا .
واجاب واحد من الشيوخ قائلا له . واحد بقى من الاربعة وعشرين قسيس . سأل يوحنا . سؤال مش معناها بيستفسر منه لكن ايه بينكشه علشان يدي له معلومة . زي لما يجي مدرس يسأل طالب مش عشان يعرف منه عشان ينكشه . بيقول له هؤلاء المتسربلون بثياب البيض من هم ؟ ومن اين اتوا ؟ فرد يوحنا قال له يا انت تعلم ما اعرفش . فقال لي هؤلاء هم الذين اتوا من الضيقة العظيمة . الضيقة العظيمة هي الارض بكل ما فيها من مشاكل ومتاعب وجهاد . من يوم ما نتولد لغاية ما ننتقل . الحياة مليانة جهاد . سماها الضيق عظيمة . طبعا الضيقة العظيمة مقصود بها كمان اخر الايام هيبقى فيه ضيقة . بس هل دول كانوا موجودين في اخر الايام ؟ طب ايام الرسل . ايام الانبياء . الضيقة العظيمة معناها كل البشر اللي اتضايقوا وتعبوا وربنا جاي بقى يريحهم .
وقد غسلوا ثيابهم . وبيض ثيابهم في دم الخروف . طبعا هنا دم المسيح يطهر من كل خطية . زي ما قال معلمنا يوحنا في رسالته ان اعترفنا بخطايانا فهو امين وعادل حتى يغفر لنا خطايانا ويطهرنا من كل اثم . دم ابنه يطهرنا . من كل خطية . غسلوا ثيابهم . ثيابهم ترمز للجسد . لان انا لابس الجسد . غسلوا وبيضوا . غسلوا دي ترمز للتنقية . اللي بتحصل كل يوم بسبب التوبة والعلاقة مع الله . والبياض دوت علامة التبرير والمجد اللي هناخده في الابدية . تطلع في السماء كده انت طول الوقت دلوقتي عمال بتغسل ربنا بيغسلك . انت بتغسل ثيابك في دم الحمل بتغسل جسدك ومشاعرك وحياتك كلها في الام المسيح وضيقته وموته من اجلك . نتيجتها هتبقى ثيابك بيضاء . في الابدية السعيدة تتمجد مع الله . عشان هم غسلوا ثيابهم وبيضوا ثيابهم في دم الخروف . قال من اجل ذلك هم امام عرش الله . يبقى اخدوهم يا بختنا لو كان لنا نصيب معهم ربنا يدينا . هم امام عرش الله . ويخدمونه نهارا وليلا في هيكله .
طبعا في الابدية ما فيش ليل . لكن كلمة نهار وليل معناها باستمرار باستمرار . وطبعا ما فيش نوم هناك لان ما فيش عندنا الجسد الكثيف ده اللي بيحتاج يستريح . هيبقى الجسد بتاعنا ده هياخد الطبيعة النورانية .
والجالس على العرش يحل فوقهم يعني مظللهم كده بجناحيه . طبعا الله يملأ الوجود لكن هنا ده تعبير سفر رمزي . الجالس على عرش الاب السماوي يحل فوقهم يعني يظللهم . يفكرنا بسفر التكوين لما قال لك روح الله يرف على وجه المياه . يرف معناها يحتضن .
لن يجوعوا بعد . طبعا . ولن يعطشوا بعد . طبعا الجوع والعطش مش بس للاكل والماية . الجوع لكلمة الله الجوع الامان الجوع للفرح . الحاجات دي ما بقتش في جوع . عندنا الامان وعندنا الفرح وعندنا الشبع وعندنا
ولا تقع عليهم الشمس ولا شيء من الحر . طبعا فاكرين في الترنيمة وشايف التجارب قد لوحات . ما فيش تجارب ما فيش ضيقات . لان الخروف الذي في وسط العرش يرعاهم . تخيل بقى المسيح لما يكون الراعي الصالح بتاعنا دلوقت واحنا بالايمان بنشعر برعايته مش حال بقى لما نكون معه شايفينه كما هو في الابدية السعيدة .
الخروف الذي في وسط العرش يرعاهم ويقتادهم الى ينابيع ماء حية . طبعا الماء الحي هو الروح اللي بيشبعنا ويروينا ونقعد طول الابدية فرحانين ان احنا راويانين بنعمة ربنا .
ويمسح الله كل دمعة من عيونهم . طبعا مش معناها عمالين نعيط ربنا ماسك لنا منديل . لكن معناها يمسح من ذاكرة الانسان كل خبرة حزن . شف النهاردة الواحد لو قعد كده يتأمل ويقعد يبكي على حاجات قديمة ضاعت وحاجات فقدها وناس حبايبه وماتوا ومش عارف ايه . كل ما هو في الذاكرة من اشياء مؤلمة ومحزنة تتمسح تماما . زي ما يكون واحد نايم فى كابوس مزعج وبعدين صحي من النوم مش فاكر ولا حاجة .
فاحنا كمان في الابدية السعيدة الله سيمسح من اذهاننا كل خبرة حزن . الخطايا اللي عملناها اللحظات بتاعة الضعف كل ده يتمسح . و اللحظات اللي كان فيها فشل او اخفاق او ضيقة او احساس بالاحباط كل ده يتمسح . يمسح الله كل دمعة من عيونهم . عشان كده بنقول في اوشية الراقدين الموضع الذي هرب منه الحزن والكآبة والتنهد في نور قديسك .
هنا سفر الرؤيا فتح لنا شباك شفنا منه اللي ربنا بيعلن هيحمي اولاده وحبايبه بالختمة اللي هيختمها على جبههم . لان بعد كده في اصحاح التامن هيبتدي الابواق اللي فيها اشياء مرعبة للاشرار مش لنا . احنا طول ما احنا ماسكين في ربنا ما فيش رعب وقلت لكم قبل كده المثل ده لو ان فيه لواء في البوليس راجل جبار يعني حاسم جدا والدنيا كلها ترتعد منه . ممكن وهو نازل على رأسه قوة عشان يقبض على تجار المخدرات ولا على ناس بيعملوا مشاكل . يبقى مرعب . لكن ابنه وهو بيودعه من البيت ياخده بالحضن ويبوسه يبقى فرحان وفخور ان ابوه راجل مقاتل جبار هيقدر يغلب الاشرار .
فاحنا في حضن المسيح حضن الاب السماوي . لا نخشى شيء . الرعب بتاع ربنا هيبقى فيه الاشرار لكن احنا نتمتع بابوته وحنيته .
ladlamp
يسعدنا ان نقدم لكم كل ما يخص المحتوى القبطى باستمرار – كما نتمنى منكم دعمنا و تشجيعكم لنا من خلال مشاركتكم و تعليقاتكم على محتوى موقعنا – حتى نستطيع تقديم المزيد بشكل مستمر
فتابعونا دائما على [ ladlamp.com ]