سفر حزقيال ( عهد قديم ) تفسير أبونا داود لمعى
بسم الأب والابن والروح القدس الاله الواحد امين
نكمل تأملاتنا في سفر حزقيال ونبدأ باصحاح اربعين.
مراجعة سريعة لم سبق :
عاوز افكركم الاول حزقيال ماشي معنا ازاي؟ حزقيال يأتي في الترتيب بعد ارميا. ارميا عاصر السبى في اخر حياته فضل يحذر الناس من السبى واتى عليه السبي. السبي ده خد كذا جولة سبي بابل. حزقيال طلع من أحد جولات مسبي. فحزقيال كان شاب وارميا عجوز. وهكذا دانيال.
لكن حزقيال كان من عيلة كهنوتية وتعطل كهنوته بالسبى، فهو الكاهن المحروم من العبادة التقليدية واللي قلبه واجعه على شعبه لكن ربنا بيعزية ، عشان كده هو من اقرب الشخصيات ليوحنا الرائي. لان يوحنا ايضا كان منفى في بطموس. فربنا اداله سفر الرؤيا. عشان يعزيه ويعزي العالم كله بالتدخلات الالهية.
حزقيال هو اكتر واحد في العهد القديم عايش في رؤى ومن هنا يكمن السر صعوبة السفر شوية. فيبدأ في حزقيال الواحد مثلا بالعرش الالهي والاربعة كائنات غير المتجسدين. واسرار مجد الله في السما. أصحاح اتنين وتلاتة يورينا انه المسيح بيقابله شخصيا. وبيدي له الدرج او كلمة ربنا يشبع بها عشان يروح يكلم الشعب العنيد. وخطاب حزقيال دايما مع المسبيين. فعمال يديهم رسايل وامثلة عشان يتوبوا. لانه السبي كان غرضه مش ابادة الشعب اليهودي تأديب الشعب من اجل التوبة. زي كل الاحداث اللي بتحصل عبر التاريخ ربنا بيأدب ولاده لكن الى الموت او الهلاك لا يسلمهم.
فضلت الامثلة والتأديبات دي والتنبيهات والتوجيهات انما الشعب مش سامع حزقيال كعادة الانبياء. كانوا يتكلموا اغلب ناس ترفض كلامهم. كل ما حزقيال يتشد قوي ويصعب عليه من قسوة قلب الناس ربنا يديله رؤية جديدة. ويفرحه بالسماء تاني. فلقينا في حزقيال عشرة بياخدوا تاني للعرش الالهي يفرجوا بقى على الكاروبيم والتسبيحات الالهية.
حزقيال كمان ربنا بيحركه من بلاد الكلدانيين لغاية اورشليم زي السواح. يروح يشوف الدنيا ماشية ازاي ويرجع تاني. ومن هنا تلاقوا في اخبار احيانا ينقلها عن اورشليم بروح النبوة. كمان حزقيال من مشاكله انه كان مصطدم مع شيوخ اسرائيل كلهم بيزوغوا الناس عن الحقيقة بيضيعوا الناس مش بيشجعوهم على التوبة دايما بيدوهم رسائل كاذبة ورجاء كاذب ويحسسوهم ان انتو كويسين ، حزقيال هو اللي حكى حكاية شعب الله القديم وقصته مع ربنا انها زي الزوجة الخائنة ازاي ربنا اختار اسرائيل دي كانت طفلة لقيطة ما حدش يبص لها وعمل منها عروسة حلوة وارتبط بها كملكة وبعدين راحت عبدت الاوثان مرة ثاني وما زال ربنا بيحاول معها للتوبة مرة ثانية.
حزقيال مليان تهديدات ووعيد للي ايه مش هيتوب. ففكر الدينونة والعقاب الابدي واضح جدا في سفر حزقيال. حتى على الشيطان يذكر مثلا في اصحاح تمانية وعشرين هلاك الشيطان الابدي. واللي ضيع ناس كتير لكن الناس بتضيع بارادتها مش يعني غصب عنها. كمان لقينا اصحاح خاص بالرعاة. تأديب خاص على رعاة اسرائيل بسبب ان هم اهانوا الشعب واساءوا جدا في التعليم. وكانوا سبب من اسباب انهيار الروحانية في الشعب. وربنا بيوعد انه ييجي كراعي صالح بنفسه.
تيجي نبوءات كتيرة عن مجيء المسيح بحزقيال. وعن عمل الروح القدس وعن كنيسة العهد الجديد. وعن اسرار الاتحاد بالله في العهد الجديد. كل ده معلن في سفر حزقيال زي اشعيا وزي ارميا في مجموعة اصحاحات نبوءات عن هلاك الامم الاشرار رافضي الحق ورافضي الايمان.
أصحاح 40 :
من اول بقى صحاح اربعين لغاية الاخر لغاية تمانية واربعين وهو الجزء الاخير من حزقيال. الجزء ده بقى ايه بياخدوا كده في رؤية جميلة قوي يتفرجوا على هيكل اخر. غير الهيكل التقليدي اللي هو عارفه. الهيكل التقليدي خلاص اتخرب واتهجر وبقى شكله مأساوي. فهنا كأنه بيفرجه على السما. عشان كده الجزء ده يقابله الاصحاحات الاخيرة من سفر رؤيا. ودقة وصف الهيكل السماوي ده تدينا يعني فكرة قد ايه ربنا مدقق جدا في نقاوة بيته وفي قداسة كل اللي يدخل بيته. والحقيقة الاصحاحات دي من اكثر الاصحاحات الصعبة في الكتاب.
اولا لان التخيل كان صعب ويمكن المهندسين اللي هيسمعوا الشرح يعني هم اشطر مننا في وضع تخيل جمال المدينة دي اللي سماها الهيكل لكن هي مدينة هي مش هيكل عادي. وفي نفس الوقت ده له معاني روحية كتيرة تنطبق علينا لان هيكلنا مش الكنائس بس بالمباني اللي قصاد عنينا العالم الجواني القلب ده هيكل لله وفي الاخر المدينة المقدسة اللي احنا رايحينها ملكوت السماوات.
اذا الاصحاحات دي بتشاور على الحياة الابدية باتجاهات مختلفة.
تعالوا نقرا كده اصحاح اربعين :
في السنة الخامسة والعشرين من سبينا ، سبي حزقيال بقى له خمسة وعشرين سنة دلوقتي. في رأس السنة في العاشر من الشهر في السنة الرابعة عشرة. طب هي اربعتاشر وخمسة وعشرين؟ ، احنا اتفقنا السبى طلع في افواج. ففي فاصل بين فوج وفوج.
ففي فاصل بين فوق وفوج كذا سنة. هو من ناحية حزقيال بقى له خمسة وعشرين سنة دلوقتي في السبى. لكن من سبي النهائي بقى له اربعتاشر سنة يعني اخر فوج من اسرائيل.
بعدما ضربت المدينة خلاص بقى المدينة الاورشاليم دي اتضربت وخربت. في نفس ذلك اليوم كانت على يد الرب. يعني في اليوم اللي اتضربت اورشليم تماما. يد ربنا كانت على حزقيال عشان تقول له حبيبي ما تبكيش على البلد. اورشليم دي والهيكل بالمعنى ده ما يوجعش قلبك. هفرجك بقى على المدينة السماوية. افرجك انا بحضر ايه.
ودي رسالة جميلة ما تبكوش على امور في الحياة. حاول تغلب على وجعك وتجاربك وما تبصش على عمرك اللي بيعدي ولا جسمك اللي بينحل ولا فلوسك اللي راحت.
بص لما بعد هذه الحياة ، لو انت ماسك فى ربنا و أمين مع ربنا كل ده مايفرقش .
دايما يجلنا سؤال ، هو موسى كان زعلان انه مدخلش كنعان ؟
انا شخصيا لا اظن لان موسى كان يطلع الجبل وفرحان بربنا ، كنعان ايه بالنسبة له؟ ولا حاجة. هو كانت مأمورية عاوز يوصل اولاده لكنعان.
لكن اللي شاف السما واللي حب ربنا واللي اتعزب بوجود ربنا. واللي تمتع بصداقة الله. فكنعان الارضية دي لا تمتل شيء. ففي ناس بيصعب عليها يعني موسى بعد كل التعب ده ميدخلش كنعان ده كده امور ارضية. لكن لا تعني لموسى شيء. حتى ربنا فرجه كده وطلعه على جبل وقال له شايف بعد متعدي الاردن كده هي دي كنعان. ايه رأيك؟ ، لكن طبعا موسى يقول له انا عاوز السما انت توعدني ان انا ابقى معك للابد. ان الجبل اطلع وما انزلش مننه وفعلا اخر مرة طلع وما نزلش وكان لوحده. واخفاه المسيح بايديه كده كجسد لكن طبعا موسى يزل صديق الله الى الابد.
اذا الانسان الروحاني لا يعنيه انه الامور الارضية تروح من ايديه. لكن مركز قوي على السما. فهنا بيقول بعدما ضربت المدينة في نفس ذلك اليوم كانت علي يد الرب.
احيانا في وقت الضربات في عز الضربة في عز الوجع تحس ان ايد ربنا محطوطة على راسك. بتسبتك وبتسندك وبتعزيك وبتقول لك ما تخافش. الضربات دي مفيدة ده الحاجات دي بتشيل منك شوية الامور الارضية عشان تعلى بك.
واتى بي الى هناك. هناك فين بقى؟ في رؤى الله اتى بي الى ارض اسرائيل. ووضعني على جبل عال جدا. يبقى ما خدوش على الهيكل ما الهيكل أضرب. خده على جبل عالي جدا في ارض اسرائيل. و احنا في الكلدانيين - فزي ايه، فسحة كده سياحة. لكن فكرة الجبل العالي جدا. ده معناه انه التسامي الروحي والعلو والارتفاع المعروض علينا في العهد الجديد بسوكنا الروح القدس فينا بالحب الالهي بعد التجسد وبعد اسرار الكنيسة وبعد عشرة الملايكة والقديسين وبعد دور الكرازة للكنيسة جبل عالي جدا.
الامجاد السماوية اللي تنتظر ولاد ربنا لا تقاس زي تعبير القديس بولس لا تقاس بالمجد العتيد ان يستعلن فينا.
كبناء مدينة من جهة الجنوب والجنوب دايما كلمة مريحة لان الشمال هي مصدر السبي. ما هم في الشمال في الكلدانين فالهيكل في الجنوب يعني بعيد خالص عن السبى كأن في حرية بقى. لان الانسان الروحاني يشعر بحرية لا جسده شاغله ولا كرامته شاغلاه ولا هموم الدنيا شاغلاه ولا فيه شكوك ولا فيه مخاوف. زي ما القديس اوغسطينوس قال جلست فوق قمة العالم. حين اصبحت لا اشتهي شيئا ولا اخاف شيئا.
ولما اتى بي الى هناك اذا برجل منظره كمنظر النحاس وبيده خيط كتان وقصبة القياس وهو واقف بالباب. كتير من المفسرين قالوا ده المسيح ظهر له مرة تاني البعض قال يمكن ملاك لكن اغلب الظن ربنا يسوع. وان النحاس المثقول بالنار ده اللي هو بيلمع قوي ده اشارة الى نقاوة ربنا يسوع وكماله.
بيده خيط كتان الخيط ده المطمار اللي هم ايه? بيمسحوا به الارض او يعني بيعلموا به حدود الارض. لانها تعتبر مدينة مش مكان بس. ومعها قصبة القياس. واقف بالباب برضو اشارة ان ما حدش بيدخل من الباب ده غير بالمسيح هو الباب. هو الطريق هو الحياة. فواقف في الباب لان اللي هيعدي هيعدي منه.
فقال للرجل يا ابن ادم انظر بعنيك. واسمع بودانك. واجعل قلبك كل ما اريكهم الجملة دي مهمة انظر بعنيك بص كويس بص كويس على ايقونات القديسين بص كويس على الطبيعة الجميلة بص كويس على كل اية بص كويس يمكن عينك تتفتح وتشوف السما وافتح ودانك كويس اسمع بودانك ليه؟ ، الكلام اللي بيتقال ده هو كلام الحياة الابدية. هو طريق السما هو الحقيقة اللي غصب عن العالم كله هتبان انها هي الصح. وبعدين حط قلبك على الموضوع ده. ركز بقى. ركز ما يشغلكش الامور الدنيوية ما تشغلكش مشاكل الحياة. ما يشغلكش جسدك. ما يشغلكش كلام الناس واخبارهم. لأ اجعل قلبك على كل ما اريك.
لانه لاجل ارائتك اوتي بك الى هنا. يعني انا جايبك هنا تتفرج على المدينة المقدسة دي. عشان افرحك يا حزقيال عشان تقول للناس انه لسه فى خلاص جاي في العهد الجديد والحياة الابدية تستاهل كل التعب وان ربنا بيحضر لنا حاجة لا تخطر لنا على بال. اخبر بيت اسرائيل بكل ما ترى. واذا بسور خارج البيت. اول حاجة شافها سور المدينة. هنسميها مرة المدينة ومرة الهيكل لان هي عبارة مدينة بس كنها كلها هيكل. بس هيكل مش مبنى واحد مجموعة مباني بقى. غير هيكل سليمان وغير طبعا خيمة الاجتماع. حاجة اضخم واجمل واروع وافضل من كل حاجة شافوها اليهود قبل كده. سور كبير قوي برة البيت كده. بيد الرجل قصبة القياس ست ازرع طولا بالزراع وشبر فقاس عرض البناء قصبه. يعني السور نفسه العرض بتاعه سميك قصبة كاملة ده ايه يعني سمك السور. وداير داير كده ايه ، كانه مربع ضخم جدا السور ماشي حواليه كله. فكرنا في زكريا لما برضو شاف رؤيا وقال له انا ربنا بيكلم زكريا يقول له انا سور نار من حوالين اورشليم. انا السور بتاع وفي اشعيا يقول على اسوارك يا اورشليم اقمت حراسا لا ينامون الليل ولا النهار. يصرخون طول الوقت .
فالسور ده دايما اشارة زي سور الاديرة زمان كان حاجة مهمة السور اوي ليه، عشان ما يتدخلوش حاجة تبربر بقى وحد غريب كده يدخل فالسور دايما احساس الامان فالمسيح نفسه سور خلاص ، المسيح نفسه هو المحيط بنا يدينا الامان وده سور نار. يعني مين يقدر يمسنا ان ما كنش المسيح لو المجد يسمح.
ثم جاء الى الباب الذي وجهه نحو الشرق. هنا تستغربوا بقى. البيت الضخم ده او المدينة الضخمة دي لها تلات ابواب. اشارة للثالوث القدس ، باب شرقي ده الباب الاساسي. وباب جنوبي وباب شمالي لانه في الاخر الهيكل نفسه في الغرب. وان كان ده احنا حسب تعليمنا في العهد الجديد بقينا نبص للشرق عكسنا الموضوع لان العهد القديم ما ادناش شمس البر متجسد ما ادناش الحياة الابدي. احنا بنبص على المسيح للشرق كاننا عاوزين الحياة الابدية.
فالباب الشرقى الضخم ده. وكلمة باب يمكن لما تتخيلوا تتخيلوها كده باب. لا لا ده باب ده عبارة عن مبنى بس يعامل معاملة الباب. يمكن بقى هنا عاوزة الخيال الهندسي شوية. ليه؟ بوابة المدن الضخمة هي مش مجرد قوس مثلا ولا خشبتين كده والناس تعدي، لا ده البوابة تبقى مبنى ضخم بس عبارة عن طرقة كبيرة قوي لانك بتعدي من برة لغاية جوة المدينة. والمبنى ده فيه اوض يمين واوض شمال وكل ده محسوب جوة الباب.
فكلمة باب كلمة ضخمة ما هياش صغيرة. ده كل احنا لسه على السور والباب.
فبيقول ثم جاء الى الباب الذي يواجهه نحو الشرق وصعد في درجه في كم سلمة كده زي الكنايس القديمة دايما لها سلالم عشان نقول مزامير المصاعد ونحس ان احنا بنطلع فوق ونسيب الدنيا. وقاسى عتبة الباب قصبة واحدة عرضا. والعتبة الاخرى قصبة واحدة عرضا. والغرفة قصبة واحدة طولا وقصبة واحدة عرضا وبين الغرفات خمس اذرع. لا ده جوة باب فيه غرف. متخيلين حاولوا تتخيلوا! هي ضخمة بس هنا صف تلت غرف كده وتلات غرف كده وبينهم الطرقة دي واسعة فالممر اللي انت هتعدي منه من برة لجوة كله ده تشبيه للسما فيه غرف حراسة يمين وشمال على الباب وتلاحظوا ما فيش حيطان كتير هي كلها قوة يعني الغرف دي كلها كاشفة المنظر لانها بتحرس بوابة المدينة.
وعتبة الباب بجانب رواق الباب من داخل قصبة واحدة وقصر واقي الباب زي الطرقة يعني كده من داخل قصبة واحدة وقصر واقي ثمانية اذرع وعضائد زراعين ورواق الباب من داخل.
" معلش لو عجزت عن الوصف لاني مش مهندس ومش تخيل مع اني جبت صور وحاجات". انما خلينا في المعاني الروحية. لكن هي بشهادة يعني علماء التصميمات يعني دي تحفة حاجة كده في الوصف فنية عالية اوي.
غرفات الباب نحو الشرق تلاتة من هنا وتلاتة من هنا. يبقى برضو رقم تلاتة بيتكرر كتير اشارة دايما للثالوث الأقدس . حياتنا كلها مع رشم الصليب ومع اسم الاب والابن والروح القد والغرف يمين وشمال زي احاطة على كل اللي داخلين من الممر. تخيلوا وانتم رايحين السما تعدوا بقى ضف ملايكة يمين وصف ملايكة شمال وايه باسم الثالوث الاقدس نعبر من الموت للحياة من العالم الاول للعالم الثاني الذي لا ينتهي.
غرفات الباب تلاتة من هنا وتلاتة من هناك وللتلات قياس واحد وغرف قد بعض بالظبط وللعضاء قياسا واحد من هنا ومن هناك ، قاس عرض مدخل الباب عشر ازرع. المدخل نفسه عريض اوي يعني بتدخل بوسع كده. يعني ايه؟ ، ما هياش دخلة ضيقة لا خلاص بقى ما هو اللي كملوا جهادهم داخلين زي ما قالها القديس بطرس يكون لكم بسعة دخول الى ملكوت المسيح الابدى.
يعني تبقى الباب ضيق في طبيعته. لكن اللي كمل جهاده وعدى من الباب الضيق داخل على باب السما باحتفال كبير قوي دخل بسعة يعني في ترحيب شديد في حضن واسع قوي للسما.
والحافة امام الغرفات زراع واحد اه بصوا في حاجة اسمها الحافة زي الدرابزين كده من برة دايما. فدايما اه تلاقوا المباني القديمة دي كان لها حافة كده. زي حتة تطلع تحت البلكونة كده لبرة يعني.
من هنا والحافة زراع واحد من هناك والغرفة ستة طبعا الرقم ده بيتكرر كتير قوي. اشارة للوحدانية واشارة ايضا للوحدة. يعني كل اللي داخلين شبه المسيح مرتبطين بالواحد ربنا يسوع. كل القديسين نسخ مش صغيرة من رب المجد يسوع. ايقونات للمسيح واخدين من جماله ومن طيبته ومن وداعته من قداسته من ملئه نحن جميعا اخذنا. كنيسة واحدة وحيدة لانها مرتبطة بالاله الواحد.
الغرفة ستة ازرع من هنا وست من هناك وقاسى الباب من سقف الغرفة الواحد الى سقف عرض خمسة وعشرين زراعة والباب مقابل الباب. يعني ايه؟ داخل من البوابة وبعدين ماشي في طرقة واسعة قوي وتطلع من البوابة التانية على بقى المدينة من جوة. على حاجة اسمها الساحة الخارجية وبعدين لسه دار الداخلية وجوة لسه في الهيكل شغلة كبيرة قوي ده احنا لسه على البرر ده. احنا برة عند السور وعند البوابات والبوابات بنقول لوحدها حكاية.
وعمل عضائد بستين زراع الى عضائد الدار حول الباب. العضائد دي اللي هي بتسبب طبعا كل المباني زي الخراسانات يعني. وقدام باب المدخل الى قدام رواق الباب الداخلي خمسون زراعة.
وللغرفات قوة مشبكة. يعني اه شبابيك ضخمة كده متشبكة في بعض لكن ما فيش حيطان مقفلة لان فيه نور شديد قوي داخل. اشارة للاستنارة واشارة للحراسة والوعي. وللعضائد من داخل الباب حواليه وهكذا في القبب ايضا كوى حواليها من داخل وعلى العضادة النخل. فلاحظوا في نقش مستمر هيقابلنا النخل و الاصحاح اللى جاي النقش كمان هيغلب عليك كاروبه وهتلاقي ايه كأنه كروب نخلة و نخلة وكروب. النخلة بتفكرنا بالارض والكروب بيفكرنا بالسما. والنخلة اصلها فيها معاني كتيرة اوي. لانه فيه في المزمور يقول الصديق كالنخلة يزهو يعني يطلع لفوق كده اوي نخلة عادة من اطول الاشجار والشجر الباقي صغير.
فالصديق او القديس او اللي يتشبه بربنا تلاقيه كده ايه متسامي. طويل. روحيا يعني بعيد عن الارض. كمان النخلة تاخد في نموها سنين. في اشجار اسرع من النخل كتير. انما تفضل سنين تطلع ثمر .
وهكذا الحياة الروحية بطيئة لكن في الاخر مثمرة ومتجددة. النخلة العيال يرموها بزلطة تنزل لهم الفاكهة. معناه ان الثمار جاية نتيجة حب. ان النخيل ده تعرض لجو صعب وظروف قاسية. انما في الاخر بيقدم حب ما بيقدمش حاجة وحشة ابدا. عظمة النخلة نفسها قوية. يتاخد منها خشب. احيانا ليه؟ لانه دي اشارة انه في صلابة في الايمان. فلنخل عموما مش بس منظر جمالي. هي مليان معاني. فنية روحية تدل على الانسان اللي اتحد بربنا واصبح مغروس في بيت ربنا زي النخلة كده.
ثم اتى بي الى الدار الخارج احنا عدينا من السور والبوابة الشرقية دي والبوابة دي مشينا فيها شويتين كده ولقينا الاوض كده واوض كده وكلها منورة والقوة عاملة زي السما كلها مقببة كده قبب يعني وبعدين وصلنا بقى ايه عدينا الباب ودخلنا الحاجة اسمها الدار الخارجية. الدار الخارجية تفكركم اللي مذاكر خيمة الاجتماع. او الهيكل. كان فيه ساحة كده يقفوا فيها الناس وتاخد جمهور من البشر. وفي الساحة دي في النص كان مذبح المحرقة اللي يتحط عليه المحرقة. وكان على الجنب المرحضة اللي الكهنة يغتسلوا فيها عشان يقربوا الذبائح بعد كده. ودي الساحة الخارجية اللي اليهود من حقهم يدخلوها لكن غير اليهود ما يعدوش من الباب برة. طبعا المعاني دي بقى مطبقة بس مضخمة جدا في الهيكل اللي وصفه حرفيال لانه اشارة للسما.
{ اتى بى للدار الخارجية واذا بمخادع ومجزع مصنوع للدار حواليها }. الدار الخارجية زي مباني في الحوش الخارجي الساحة دي بس المباني دي السكن للكهنة وسكن المرنمين وكده. على المجزع ثلاثون مخدعا المبنى فيه تلاتين اوضة دي السكن القديسين. ده كل ده حصة ما قربناش للدار الداخلية. لكن كل ده زي دير ضخم كده في كذا مبنى والمباني لسكان الرهبان والقديسين.
{ والمجزع بجانب الابواب مقابل طول الابواب المجزع الاسفل. وقاسى العرض من قدام الباب الاسفل لقدام الدار الداخلية من خارج ميت زراعا للشرق وللشمال. والباب المتجه نحو الشمال الذي للدار الخارجية قاس طوله عرضه} . غرفاته تلاتة من هنا وتلاتة من هناك { وعضائد ومقببه كانت على قياس الباب الاول طولها خمسين زراع وعرضها خمسة وعشرين زراع } دي مباني كبيرة. وفيها غرف كتيرة قلنا تلاتين غرفة بس الغرف كلها متشابهة متكررة. لان القداسة عملة واحدة حتى لو التقوى تختلف من انسان لانسان بس مبادئها واحدة. الحب التوبة الخير الايمان المستقيم هي حاجة واحدة. لكن طبعا نجم يمتاز عن نجم في المجد.
وكواها يعني شبابيكها ومقببها اللي هي القبب بتاعتها ونخيلها الزينة بتاعتها على قياس الباب المتجه نحو الشرق يعني ايه برضو مية الفن كلها واحدة زي الباب الشرقي ده اللي شفناه ضخمة قوي وتلات غرف وتلات غرف كمقدمة اول مبنى جواني بتاع سكن الناس المسئولين ده برضو من نفس الروح نفس شكل القبب نفس النخيل نفس الكوى مفتحة اللي هي بتدخل النور طول الوقت وكلها متساوية فتحس ان المبنى كده متناسق جدا يعني.
طبعا دي نواحي جمالية مش بعرف فيها قوي لكن حاولوا تتخيلوا على قد ما تقدروا.
وطبعا ده يؤكد ان ربنا بيحب النظام وبيحب الجمال وبيحب الدقة تلات كلمات احنا في بلادنا مش غاويينهم للاسف الجمال والنظام والدقة. لكن ده الهنا اله كده اله جمال ونظام ودقة. ذهب به نحو الجنوب واذا باب نحو الجنوب. يبقى عندنا بوابة تانية بقى ناحية الجنوب. عندنا بوابة كبيرة في الشرق وبوابة جنوب وبوابة شمال وبعدين الدار الداخلية بقى او في الاخر الهيكل زاته.
واذا بباب نحو الجنوب فقاس عضائده ومقببه كهذه الاقياس. يعني المقاييس بقت ايه موحدة كده. { فيه كوى وفيه مقببة من حواليه كتلك الكوى الطول خمسون زراعا والعرض خمسة وعشرون ذراعا . وسبع درجات مصعدة ومقببة قدامه وله نخيل واحدة من هنا وواحدة من هناك على عضائده }. يعني كل حيطة كده وحيطة كده دي عليها نخلة ودي عليها نخلة وجوة الاوضة .
برضو حكاية السبع درجات دي خلي بالكم الدار الداخلية هتبقى سبعة وبعدها تمانية. فاحنا بنطلع لفوق كل شوية. والسبعات دول طبعا رقم بيتكرر كتير بالذات للسلالم اشارة للكمالات. ان الانسان كمل جهاده. اكملتم السعي فكمل رحلة حياته جاب سبعة من سبعة وخلص كده ودخل السما.
{ وللدار الداخلية باب نحو الجنوب وقاس من الباب الى الباب نحو الجنوب ميت زراعا }. يعني من باب لبوابة دي مساحة واتى بي الى الدار الداخلية. دخلنا بقى ايه بصوا في ساحة خارجية وفيها مبنى دار خارجية اسمها. وبعدين دخلنا لجوة مشينا شوية جوة المدينة دي ومقابلتنا بقى مباني جديدة اسمها الدار الداخلية. وللدار الداخلية باب نحو الجنوب عشان تتخيلوا معلش. قصاد كل باب كبير يفصل من برة عن جوة في باب تاني شبهه اصغر شوية بيفصل الساحة الخارجية عن الدار الداخلية. اللي هي بقى المفروض ما كانوش يعتبوها غير الكهنة بس اللي يعدوا المنطقة دي. ده زمان يعني. حسب الطقس القديم كان فيه مرحلة كده ، القدس ما حدش يعديه غير الكهنة. برة الشعب. لكن من عند القدس ده كهنة بس وعند قدس الاقداس ده رئيس الكهنة بس. فهنا احنا بنتكلم عن الدار الداخلية وكأنها القدس. فعندها بوابات برضو. يقابل كل بوابة بوابة اخرى فطبعا انت بتعدي من البوابة الكبيرة قوي على السما وبعدين في درجات معينة بوابات اخرى.
برضو ساعات واحد يسأل يقول ايه؟ طب احنا هنشوف بعض ولا في ناس هتبقى سابقة قوي ولجوة قوي، لا طبعا تخيل السما مهما حاولنا نتخيلها. هي يعني تفوق اى تخيل . وكل الشهوات المقدسة متحققة. يعني شهوة حب القديسين تحققة فتشوف العدرا والملايكة وماري جرجس عادي. شهوة الشركة مع السماويين متحققة. ساوت رؤية المسيح نفسه في مجده. طبعا متحققة. شهوة انك تبقى شبعان تماما بالبر والنقاوة والسلامة متحققة. وبالتالي رؤيتنا لبعضينا موجودة. فقلت المسافات دي كلها حاجات اعتبارية مجازية. لانه صعب تخيلها كأجساد ممجدة ما لم تره عين ما لم تسمع باذن ما لا يخطر على الانسان ما عبد الله للذين يحبونه.
فهنا ماشيين كده على الدار الداخلية ولقينا البوابة الخاص بالدار الداخلية مقابل الباب اللي كان مرتبط بالدار الخارجية. اتى به للدار الداخلية نحو المشرق وقاس الباب كهذه الاقيسة ( استندر ) نفس الابواب كلها متشابهة. ابواب الكبيرة الخارجية والابواب اللي اصغر شوية وان كانت اعلى لانها داخلين بها على الدار الداخلية. وغرفاته واعضائد ومقببه كهذه الأقيسة.
....
ladlamp
يسعدنا ان نقدم لكم كل ما يخص المحتوى القبطى باستمرار – كما نتمنى منكم دعمنا و تشجيعكم لنا من خلال مشاركتكم و تعليقاتكم على محتوى موقعنا – حتى نستطيع تقديم المزيد بشكل مستمر
فتابعونا دائما على [ ladlamp.com ]
شاهدنا أيضا على : ladlamp2