تفسير سفر الرؤيا
بسم الاب والابن والروح القدس الاله الواحد امين
اهلا بحضراتكم في حلقة جديدة من برنامج ها انا ات شريعا
مقدمة
خلال الحلقات السابقة اخدنا (أفسس ـ سميرنا – بيرغاموس ) وقلنا افسس الرسل لانها الكنيسة المحبوبة كلمة افسس يعني المحبوبة ، سميرنا يعني المر ودي ترمز للاستشهاد وبيرغاموس التزاوج او الاقتران ودي ترمز للوقت اللي بيبقى فيه الكنيسة فيها برجلة انت مش عارف الصح من الغلط وفيه اقتران بين الرأي السليم والرأي الغلط والناس متلخبطة .
النهاردة هنبتدي بنعمة ربنا في الكنيسة الرابعة اللي هي ثياتيرا – { واكتب الى ملاك الكنيسة التي في ثياتيرا } كلمة ثياتيرا منها كلمة التياترو معناها المسرح ، و المسرح معناها ناس بتمثل ولا تعبر عن حقيقتها ، يعني انت ممكن تلاقي فوق المسرح واحد واخد دور ملك هو مش ملك او واحد واخد دور خدام وهو راجل محترم كبير ، فالتياترو ده معناها نوع من الزيف وعدم الحقيقة .
ملاك كنيسة ثياتيرا هو القديس ايرينائوس ، و ايرينائوس انسان مهم جدا في تاريخ الكنيسة احب تحفظه اسمه زي ما احنا حافظين اسم اثناسيوس وكيرلس ، ايرينائوس بيقولوا عليه ابو التقليد الكنسى وعشان ما تنسوش اسمه احنا كلنا عرفين من الاسامي المشهورة ( ايرينى ) ده اسمه مؤنث و المذكر بتاعه ايرينائوس ، فما تنسوش الاسم ده هو ابو التقليد الكنسى لانه كان موجود في اواخر القرن الاول وبداية التاني ، هو اول من بدأ يسجل ما هو موجود في الكنيسة من ايمان وعقائد .
ومع ذلك ان هو قديس عظيم لكن في في الرسالة لما هنقراها هنلاقي ان ربنا بيوجه لوم و عتاب ودي معناها مهما كان الواحد فينا عظيم لكن ما يمنعش ان يكون عنده ضعفات وما يتكبرش انه يقبل الانتقاد ويصلح من نفسه .
الكنيسة بقى اللي هي ثياتيرا دي اللي فيها المزهرية يجي المسيح يوصف نفسه يقول . ايه في رؤيا (18:2) .
{ هذا يقوله ابن الله الذي له عينان كلهيب نار ورجلاه مثل النحاس النقية } خلي بالك عينين المسيح كلاهيب نار معناها تخترقان استار الظلام انا ممكن اكون متداري في شكل اخدع به الناس لكن مش هقدر اخدع ربنا ونشكر الله ان هو بيستر علينا فالناس ما تعرفش حقيقتنا لكن دي مش هتدوم لان الله يعرف ما هو خفي في قلب الانسان . من الصلوات العجيبة اللي موجودة في الكنيسة وبتتقال سرا ، الاب الكاهن يقول له انت تعرف الاشياء الاخرى التي لي ، يعني في حاجات الناس ما تعرفهاش انت تعرفها فيقف ابونا بانكسار قدام ربنا يقول له انت تعرف الاشياء الاخرى التي لي يعني الناس عارفة ان انا اب وان انا قائد ومعلم واب اعتراف وبقود الناس للتوبة لكن ما يعرفوش ضعافات ودي من نعمة ربنا انه بيستر علينا ستر ربنا علينا مش معناها الواحد يتنادى لان هو عيناه كلاهيب نار ورجل هو مثل النحاس النقية . النحاس علامة الثبات والقوة وطبعا الناس الكبيرة في السن تعرف ان زمان قبل الالمونيوم كانوا بيستخدموا اواني نحاس في الطبيخ لانها النحاس معدن يتحمل درجات الحرارة العالية وعشان كده في خيمة الاجتماع وهيكل سليمان كان معظم الادوات المستخدمة مكونة من الخشب المغشى بالذهب الا مذبح المحرقة فكان كله من النحاس عشان بتبقى النار على المذبح ده اربعة وعشرين ساعة سبع ايام في الاسبوع باستمرار اشارة الى ذبيحة المسيح الدائمة المستمرة عشان كده لما نقول عن المسيح رجلاه مسل النحاس نقي معناها هو الذبيحة الدائمة زي المذبح النحاس ده والنار الالهية مشتعلة في دبيحته من اجل خلاص البشرية .
طيب عينيه زي لهيب النار ورجليه زي النحاس قال اما رأسه شعره فابيضان كالصوف الابيض كالثلج ده الوصف اللي اتوصف به في الاصحاح الاول رأسه و شاعره ( طبعا راسه وشعره معناها دقنه كمان ) ابيض علامة ان هو عتيق الايام وعيناه كلاهيب نار لانهم تخترقان استار الظلام ، ورجليها شبه النحاس النقية كانهما محميتان في اتون وصوته كصوت مياه كثيرة يعني حاجة مرعبة كده .
قال له بقى { انا عارف اعمالك ومحبتك وخدمتك وايمانك وصبرك وان اعمالك الاخير اكثر من الاولى } الرسالة دي بقى لكل واحد فينا ربنا بيقول له انا عارف يا حبيبي ان انت تعبت من اجلى مش ممكن انسى تعبك الله لا ينسى تعب المحبة ولا ينسى كوباية ميه ولا ينسى الطيب اللي سكبته المرأة على رأسه .
انا عارف اعمالك ، حط الاعمال قبل المحبة قبل الخدمة قبل الايمان وقبل الصبر لان الاعمال هي اللي بتثبت وبتبرهن صدق الحب وصدق الايمان لان ايمان بدون اعمال ميت ومحبة بدون اعمال تبقى كلام ، ومعلمنا يوحنا لا نحب بالكلام ولا باللسان بل بالعمل والحق عشان كده الاعمال دي اهم حاجة اللي هي بتبين صدق نيتك . انا عارف اعمالك ومحبتك وخدمتك وايمانك وصبرك وان اعمال الاخيرة اكثر من الاولى يعني احيانا الانسان يبقى فعلا له تاريخ في خدمة الكنيسة ولما يكبر في السن يبتدي يرخر وخدمته تقل لكن طول ما هو عايش خدمته تزيد واعماله تزيد والخبرة تخليه في قليل من الوقت يعمل اعمال كثيرة فربنا يقول له انا فرحان بك ان اعمالك الاخيرة اكتر من الاولى عكس الانسان اللي يبتدي بحماس وبعدين يبتدي ايه يكسل احنا عايزين دايما عندنا اعمالك الاخيرة اكثر من الاولى .
لغاية هنا بقى الملاك بتاع ثياتيرا حلو خالص هيبتدي بقى ربنا يقول له بس انا زعلان منك في حاجة لكن عندي عليك قليل ايه القليل اللي هو مدان به او ملوم عليه انك تسيب المرأة ايزابل التي تقول انها نبية حتى تعلم وتغوي عبيدي ان يزنوا ويأكلوا ما ذبح للاوثان . المرأة ايزابل قد تكون شخصية حقيقية قد تكون مجرد رمز مش هيهمنا الحتة دي يهمنا ان لما بيكون في حاجة غلط ربنا بيقول انا مش مبسوط ، احيانا لما بنقعد نفكر في ربنا ان هو طيب وصالح نظن انه بيتهاون مع الاخطاء وبناءا عليه احنا كمان عشان احنا طيبين وحلوين زي ربنا نتهاون مع الاخطاء . لكن هنا الكتاب المقدس بيبين هيقعد يقول لك انت حلو وكويس لكن في حاجة مش مبسوط منها عندي عليك قليل .
المرأة ايزابل بالاسم ده اسم وحش لانه في امرأة في العهد القديم اللي هي زوجة اخاب الملك كانت انسانة شريرة واسمها كان كده وهي اللي اشارت على اخاب انه يقتل نابوت اليزراعيلي عشان يستولى على الحقل بتاعه وكانت تكره النبي ايليا لانه بيبكتها و يبكت اخاب على خطاياي وكان في عداوة كبيرة لكن طبعا في الاخر ربنا انتقم منها والمكان اللي لحست فيه الكلاب دم نابوت اليزراعيلي لحست فيه ايضا دم ايزابل فصارت الاسم ده يرمز للشر ، المرأة ايزابل دى ترمز بقى لاي قوة شر في الكنيسة يعني ما هو الكنيسة خلي بالكم مستشفى تائبين وليست متحف قديسين الحتة دي مهمة يعني ما تتوقعش ان الكل في الكنيسة قديسين تحف يعني ، لكن في مستشفى يعني احنا جوة المستشفى فيه الانسان المريض وفي انسان اللي بيعالج وفيه الزائر وفيه اللي بيخف وفيه اللي بيموت وفي اللي بيطول وفي اللي بيخف بسرعة فالكنيسة مستشفى ما تتوقعش ان احنا في السماء واحنا في الكنيسة لان احنا لسه في الارض ولو كنا في الكنيسة على الارض زي في السماء بالظبط لماذا نشتهي السماء؟ ما احنا خلاص عايشين في الكنيسة في سماء ، لكن وجود ضعفات فينا يخلينا نبص للسماء ونقول امتى بقى يا رب نيجي في المكان اللي ما فيهوش ضعفات وما فيهوش ناس متعبين . فما تتعسروش لما تلاقوا حد من خدام الكنيسة او من الشعب او من الاكليروس فيه ضعفات .
هنا المرأة ايزابل موجودة في الكنيسة ، ما هو لو كانت غريبة و وثنية او يهودية ما كنش العتاب يبقى للاسقف بتاع الكنيسة . قال له انت بتسيبها تقول انها نبية يعني عاملة نفسها خادمة لكن خدمتها كانت مش لربنا كانت لذاتها تعلم وتغوي عبيدي ان يزنوا ويأكلوا ما ذبح للاوثان. قد يكون برضه المشكلة دي حرفيا اه بتخليهم ياكلوا مذابح الاوثان ومرتبط بعبادة الاوثان الزنا الجماعي . الزنا في المفهوم الروحي هو ان الانسان يسيب ربنا و يروح لاله اخر . زي مرأة اللي تسيب زوجها تروح لانسان تاني فهنا ده يسموه زنا روحي فقد تكون المرأة دي هي اي انسان بيحرف الناس عن عبادة الله الى عبادة الهة اخرى وبعدين الزنا واكل ما ذبح للاوثان دي كمان المشكلة بتاعة النقلاويين اللي اتكلمنا عنها الاسبوع اللي فات .
طيب الست اللي هي عاملة نفسها تقود الناس لانحراف ربنا قال عنها ايه؟ اعطيتها زمانا لكي تتوب عن زناها ولم تتب ، دي بقى يعني طريقة ربنا ان هو بيطول باله علشان يبقى فيه فرصة للتوبة ولولا ان ربنا طويل البال ما كنش فيه حد فينا يخلص لكن نشكره على انه طويل البال .
عشان كده معلمنا بولس في روميا اتنين يقول { ام تستهين بغنى لطفه وامهاله وطول اناته غير عالم ان لطف الله انما يقتادك الى التوبة } هنا لطف الله وطول باله وامهاله معناها بيدي فرصة للتوبة . الانسان بقى اللي عامل زي ايزابل الشريرة دي يقول { ولكنك من اجل قساوتك وقلبك غير التائب تزخر لنفسك غضبا في يوم الغضب واستعلان دينوة الله عادلة الذي سيجازي كل واحد حسب اعماله } اذا كنا النهاردة مشغولين قوي بالمجيء التاني افضل ما ننشغل بالمواعيد والاحداث ننشغل بتوبتنا لان كون الله مطول باله ومدي فرصة للبشرية هو الهدف ان احنا نقدم توبة ، { اعطيتها زمانا لكي تتوب عن زناها } للاسف ولم تب تتب. فاحنا اذا كان شايفين النهارده ربنا طيب وصالح وطويل البال لكن هيجي يوم اسمه يوم الغضب يقول { تزخر لنفسك غضبا في يوم غضب }
(عايز في مرة برضه اجهز لكم موضوع كده عن غضب الله ) لان صحيح الله حلو قوي ولازم نفرح الناس ان هو حلو لكن ساعة ما بيزعل بيبقى شديد فاكرين كلمة مخيف ان هو الوقوع في يداي الرب فاحنا ليه نخلي خايفين ما نبقى حلوين معه عشان كمان هو يبقى كويس معاه لانه ليس رحمة في الدينونة لمن لم يستعمل الرحمة .
ومعلمنا بطرس في رسالته التانية يقول ايه { تباطئ الرب عن وعده كما يحسب قوم التباطؤ لكنه يتأنى علينا وهو لا يشاء ان يهلك اناس بل ان يقبل الجميع الى التوبة } يعني هدف ربنا في الاخر لانه يريد ان جميع الناس يخلصون والى معرفة الحق يقبلون فبيدينا فرصة .
طب الست دي بقى اللي هي اخدت فرصتها وما تابتش قالها { انا القيها في فراش والذين يجنون معها في ضيقة عظيمة ان كانوا لا يتوبون عن اعمالهم } يبقى هنا في وقت للغضب في وقت للانتقام في وقت للعقوبة . (القيها في فراش ) بعض الناس حاليا يعني بيعلموا في الكنيسة حاجات غلط يقولوا الله لا يعاقب ده الانسان لما بيغلط هو اللي بيحط نفسه في العقوبة يعني كأن زي ما يكون واحد سرق فراح حط نفسه في السجن ما فيش قاضي او القاضي قال له احكم على نفسك انت ، فالله لا هنا بيقول انا القيها في فراشها في ضيقة عظيمة ان كانوا لا يتابون عن اعمالهم . فصحيح الله طيب وجميل لكن افتكروا كلمة رأس الحكمة مخافة الله .
{ واولادها اقتلهم بالموت } نتيجة عدم التوبة { فستعرف جميع الكنائس اني انا هو الفاحص الكلى والقلوب } اشمعنا الكلى والقلوب الكلى اللي هي جمع كلية شمعنا يذكر دايما كلمة فاحص الكلى والقلوب ، من جهة تشريح الجسم الكلية اعمق حتة في جسم الانسان والقلب هو تشريحيا بتاع ضخ الدم لكن من جهة الشعرية يعني يعبر عن المشاعر دايما يقول لك بحبك من كل قلبي والقلب برضه في الكتاب المقدس وفي الكنيسة يعبر عن الزهن يعني لما ابونا يقول ارفعوا قلوبكم مش قلبي ده معناها عقلي القلب يساوي العقل على طول ارفعوا قلوبكم معناها ارفعوا عقولكم هي حرفيا موجودة قلب ، لكن مش معناها القلب اللي هنا هنرفعه حطه فين؟ هو مكانه هنا لكن العقل ارفعه للسمع .
فكلمة احبك من كل قلب يعني انا بردو مدرك ان انا بحبك فالقلب هنا يعبر عن العقل ويعبر عن الفكر ويعبر عن المشاعر ، الكلى بقى اعمق حاجة في الانسان معناها الله يفحص اعماقنا وانتم عارفين كمان تشريحيا الكلية دي فوقيها غدة صغيرة يسموها الجار كلوية ودية اللي بتفرز هرمونات مسئولة عن المشاعر الانسانية فربنا فاحص المشاعر و الافهام و الاذهان .
فتعرف جميع الكنائس انا انا فاهم كل حاجة يعني احنا ممكن سامحوني يعني نقدر نضحك على بعض ما حدش يقدر يضحك على ربنا هو فاحش الكلى والقلوب .
فأسم الكنيسة ثياتيرا يعنى مسرح مليان مزهرية و كانت فترة الناس بتضحك على بعض وتغش بعض لكن ربنا باصص من السماء يقول انا فاحص القلوب والقلب وساعطي كل واحد منكم بحسب اعماله مش بمزهره ، ولاحظوا ان في اليوم الاخير ربنا مش هياخد رأي الناس مش هيعمل مش هيعمل تصويت . يا جماعة مين موافق ان فلان يدخل السماء - ياخد بقى لايكات كتيرة فيفرح ربنا يدخله السما واحد تاني مش هياخد لايكات مش هيدخل - ما فيش حاجة زي كده ما تفرحوش بان الناس تمدحكم وما تزعلوش ان الناس تزمكم لان في الاخر ده كله ما لوش وزن عند ربنا لا تفرح باللي يحبك قوي ويمدحك ويرفعك ولا تقلق من اللي يهينك لان ده ما لوش وزن فاكرين القصة الظريفة قوي
( بتاعت راهب راح لابوها بوحي وقال له كيف اعيش في سلام ، فحب يدي له درس حلو قال له روح للطفوس الطافوس ده هو المقبرة بتاعة الدير اللي فيها رهبان مدفونين روح في الطافوس اشتم الرهبان المدفونين هناك ازيك كده فقال له اسمع الكلام فراح هناك يسمع كلام ابوه وقف قدام مقبرة دية وقعد يقول لهم يا نصابين يا دجالين يا اللي عاملين نفسكم قديسين وربنا عارف ان انتم ناس منحرفين كلام صعب قوي ورجع قال له سويتهم على الجانبين قال له طب ردوا عليك قال له ولا طبعا في صوت طلع قال له طب روح اعتذر لهم وامدحهم فراح قال لهم اتأسف انتم قديسين وعظماء وانا ما استاهلش ولولا انتم ما كنش الدير بقى عمران لغاية النهاردة وانتم احملتوا كلام كلام حلو قوي ورجع قال له برضو يعني روقتهم ، قال له حد رد؟ قال له ما حدش رد. قال له عشان تعيش في سلام لا تفرح باللي يمدحك ولا تزعل من اللي يزمك. )
في الاخر ربنا مش هياخد برأي حد. هو فاحش الكلى والقلوب. { وهيعطي كل واحد بحسب اعمالة } مش بس نياته عشان تقول ربنا بياخد بالنيه . طب فين عملك يعني دلوقتي لما يقول لك ايه للي عاوزين عن يمينه تعالوا الي يا مبارك ابي رثوا الملكوت المعد لكم قبل تأسيس العالم لاني جعت فاطعمتموني مش كان في نيتكم تطعموني عطشت فسقيتموني لازم في عمل الايمان بدون اعمال ميت هيعطي كل واحد بحسب اعماله .
{ ولكنني اقول لكم وللباقين في ثياتيرا كل الذين ليس لهم هذا التعليم والذين لم يعرفوا اعماق الشيطان كما يقولون إنى لا ألقى عليكم ثقلا أخر . وَإِنَّمَا الَّذِي عِنْدَكُمْ تَمَسَّكُوا بِهِ إِلَى أَنْ أَجِيءَ }
لاحظوا احنا في الكنيسة رقم اربعة ، اذا خدناها بالترتيب الزمني يبقى قربنا من النهاية لان هم سبعة ، فبيقول اللي عندكم اتمسكوا الى ان اجيء مش هالقي عليكم ثقلا اخر ما فيش وصية جديدة ما فيش تعليم جديد انا عايز حاجة واحدة بس اتمسك باللي عندك .
يقول معلمنا بولس عبرانيين ( 9:13 ) : { لا تساقوا بتعاليم متنوعة وغريبة } احنا يا جماعة الوقت مقصر محناش في وقت دلوقتي نجرب تعليم جديد ولا نجرب اتجاه جديد احنا مش حقل تجارب احنا مش ولاد النهاردة الكنيسة بتاعت دى ليها الفين سنة مش لسه هنجرب ايمان جديد ولا نبتدي نكتشف حقائق جديدة دى حاجات راسخة الفين سنة ، خلي بالكم اي حد بيغير هو كده يعمل كده ويقع الكنيسة واقفة زي البرج ، فلا تساقوا بتعاليم متنوعة وغريبة .
ويقول في تسالونيكى الثانية ( 15:2 ) : { فاثبتوا اذا ايها الاخوة وتمسكوا بالتقاليد التي تعلمتموها او بالتعاليم سواء كان بالكلام ام برسالتنا اتمسكوا بالكنيسة } .
وفي رؤيا 2 : يقول { من يغلب ويحفظ اعمالي الى النهاية فساعطيه سلطانا على الامم } احفظ اتمسك بالايمان والعالم كله لو اهتز انت ما تهتزش . ايام نوح الناس كلها بتتريق على نوح لكن هو لما يهتز ودخل الفلك هو و اولاده و نجى ، ادخل فلك الايمان عشان تنجى من الطوفان بتاع التعاليم الغريبة اللي تزحف على الكنيسة .
من يغلب يغلب الشر ويغلب الخطية ويغلب الشيطان ويغلب الموت ويغلب الانحرافات العقيدة ويحفظ اعمالي الى النهاية فساعطيه سلطانا على الامم ، في ناس اخدوا العدد ده وبنوا عليه كلمة ان الملك الالفي والمسيح يجي على الارض ويملك الف سنة واليهود يملكوا على الامم ، طبعا فكرة ما فيهاش اي جذر في الكتاب المقدس اليهود كان لهم تميز وهم شعب الله المختار لغاية ما جه منهم المسيح . جه منهم المسيح هيبقى نور تجلى للامم ومجد لشعب اسرائيل اللي يآمن بالمسيح يبقى لسه في شعب الله اللي يرفض بقى غريب عن الله فازاي يبقى في وعد ان اليهود يملكوا على الامم هنا سلطان على الامم عامل زي ما جه في انجيل متى ( 28:19 ) اللي بيقول على لسان ربنا يسوع المسيح { انكم انتم الذين تبعتمونى - اللي هم اباءنا الرسل - في التجديد - اللي هو المجيء التاني - متى جلس ابنه الانسان على كرسي مجده تجلسون انتم ايضا على اثني عشر كرسيا تدينون اسباط اسرائيل الاثني عشر } يبقى هنا في وعد ان البشر المؤمنين اللي حبوا ربنا يشاركوا في دينونة العالم .
يقول معلمنا بولس في كورنثوس الأولى ستة { الستم تعلمون ان القديسين سيدينون العالم الستم تعلمون اننا سندين ملائكة } طبعا الملائكة الساقطين ، يبقى هنا الدينونة دي ايه . يعنى ايه الانسان اللي يحفظ اعماله الى النهاية يكون له سلطان ويدين. الدينونة هنا بمعنى المقارنة يعني انت ما عملتش ليه وصيتي؟ قل له وصيتك ثقيلة واحنا ما استحملناش وانت ما كان مفروض تدينا حاجة نقدر نعملها ، فيقول له طب اشمعنا ده عارف ينفذ الوصية ، تعال يا ابو مقار تعال يا انبا انطونيوس ، هى وصيتك كانت تقيلة ؟ يقول وصاياه ليست ثقيلة . هنا الدينونة ان الناس اللي نجحوا بالمقارنة بالناس فشله بيبينوا ان انتم اللي غلطانين مش ربنا اللي غلطان .
{ فيرعاهم بقضيب من حديد كما تكسر انية من خزف كما اخذت انا ايضا من عند ابي } الانسان اللي هيغلب هيرعى الامم بقديم من حديد عامل زي المزمور اللي بنصلي كل يوم في صلاة باكر يقول اني اخبر من جهة قضاء الرب قال لي انت ابني انا اليوم ولدتك سالنى فاعطيك الامم ميراثك و سلطانك الى اقاصي الارض تحطمهم بقضيب من حديد مثل اناء خزاف تكسرهم . هنا الابن اخد من عند الاب سلطان الدينونة زي ما قال في يوحنا خمسة اتنين وعشرين لان الاب لا يدين احدا بل قد اعطى كل الدينونة للابن هنا يعني ايه الاب اعطى كل الدينونة للابن ، فالابن مساوى للاب فى الجوهر من جهة لاهوته دي كلنا عارفينها ومتفقين عليها لما تجسد صار واحد مننا فهو اللي خلصنا لان واحد مننا قبل في جسده الخاص اللي اتولد به من العدرا الالم والعزاب والموت والقيامة فصار هو مندوب البشر في قبول الموت نيابة عن البشر واعطانا حياته - اخذ الذي لنا واعطانا الذي له - اخد الموت بتاعنا وادنا حياته وبعدين يبقى هو كمان اللي يدين مش انت اللي خلصتهم شفهم بقى دول اصدقائك شفهم عملوا ايه عشان كده قال الاب لا يدين احد بل قد اعطى كل الدينونة للابن .
{ ويكمل يقول واعطيه كوكب الصبح } ايه كوكب الصبح . في رؤيا 22 يقول { انا يسوع انا اصل وزرية داوود كوكب الصبح المنير } يبقى لما يقول اعطيه كوكب الصبح يعني اعطيه المسيح ، تخيلوا بقى الواحد لما ياخد المسيح في حياته المكافأة بتاعتنا ان كون مسحيين ، زي ما قال في سفر النشيد انا لحبيبي وحبيبي لى . وطبعا في رسالة بطرس التانية بردو يتكلم عن المسيح كوكب الصبح ، يقول { وعندنا الكلمة النبوية وهي اثبت } اثبت يعني ثابتة ما فيهاش اي نوع من الشك والقلق { التي تفعلون حسنا ان انتبهتم اليها كما الى سراج منير في موضع مظلم } كلمة الانبياء سراج منير { الى ان ينفجر النهار } اللي هو المجيء بتاع المسيح في التجسد ويطلع كوكب الصبح في قلوبكم يعني عشان اي واحد فينا عايش في ظلام الخطية يبتدي يقرا كتاب مقدس زي ما يكون ده سراج منير في موضع مظلم لغاية ما ينفجر النهار في قلبك ان المسيح يسكن جواك ودي الكلمة اللي يقول اعطيه كوكب الصبح .