سفر حزقيال ( عهد قديم ) تفسير أبونا داود لمعى ـ [13.10.2020 ] ✟ الأصحاح 44 ، 45 – 📹 📝 – ✔

بسم الاب و الابن و الروح القدس أله واحد أمين

 

مراجعة بسيطة و سريعة

حزقيال زي اي نبي من انبياء العهد القديم رسالته كانت تتلخص في كلمتين . توبوا والمسيح جاي . كل انبياء العهد القديم بدون استثناء ينطبق عليهم الخطين دول . والاتنين دول مرتبطين ببعض . حتى يوحنا المعمد اللي جه اخر الانبياء قال نفس الكلام . توبوا لانه قد اقترب منكم ملكوت السماوات . انما حزقيال بدأ ان اول اصحاح فيه  دخل السما واتفرج . فشاف المسيح في مجده وشاف الاربع كائنات غير المتجسدين . حاملين عرش الله وشاف ربواك الملايكة وسمع تسابيح فخاف . زي اللي شافه يوحنا الرائي زي اللي شافه اشعيا بس ميزة حزقيال انه اول ما ابتدى النبوءة ده اول حاجة بيقولها . انه وسط الاحباطات اللي هو فيها والاحساس انه اليهود تمزقوا وتفتتوا وبقوا مش مستقرين في بلادهم واتذلوا . فكان صعبان عليه شعبه و الايام الصعبة . جت ايام الرؤية دي ادته رجاء وادته تعذيب .

وبعدين بقى المسيح يظهر له ويقول له خد كل الكلام ده . فالكلام اللي هو كاتبه اكله له اكل حاجة اسمها الدرج اللي هو الكتاب الملفوف ده بقى المسيح يديه له . يقول له كله عشان تطلع تكلم الناس . وكل شوية يدينا منظر ويحكي لنا المنظر ده شكله ايه . فكلمنا عن خيانة الشعب للربنا كانها خيانة عروسة لعرسها . وكلمنا عن زعل ربنا من الوثنية اللي ملت العالم ودخلت على شعبه . وفرجنا ازاي نهاية الاشرار نهاية صعبة اوي . كمان كلمنا عن عتاب شديد للرعاة . وان ربنا له حساب شديد مع الرعاة . الرعاة اللي يقصد بهم ايه شيوخ اليهود وقتها ورؤساء الهيكل وازاي ربنا هيحاسبهم لان دول اضلوا الشعب وتوهوا الناس ولخبطوه .

كلمنا كمان عن يوم القيامة فرجنا على يوم القيامة . لسة هنشوفه كمان . وكلمنا عن الهيكل بتاع الجديد ازاي يطلع منه الروح القدس ويغطي العالم .

كلمنا حزقيال عن الخلاص .. كل دي حاجات ادركها بالروح . من كتر النبوءات اللي شافها .

احنا وصلنا لاصحاح اربعة واربعين من عدد خمسة .

فقال لي الرب يا ابن ادم اجعل قلبك وانظر بعينيك واسمع باذنيك كل ما اقول لك عن كل فرائض بيت الرب وعن كل سننه . واجعل قلبك على مدخل البيت مع كل مخارج المقدس .

قبلها على طول زى ما شفنا المرة اللي فاتت شاف باب عجيب دخل وربنا وخرج والباب قفل وما يتفتحش تاني . والاباء قالوا اشارة الى بتولية امنا العدرا . لانه المسيح دخل عالمنا من خلال امنا العدرا . وايضا اشارة انه حاجة تخص المسيح وحده . يعني مهما كان هو وحده المسئول عن خلاص البشرية الباب المغلق ده ما فيش غير المسيح اللي يقدر يفتحه . باب خلاص الانسانية من من الامم لم يكن معي احد . يعني المسيح له المجد كمخلص لا يشاركه في دوره الكفاري او الخلاص انسان . هو الوحيد اللي يقدر يغطي خطايا البشر فلما كان حزقيال بيخر على وجهه قدام رؤية المسيح قال له اجعل قلبك وبص بعينيك واسمع بودانك كويس اللي بقوله لك . وخدناها المرة اللي فاتت كقاعدة انك لما تقرا الانجيل ركز . اسمع بودانك كويس بص بعينيك عشان يبقى قلبك على الكلام فما يبقاش الكلام بيعدي عليك يفوتك حاجات مهمة .

وبعدين قال له اجعل قلبك على مدخل البيت . ليه ؟ عندنا في الطقس القبطي حاجة جميل . لما نيجي عند باب الكنيسة . الواحد ما يدخلش بسرعة . يقف يرسم الصليب و فى ناس تسجد . ونقول بكثرة رحمتك ادخل بيتك . يعني كاننا مستكترين عشان تمد رجلك وتدخل الكنيسة كانك بتمد رجلك وتدخل السما . دي حاجة مش قليلة . ودي محتاجة رحمة ربنا . فبتقول له بكثرة رحمتك ادخل بيت واسجد قدام هيكل قدسك بمخافتك . فقال له اجعل قلبك على مدخل البيت . عارفين معناها ايه كمان ؟ اعمل حساب انك رايح الكنيسة . هل يصح تروح الكنيسة وتبقى مزعل حد ؟ تبقى مشغول بالدنيا زيادة . تبقى قلبك في الطمع والشهوات . اجعل على مدخل البيت . اعمل حساب اللحظة دي . انك جاي تقابل ربنا . عشان خاطر مدخل البيت حياتك كلها تتظبط . عشان تدخل بس من مدخل البيت كل حاجة في حياتك تتصلح .

تذكره في تاريخ الكنيسة في قصة مؤسرة . قصة مريم السائحة ومريم المصرية . لما كانت عايشة في الخطية ورايحة كنيسة القيامة . ويعني فاكرة عادي الدخول وجت تدخل الكنيسة ما دخلتش . ما عرفتش تدخل . في حاجة مانعاها . فانهارت في البكاء وحست بالجرم . والنجاسة اللي هي فيها . فراحت تابت توبة قوية لقت انها قدرت تدخل الكنيسة . وقضت حياتها بعد كده في الصحراء سياحة ورهبنة شديدة ونسك زائد لانها حست مدخل البيت ده لا ده مش اي حد يدخل . مش اي حد . البيت ده بتاع القديسين والملايكة . البيت ده بتاع الابرار . فانت تفكر انه انت داخل بيت ربنا تجعل قلبك على مدخل البيت . فتلاقي نفسك بتصلح حياتك كلها عشان دخلة الكنيسة دي مش حاجة سهلة يعني .

واحنا شفنا الحكاية دي لما اتحرمنا من الكنيسة شوية قدرنا انه دخلة باب الكنيسة دي لها كرامة . فعلا نعمة ويعني ربنا يديمها علينا .

 

وقل للمتمردين لبيت اسرائيل هكذا قال السيد الرب يكفيكم كل رجاساتكم يا بيت اسرائيل . بقيت ابناء الغريب الغل في القلوب الغل في اللحم . ليكونوا في مقدسي فينجسوا بيتي بتقريبكم خبزي الشحم والدم . فنقضوا عهدي فوق كل رجستكم . يعني ايه ؟

بيقول لهم مش كفاياكم بقى سمحتم للوثنين يدخلوا بيتي ؟ بسبب خطايا الشعب اليهودي ربنا ساب البابليين يدخلوا يهينوا الشعب اليهودي ويهينوا بيت ربنا . ده بسبب قسوة اليهود والوثنية بتاعتهم . فقال لهم يكفيكم بادخالكم ابناء الغريب . ساعات لما تحصل حاجة وحشة لواحد يقول له ليه يا رب كده ؟ ليه يا رب ؟ ما انت السبب يا حبيب مش انت الغلطان؟ احيانا الواحد يستسهل يلوم ربنا وينسب ليه الحاجات الصعبة اللي بتحصل هو انت مش واخد بالك ان احنا السبب في المشاكل احنا نستاهل اكتر من كده وهي اورشليم لما تأدبت كانت قسوة من ربنا ، ولا ده ربنا طول باله عليهم ، وبعدين لما افتروا و ساقوا فيها جاب لهم البابليين دول ظبطوهم .

طيب ما هو كان ربنا مديهم زمان توبة طويل ما تعلمهوش . فمن المناسب انه مع كل تأديب لواحد يعترف بخطيئته . ويبقى شايف ان هو اللي يستحق . وان ربنا يعني بار وقدوس زي ما دانيال كان يصلي في نفس الوقت يقول له انت يا رب قدوس انت استحملت كتير . انت بار في احكامك . انت ما غلطتش طبعا . احنا نستاهل اللي جرى لنا ونستاهل اكتر منه . اللي كسرنا وصاياك وحدنا عن شريعتك واهملنا ناموسك واهملنا كل اللي انت قلت ما نعملوش .

فهنا من ضمن الاخطاء المشهورة بادخالكم ابناء الغريب الامم دخلوا . ليه ؟ لان الامم لقوا اليهود وثنيين زيهم خلاص . ودي مشكلة من مشاكل كنيسة في كل جيل ان ولاد الكنيسة يبقوا زيهم زي ولاد العالم . يقوموا اهل العالم يحسوا ان الكنيسة دي عادية . اي بيت اذا كان ولاد الكنيسة مش محترمينها . عاوزين ولاد العالم يحترموا الكنيسة ازاي ؟ اذا كان ولاد الكنيسة هيكذبوا زي العالم ما بيكذبوا . طب ومين ييجي الكنيسة ؟ وليه يشوفوا الكنيسة مختلفة ؟ ايه الميزة اللي تميز ولاد ربنا ؟ اذا كان الشر اللي في العالم هيعملوه اولاد ربنا . فاحنا بسببنا احيانا يجدف على اسم الله . او يهان اسم المسيح . او تتوقف الكرازة . يعني لو واحد عاوز يتعرف على المسيح ويلاقي مسيحيين . حياتهم ملخبطة يقول لك طب تفرق ايه ؟ المسيح هيعمل لي ايه ؟ ما هو المسيحيين ملخبطين . مش كده ؟

اذا هنا ادخالكم ابناء الغريب . يعني انتم بقيتم سايحين زيكم زي الامم . اللي يشوف اليهودي وهو يقدم يعرف ان يهودي ازاي . اللي يشوف المسيحيين وهم يسلكوا سلوك مليان شر . ينفع يقول ربنا .. ربنا فين بقى ؟ وهنا لما يقول ابناء الغريب الغلف القلوب ايه الغلف القلوب دي ؟ استخدمها القديس اسطفانوس . والقديس بولس اكتر مرة ان الاغلف يعني غير مختتن . طب ما الختان مش في القلب . لأ كان ربنا دايما يزكر ان الختان ان كان علامة في اللحم كده هو اساسا علامة عهد في القلب . فالاممي ما عندوش العلامة دي في جسمه . لكن هو اساسا بيعبد الشيطان او بيعبد الاوثان . اليهودي حتى لو مختتن قلبه اغلف . يعني قلبه غير مكرس بربنا . قلبه زايغ . فهي حتة الختان هنا هتفيده في ايه ؟ هنا اغلف القلب يعني قلبه زايغ عن ربنا . قلبه حتى لو فيه ختان . زي واحد يقول اصل انا متعمد . ايوة المعمودية سر عظيم يعطى لمغفرة الخطايا وحياة ابدية . والمعمودية حياة جديدة . لكن لو انت ركنت المعمودية وقلبك راح للدنيا . كانك قلبك ده . ما تعمدش . كانك ابطلت قوة المعمدية . الحل انك تتوب مش تتعمد تاني . فهنا كلمة غلف القلوب يعني قلب بعيد تماما عن ربنا . مع ان ده بيكلم شعبه . هم عملوا كده سمحوا الغل في القلوب يدخلوا البيت يعني بقى زيهم زي بعض كده .

وينجسوا بيتى بتقريبكم خبز شحم ودم . يعني خلوا الامم يدخلوا ما هو خلاص بقى الحكاية سايحة على بعض . فبيعملوا زيهم فهم نفسهم مش مسموح لهم يدخلوا هيكل لليهود . بقوا يدخلوا ويشاركوا في الاحتفالات اليهودية .

فنقدوا عهدي فوق كل رجستكم ولم تحرسوا حراسة أقداسى ، كان الاقداس عليها حراسة كانت ابواب الهيكل زمان بقى . وان كان دلوقتي احنا بنوصف الهيكل بالرمز لان حزقيال بيتنبأ عن عبادة العهد الجديد . كان زمان بقى فيه لاويين يقفوا على الابواب يتأكدوا ان كل واحد داخل ده يهودي مختتن . يمنعوا دخول اي حد . وفي ناس تانية حرص على القدس عشان ما يدخلش القدس الا الكهنة . فكان عندهم كذا فريق حرس صبح ضهر ليل في حرس . حرس دول من اللاويين المكرسين . فهنا بيقول انتم ما حرستوش حراسة اقداسى . حراسة الاقداس تلاقوها في كلام كتير في العهد القديم . مثلا على اسوارك يا اورشليم اقمت حراسا ، اشعياء . شاف المنظر ده . لا ينامون الليل ولا النهار .

ايه الحراس دول ؟ حراس الكنيسة هم الملايكة . وحراس الكنيسة هم الكهنة  و الخدام الامناء . اللي يحرسوا الكنيسة من ناحية التعليم . حراسة العقيدة . ليه ؟ عشان ما يدخلش تعليم غريب يلخبط شعب الكنيسة . وحراسة الكنيسة حتى من دخول شخصيات غريبة اه زي ما بيقول فى مثل الراعي يقول الراعي عينه على الرعية لاء يجي ذئب او يجي سارق يسرق فلازم الراعي يكون صاحي . لكن الاجير هيجري ويهرب لو شاف السارق ولا شاف الذئب هيهرب . لكن الراعي الصالح لازم هيفضل سهران عشان ما فيش حد يتسرق . فحراسة الكنيسة مقصود بها مش الامن يعني ربنا يبارك لنا فيهم . لأ الامن الروحي . بمعنى امان الكنيسة من الهرطقات من البدع من المعلمين من التيارات الغريبة اللي في العالم . دي مسئولية . فهنا بيقول انتم ما حرستوش حراستى . حراسة اقداسى .

بل اقمتم حراسا يحرسون عنكم يعني ايه جبتوا حرس غريب قال يعني هو المسئول طب ما هو الحرس الغريب هيدخل ناس غريبة . فهم استهانوا بالهيكل زمان . هكذا قال السيد الرب . ابن الغريب اغلف القلب واغلف اللحم لا يدخل مقدسي . يعني هنرجع تاني للمبادئ زمن . غير المعمد غير المؤمن غير التائب ما يقربش من التناول . ما يقربش من المقادس . ليه ؟ لان ده قدس اقداس . ده احنا بنلمس المسيح . فهنا ما ينفعش لاي حد غير مؤمن وغير معمد وغير تائب ان يقترب .

بل اللاويون الذين ابتعدوا عني حين ضل اسرائيل فضلوا عني وراء اصنامهم يحملون اسمهم . يعني ايه ؟

افتكروا انه اللي ضلوا وما التزموش بدورهم كان حسابهم صعب . وجاء السبي بسبب التهاون في حق ربنا . وبتيجي تجارب شديدة بسبب الاستهتار . الاستباحة الاستهانة . ان كان بالتناول وان كان بالصلاة ان كان بالامانة ان كان بالاستقامة . فيه ناس تتهاون . فالقديس بولس ان تستهين بلطف الله وامهاله وطول اناته غير عالم ان لطف الله . يعني ربنا لما يطول باله بيطول باله عشان صبره لكن هو مش مبسوط طبعا من الشر . ولو الواحد ساء فيها يبقى بيحوش لنفسه غضب الله .

ضلوا عني وراء اصنامهم يحملون اسمهم . يكونون خداما في مقدسي ده بيتكلم بقى عن العهد الجديد . حراس ابواب البيت وخدام البيت . هم يذبحون المحرقة والذبيحة للشعب . وهم يقفون امامهم ليخدموهم . يعني هيجيب حرس جديد من ايه ؟ كهنة العهد الجديد من خدام العهد الجديد . ابائنا الرسل هم مطرح الاسباط . فاصبحت كنيسة العهد الجديد واقفة على 12 عمود كده و 12 باب للحياة الابدية اشارة لابائنا الرسل اللي حملوا كهنوت العهد الجديد من المسيح وفتحوا للعالم طريق الخلاص .

لانهم خدموهم امام اصنامهم . يعني ايه ؟

القدام دول هيترفدوا ، عرفين مثل الكرمين يقول الكرامين دول بقى لازم يشيلهم خالص ويجيب كرامين جداد . نفس المعنى . كل عدم الامانة القديم ده له حساب . يقوم يستبدلهم بناس امناء حكماء يلتزموا .

لانهم خدموهم امام اصنام . هم كانوا معترة اثم لبيت اسرائيل . لذلك رفعت يدي عليهم انا ادبتهم . يقول السيد الرب فيحملون اثمهم .

تكرار كلمة يحملون اثمهم دي تخوف ليه ؟ الخطية اللي ما توبش عليها انت شايلها . وشايلها يعني هتدفع تمنها . ولو دفعت تمنها هتدخل جهنم لان كل خطية توصل للهلاك . طب ايه الحل ؟ الحل انك تروح تحط الخطايا على المسيح . لكن من يحمل اثمه ؟ من يستطيع ان يقف امام الله ؟ شايل خطيته . طيب لو عليك خطايا مش مدفوعة التمن يبقى هتدخل بقى حتى توفي الفلس الاخير . معناها ايه ؟ عقابها ابدي . لكن احنا اثمنا زي ما قال الكتاب اثمنا حملها . هنا بيقول هم يحملون اسمهم . ايه الفرق ؟ هم هيشيلوا خطيتهم لان هم تابوش . ما امنوش . ما دخلوش فكر العهد الجديد . طب شيلوا خطاياكم لو تقدروا . طب احنا .. احنا بقى اثامنا حملها . اوجاع نتحملها . نحن حسبناه مصابا مضروبا من الله وهو مجروح من اجل معاصينا . مسحوق من اجل اثامنا . تأديب سلامنا عليه بجراحاته شفينا . ويحكي  الحكاية كلنا كغنم ضلالنا . ملنا كل واحد الى طريقه . والرب وضع عليه اثم جميعنا . يبقى اتحط على المسيح ايه ؟ اثامنا كلها . لكن دول مين يقدر يشيل اثمه ؟ مين يقدر ييجي ساعته وهو مش تائب ؟ ولسه شايل خطاياه على ايديه . طب اقابل ربنا ازاي وانت مذنب ؟ قد غفرت خطاياه الكثيرة ليه ؟ لانها تابة لانها احبت . كل الخطايا بتاعتها اتشالت عقبالنا كلنا .

ولا يتقربون الي بيتكلم .. عن القدام بتوع اليهود ليكهنوا لي ولا للاقتراب شيء من اقداسي الى قدس الاقداس . يبقى ايه الجماعة بتوع زمان اليهود دول ما يقربوش من اقداس العهد الجديد . دي شرحها بولس في اخر العبرانيين لما بيقول لنا مذبح . بيكلم المؤمنين . فبيقول لنا مذبح . ولا سلطان للذين يخدمون المسكن اليهودي اللي لسه يهود . لسه عندهم ذبايح حيوانية . لسه بيدخلوا الهيكل بالممارسات القديمة . لا سلطان لهم ان يأكلوا من مذبحنا .

يبقى احنا عندنا مذبح بس مختلف . اليهودي ما يقربش . وكان زمان في الجيل الاول لانه كان في ناس مختلط عليها فرق اليهود عن المسيحي كان يقف لازم شماس على الباب يتأكد ان اللي داخل ده متعمد ومؤمن لاء يكون يهودي او وثني ما يدخلش . ليه ؟ لان ده قدس الاقداس . لازم يبقى داخل من الباب .. الباب يعني معمودية وايمان وتوبة . بعد كده تقدم تقدموا على هذا الرسم .

يحملون خذيهم ورجساتهم التي فعلوها . خلاص هم ارتضوا يشيلوا خطاياهم على ايديهم يشيلوها . بس هيعملوا ايه ؟ هيدفعوا تمنها ازاي ؟ يتكلم بقى عن العهد الجديد اجعلهم حارسي حراسة البيت لكل خدمة لكل ما يعمل فيه . يبقى كل خدمة في الكنيسة تسمى حراسة . حراسة ليه ؟ المؤتمن على شيء لازم يكون قد الامانة . افرض خادم فصل مدارس احد . ما هو حارس للفصل . العيال دي هيتسأل عليها . هو زي الراعي وعنده خرفان عنده رعية . و كل خروف منهم غالي عند المسيح جدا . اللي ماسك اجتماع ما هو حارس الاجتماع . مسئول عن سلامة التعليم فيه وعن افتقاد الناس للي فيه . اما الكهنة اللاويون ابناء صدوق الذين حرسوا حراسة مقدسي حين ضل عني بنو اسرائيل . اللي ايه دخلت من اليهودية للمسيحية . الصادقين صدوق رمز للصدق دايما . اللي تأكدوا ان المسيح يسوع هو مسي العهد القديم . اللي اتنقلوا من فكر العهد القديم لفكر العهد الجديد بسلاسة ليه ؟ لقوا الانبياء كلهم ينطبق كلامهم على المسيح . فدول حراس العهد الجديد . مالرسل كلهم كانوا يهود في الاسل . يتقدمون الي ليخدموني . يبقى هو رفض حرس العهد القديم اللي هم ايه ؟ كتبة و الفريسين وشيوخ اليهود والصدوقيين و كانوا ضد المسيح دول كلهم . وقبل اليهود المؤمنين يكونوا خميرة العهد الجديد .

ويقفون امامي يقربوا لي الشحم والدم يقول السيد الرب بلغة العهد القديم يعني هم دول اللي يقدموا الذبيحة . اذا في كهنوت جديد في العهد الجديد رئيس الكهنة الاعظم المسيح بنفسه .

 

طب رئيسي الكهنة في العهد القديم بيتغير لانه بيموت رئيس الكهنة في العهد الجديد اتغير ليه ؟ ما بيموتش يظل رئيس الكهنة الاعظم . يوكل عنه ابونا البطرك وابائنا الاساقفة . والكاهن لكن يذل بنفسه رئيس الكهنة الذي لا يموت . عشان كده انت الكاهن الى الابد . تقال على المسيح وحده ومن يأخذ الوكالة عنه يبقى كهنوته يكمل معه في السما . اما هارون لما شرحها القديس بولس في العبرانين قال هارون لازم نلاقي له بديل . الراجل بيموت وعياله بيموتوا . فهنفضل نستبدل كاهن بكاهن بكاهن في العهد القديم . الكهنوت محدود القيمة انما لنا رئيس كهنة عظيم قد اجتاز السماوات بروح اذلي وما بيموتش خلاص يبقى احنا مش محتاجين نلاقي كل شوية رئيس كهنة جديد .

يتقدمون الي ليخدموني ويقفون امامي يقربوا لي الشحم والدم يقول السيد الرب.

برضو نوع من الذبايح في العهد الجديد بننساه طبعا ذبيحتنا العظمى هي جسد المسيح ودمه . لكن احنا نفسنا ذبايح ده فكر العهد الجديد . يعني ايه ؟ قديس بولس يقول قدموا اجسادكم ذبيحة . حية مرضية عند الله عبادتكم العقلية . يعني وانت جاي الكنيسة انت تقدم نفسك ذبيحة بلحمك بشحمك ودمك كده . انت نفسك بقيت ذبيحة يعني ايه ؟ فكرك مذبوح امام الله . قلبك مشاعرك مذبوحة . جسدك بالصيام والصلاة والنسك والزهد . تقدم حياتك كلها على الله . لان ربنا خلاص ما عدش يعني دم التيوس والعجول ده كان رمز . كانت ظلال . انما دلوقتي اللي يعجبه ولاده . قدموا يا ابناء الله يعني قدموا لله يا ابناء الله . ابناء الكباش . يعني اغلى حاجة عندك تقدمه . تجيب مشاعرك وقلبك وعقلك وجسدك . كل ده تقدمه ذبيحة في الصلاة .

هم يدخلون مقدسي ويتقدمون الى مائدتي . يبقى بالرغم انه بيشاور على العهد الجديد لسه فيه مايدة . وده يؤكد ان احنا في العهد الجديد عندنا المايدة . مايدة المقدسة . تعد لى مائدتا قدام تجاه اعدائي . المذبح ده قدام الشياطين ده قوة الكنيسة عليها جسد المسيح و الدم فالشيطان ما يقدرش يقرب ابدا . فاحنا عندنا مائدة مقدسة مستمرة الى مجيء المسيح .

يتقدمون الى مائدتي ليخدموني ويحرسون حراستي . ويكون دخولهم ابواب الدار الداخلية انهم يلبسون ثيابا من كتان .

اللي حضر معنا الشروحات لان احنا من اصحاح واحد واربعين عمالين نشرح هذا الهيكل العجيب اللي ابعاده مختلفة عن الهيكل القديم . واللي كله يعني مجد وكرامة . واللي رجع فيه مجد ربنا وقلنا حزقيال كان العهد الجديد بكنيسة العهد الجديد وشايف السما بحلاوتها . ومزج ده في ده وحطين لنا سبع اصحاحات كده في اخر حزقيال عشان يسوقنا للسما .

فبيقول فيه دار داخلية اللي هي مطرح القدس والاقداس والقدس والحتة دي . كل الناس ممكن تقرب من الدار الداخلية بس المقدسين بس بتوع العهد الجديد . فبيقول الكهنة دول يلبسوا ثيابا من كتان عشان كده احنا نلبس دايما ابيض يعني . ولا يأتي عليهم صوف . الصوف دايما رمز للحيوانات لسه . فسيرة الحيوانات خلاص تقف بقى . عهد جديد . فاحنا ايه الكتان نقاوة و البساطة و اللون الابيض الجميل بتاع السما ده اللي يفرق في كهنوت العهد الجديد .

خدمتهم في ابواب الدار الداخلية ومن داخل يعني ايه ؟

يعني من جوة القلب في خدمة في صلوات حارة في توبة . الحكاية كانت في العهد القديم واخدة شكل ظاهري اكتر . كاهن العهد القديم ما كانش ينفعل في الصلاة . الراجل ماسك السكينة عشان يدبح الدبيحة ويقعد بقى يشتغل مع اللاويين و الشغلة كانت فيه عضلات وفيها حركة كتير ، ما اقدرش اتخيل كاهن العهد القديم بينفعل في الصلاة والحب لا لا ، مافيش غير بقى صموئيل النبي مثلا ولا داود النبي الناس القريبين قوي مليانين بالروح هم اللي حسوا بالحب ده . هنا في العهد الجديد ما فيش بقى لا سكينة ولا حيوانات . احنا قلبنا هو اللي بيتقدم قدام ربنا . فالجو كله من داخل . يعني المشاعر هي اللي بتتحرك والافكار والحب .

ولتكن عصائب من كتان على رؤوسهم يعني ايه ؟

يعني يلبسوا شريطة بيضا كده رمز لتقديس الفكر . يبقى الفكر مقدس وابيض . ولتكن سراويل من كتان على احقاؤهم . يعني فيه نقاوة الجسد الداخلي ونقاوة الفكر . الحكاية الكتان والبياض دي اشارة ان كل حاجة بقت نقية . لا يتنطقون بما يعرق يعني ايه ؟ ما يقعدوش يعرقوا لان العرق ممكن يخليهم يتشتتوا عن الصلاة والتركيز وهكذا . وعند خرجهم للدار الخارجية للشعب الى الدار الخارجية يخلعون ثيابهم التي خدموا بها . يعني منظرهم قدام المسيح مختلف عن منظرهم في الشارع . وتلاحظوا ده طقسنا دلوقتي . يعني احنا نلبس ابيض في جوة الكنيسة . وفي القداسات والاعياد وكده . نطلع بقى نلبس الاسود . لكن هنا ما بنطلعش بلبس الخدمة نمشي في الشارع ليه ؟ دي حاجة خاصة بربنا . فاحنا مخصصين لربنا حتى باللبس بتاعنا . ما كانش ده نظام العهد القديم .

ولا يقدسون الشعب بثيابهم . يعني ايه ؟

 

زي اللي هيطلعوا وسط الناس يعني في التعبير كانه بيشيلوا تراب  الدنيا فما يصحش اللبس الابيض يشيل الحاجات دي . لكن لما يدخلوا عند ربنا يلبسوا بقى التوب الابيض الحلو .

ولا يحلقون رؤوسهم ولا يربون خصلا بل يجزون شعر رؤوسهم جزا . يعني ما يحلقش خالص لان دي كانت عادات كهنة الاوثان . نفس الوقت ما يسبسبش شعره زيادة لئلا تكون فيها ايه نوع من العياء او الاستعراض وكده . يعني تلاحظوا هنا فيه اعتدال فيه شكل كهنوتي اه ما فيش حاجة مبالغ فيها . لا بيتشبه بالدنيا زيادة لانه كهنة الامم كانوا يحلقوا كده يعني على الزيرو يعني . والنزير كان يطلق شعره تماما . هنا تلاحظوا انه سمح بجز الشعر لكن من غير ما يبقى فيه شكل عالمي زيادة او مستفز . ولا يشرب كاهن خمرا عند دخوله الى الدار الداخلية . السبب دى قال بعض الاباء بما ان كل بتوع العهد الجديد خدوا الروح القدس بدل كهنة العهد القديم يبقى بلاش الخمرة للكل . ده احد الافكار اللي بها بنقول يفضل بلاش شرب خمرة لكل شعب الكنيسة . ليه ؟ لان هم يعاملوا معاملة نزير الرب خمرا ومسكرا لا يشرب . لكن بذات الكهنة لانه كان عندهم في بداية كهنوت هارون ولاده الكبار شربوا خمرة ودخلوا يقدموا ذبيحة . فطلعت نار كلتها . وماتوا الاتنين قدام اول مذبحة اتعمل في البرية . فكانت رسالة صعبة جدا ازاي تبقوا بتشربوا وداخلين تقدسوا فمن هنا جت فكرة انه ايه احزروا تماما لان الخمر دايما رمز للخلاعة والتهاون والدلع والاستباحة والسكر ولكل السكة دي .

ولا ياخذون ارملة ولا مطلقة . وما زال طبعا الكلام ده يسري على كهنوت العهد الجديد انك طالما اترسم كاهن لو ربنا سمح مراته تنزل تسافر يعني يبقى ارمل ما يتجوزش تاني . خلاص هو اصبح اب لكل الموجودين فمش معقول اب هيتجوز من بناته . ففي كهنوت العهد الجديد الكاهن لا يتزوج مرة اخرى . ما لوش حق زي اي راجل تاني لو ترم ممكن مثلا يتزوج لأ الكاهن لأ .

بل يتخذون عذارى يعني لما يكون هيبقى هيدخل في الكهنوت طبعا بياخدها  واحدة ما ارتبطتش قبل كده او ارملة التي كانت ارملة كاهن . ده كان نظام العهد القديم . ويرون شعب التمييز بين المقدس و المحلل .

أحد ادوار الكهنوت دايما قديم و جديد انه يعلموا الناس التمييز بين الصح و الاصح ، يعنى ايه اللى مستنية ربنا و اية ممكن يتعمل و ايه لا يجوز انه يتعمل خالص .

ما يليقى و ما لا يليقى . فالتعليم دايما بينبه الناس لما يمشوا دايما بقداسة .

فيقول يرون شعبي التمييزي . بين المقدس والمحلل ويعلمونهم التمييز بين النجس والطهر . وفي الخصام هم يقفون للحكم ويحكمون حسب احكامه .

برضو دي رسالة لكل الخدام بما فيهم احنا ككهنة . ما ينفعش ندخل في حل اي مشكلة بلغة الناس . يعني ايه ؟ ساعات تبقى مشكلة زوجية . مشكلة ورث بين اخوات . مشكلة خدام بيتصارعوا . مشكلة شركة بتتفض . احنا ما بنتكلمش لغة الدنيا . احنا بنقول ربنا قال ايه ؟ وعلمنا ايه ؟ وعلى اساس ده الحل . دي احكام ربنا . ربنا علمنا التسامح علمنا العطاء . علمنا الفلوس تبقى تحت رجلينا . علمنا التواضع . علمنا ما نخسرش انسان ابدا . علمنا الحب الحقيقي اللي يجي على نفسه . دي لغتنا . طبعا ما بتعجبش ناس كتير . في ناس لما تتشاكل تروح للكاهن يقول لهم لازم تحبوا بعض ولازم تسامحوا بعض ولازم تصلوا كويس يسيبوه يمشوا . ويروحوا لحد في الدنيا يقول لك يحل لنا مشاكلنا . طيب هيحل لكم مشاكلكم بطريقة الدنيا . بس كده بقى في الاخر لما تمشوا تروحوا لربنا ما تلاقوش مكان لكم عند ربنا . لان انتم طلبتوا احكام الدنيا . لغة الدنيا . فانتم بما انكم هتحلوا مشاكلكم بطريقة الدنيا خلاص . يبقى انتم اخترتم طريقكم الابدي . حتى لو واحد قال لك الكنيسة ضغطت علي . الكنيسة جت علي . يا حبيبي احنا بنيجي عليك عشان تفضل تبع الكنيسة اللي داخل السما . فبتمشي على كلام ربنا مهما احتملت لانك في الاخر ده الباب الدايق اللي يدخل السما . انما عاوز الباب الواسع والانتقام والشر والفلوس والطمع روح . بس هتروح فين يا حبيبي ؟ على الهلاك . عشان في اليومين دول تكسب مثلا قضية ولا تنتصر لنفسك ولا تبقى خدت حقك عاوز لغة الدنيا ما حدش يمنعك . بس دي مش لغة السما . مش دي طريقة المسيح . اللي علمنا دايما نيجي على نفسنا ونتنازل ونحب ونعمل الخير .

فبيقول في الخصام يقفون للحكم ويحكمون حسب احكامي . يحفظون شرائعي و فرائضى في كل مواسمى ويقدسون سبوتي . هنا السبوت اصبحت تعم الحياة كلها . يعني مثلا اذكر يوم السبت اللي تقدسه . دي عهد قديم . طب في العهد الجديد . خلاص كل الايام تقدست . وبالاولى جدا يوم الحد يوم قيامة المسيح . لكن احنا عايشين كاننا بلغة الزمان سبت دائم . عايشين مع ربنا طول الوقت . نعبد الله قلبا وقالبا طول الاسبوع . فبقينا عايشين فيه فكر جديد لا يقف عند حرف السبت . كان اليهودي في السبت يخاف يحرك حاجة من مكانها . يعد خطواته . وما يطبخوش ابدا مش عارف ايه بس هي الموضوع كان قلبهم بعيد خالص عن ربنا . ربنا عاوزنا حتى لو اضطرينا نروح اشغالنا في قلبنا معه . وعايشين معه طول الوقت .

ولا يدنو من انسان ميت فيتنجس . برضو دي كانت شريعة العهد القديم و ما طبقوهاش بالتزام . يعني ايه ؟ في فكر العهد الجديد ما يشاركوش الميتين . بمعنى فاكرين دع الموتى يدفنون موتاهم ؟ كان يقصد بها ايه المسيح ؟ هل نمتنع ندفن قرايبنا ؟ لأ مقصود عيشة الميتين او الموتى في الخطايا اللي دماغهم في الشهوات . ما نقربش منه لان لو قربنا من الناس اللي حياتها كلها ملزات وشهوات وكلام بطال هنتنجس . فلازم نفصل نفسنا عن هذا عالم الموتى ده اللي حوالينا . عشان نعيش في حياة مقدسة . فلا يتنجسوا بميت .

اما لاب او ام او ابن او ابنة او اخ او اخت لم تكن لرجل يتنجسون هنا بمعنى ايه ؟

لو واحد من كهنة العهد القديم هو بيراجع جزء من الشريعة اللي هم كسروها . لو كاهن من كهنة العهد القديم . لو فيه ميت ما يقدرش يلمسه . لكن الاهل لو لمسوه يقعدوا اسبوع حالة تطهير ما يقدروش يمسكوا حاجة من الاقداس . لكن لو اخو هذا الكاهن او ابنه او ابوه هو مضطر يشارك لانه دي مسئولية لدرجة قرابة اولى . يشارك ويقعد اسبوع ايه ؟ في حالة تطهير . ده كان قانون العهد القديم . وكانه بيؤكد في لغة العهد الجديد انه يظل الكاهن مسئول بدرجة عن العلاقات القريبة . يعني ما ينفعش ان هو ما يبقالوش اي مسئولية تجاه عيلته . برضه عيلته لها درجة قرابة . وبالتالي لها التزامات تجاهه اكتر .

بعد تطهيره يحسب له سبعة ايام . وفي يوم دخوله للقدس الى الدار الداخلية ليخدم في القدس يقرب ذبيحته عن الخطأ . يقول السيد الرب .

يعني فكرة لمس الميت اللي قلنا عليها انه فيه حصل نجاسة . حصل فكر غريب . حصل تلوث روحي . لازم يدخل بالتوبة . الكلام ده علىنا كلنا . في العهد الجديد . افرض انت يعني اتلخبطت في حاجة . والموضوع خطية غريبة عليك . هييجي تتناول كده على طول . مش لازم ذبيحة خطيب . بمعنى ايه ذبيحة الخطية ؟ مش لازم تقرب من المسيح . مش لازم تتوب . مش لازم تسجد مش لازم تعترف . هتدخل كده بالخطايا دي كلها تتجاسر وتلمس الاقداس . لأ . فهنا اعتبر انه اللي لمس الميت له شريعة خاصة اقرب الى طقس توبة . طب ما هو ده اللي احنا محتاجينه كمان في حياتنا .

يكون لهم ميراثا . انا ميراثهم . شوف التعبير الحلو ده . بتوع العهد الجديد كلهم بقى كده . ربنا يقول انا ميراثهم كلمة جميلة قوي . انا ميراثهم . يعني ما يفكروش في الدنيا بقى . ما يقعدوش يقولوا عندنا ارض ايه وشقة ايه وعمارة ايه وعربية ايه وشهادات ايه . انا ميراث . شوفوا لما نفسي اقول لشعبه انا بقيت نصيبكم . عشان كده المعنى الجميل اللي اتكرر في العهد القديم لما يقول نصيبي هو الرب . وحبال المساحة وقعت علي من الاعزاء ونصيبي ثابت لي . ميراثي ثابت لي . ليه ؟ ليه ثابت ؟ لان ربنا . مين ياخد مني ياخدوا العمر ياخدوا الصحة ياخدوا الفلوس ياخدوا هياخدوا اي حاجة . ما كلنا هنسيب كل حاجة . انما يقدروا ياخدوا منك ربنا ازاي ؟ يطلعوا ربنا من قلبك ازاي . حتى لو موتوك ما قدروش يطلعوا ربنا منك . وبالتالي انا ميراثهم . فاللي عايش مدرك لهذا المعنى العميق فعلا الدنيا صغيرة في نظرك . اذا كان ربنا كله معنا . طيب احنا عاوزين ايه من الدنيا ؟ كما يقول القديس بولس بيقول كفقراء ونحن نغني كثيرين . كأن لا شيء لنا ونحن نملك كل شيء . اللي يبص على بولس والفريق اللي معه صعبوا عليه . ما عندكوش كده يعني فلوس ما عندكوش ميراث ؟ يقولوا ما عندناش حاجة . طب ايه ؟ لا احنا معنا ربنا معنا كل حاجة . كاننا لا شيء لنا ونحن نملك كل شيء .

فيقول انا ميراثه ولا تعطوهم ملكا في اسرائيل انا ملكهم . انا ملكهم . يعني ايه ؟ ملكا هنا بمعنى ما يخدوش حتة ارض وينشغلوا فيها . الجماعة اللاويين والخدام والكهنة . لأ . لأ احنا كلنا يهمنا الميراث السماوي . زي ابونا ابراهيم اسحاق ويعقوب كانوا واعيين . انتظروا المدينة التي لها الاساسات . رغم الغنى الفظيع اللي ربنا اداهم له في الارض ما كانوش يشتروا . ولا يفرق معهم . فارق معهم السما . انا ملكهم يأكلون التقدم وذبيحة الخطية وذبيحة الاثم . وكل محرم في اسرائيل يكون له . يعني اللي مش مسموح للناس العادية . مسموح لولاد ربنا المكرسين كلنا مخصصين كلنا خدنا الروح القدس . فاحنا المسيحيين الممسوحين احنا لنا مقدسات هي محرمة على غيرنا . ليه ؟ لان احنا خلاص تبعه احنا ولاده . احنا اعضاء في جسده . فهذا الامتياز يجعل الله ملكنا ونحن ملكه . انا لحبيبي وحبيبي لى . مش عاوز حاجة تانية .

واوائل كل الباكورات جميعها وكل رفيعة من رفائعكم تكون للكهنة وتعطون الكاهن اوائل عجينكم لتحلوا البركة على بيتك . هنا برضه بيكلم لغة عهد قديم بحكم ان هو كاهن عهد قديم فاحنا بنحط عليها معاني العهد الجديد يعني ايه ؟ يعني كل حاجة حلوة في حياتك الباكورة والرفايع يعني اي هدية تيجي لك اي بركة في حياتك بتروح تقدمها لربنا . تجرى على ربنا وتشكره الاول . عاوز تحط كل حاجة في ايدين ربنا . مش عاوز حاجة في جيبك مش عاوز حاجة للدنيا . عاوز كله يتحط في حساب السما .

لا يأكل الكاهن من ميتة ولا من فريسة طيرا كانت او بهيمة . طبعا في الحياة القبلية الهمجية القديمة دي . كانوا ممكن ايه يلاقوا فريسة ميتة كده ياكلوها بدمها او بهيمة مات قطعوها ياكلوها . لأ كل ده طبعا بيعمل وحشية في الناس . يعني اللي فيه لما ياكلوا الحاجة بدمها بيطلع الطبع الوحشي في الانسان . فهنا دي اشارة برضه ايه ؟ ما تنزلش ابدا باخلاقك لمستوى الحاجات الميتة . دي سلوكيات مميتة . تجعلك انسان وحشي تجعلك تفقد التشبه بالمسيح . ما تاكلش الكلام . مخدومة للرب قدسا من الارض . يعني لما ييجي تقسيم الارض كل واحد شاطر يجيب الارض يديها لربنا . اما يجي له اي خير يجري به ويروح لربنا اللي بيوصفها له . حسابات مش بتاعة الدنيا . سايق بالبوصة ولا الدراع برضو قدس بكل تخوم وحواجب . ربنا ياكلها . كريم من يدك .

زي اب يكون عنده طفل ويجي مثلا عيد الام ولا عيد الاب ولا عيد اخوه . يقول له خد الفلوس دي اشتري بها هدية لبابا او ماما او اخوك . طب ما هو مدي له الفلوس يروح يجيب بها هدية ليه ؟ عشان قدام الناس يبقى الصغير ده هو اللي جايب . فربنا بيدينا كتير عشان لما نرجعها له يحطها في حسابنا . يقول يا ترى كل ده انت اللي مديه له يا رب ؟ اه بس محسوبة . ابراهيم ترك . ولما يقول ليس احد ترك ابا او اما او زوجة او كل دي عطايا . هو اللي اداك الاب والام والزوجة والعيال والارض دول . فلما تسيب اللي اداه لك ربنا لا ربنا يشوفها حاجة كبيرة اوي . مع ان هي في الاصل الحقيقة من ايده . فده يخلينا شايفين قد ايه ربنا عاوز يحسب لنا كده ايه حاجات حلوة يقدر لنا مجرد هذا الترك والعطاء .

يكون للقدس من هذا خمسمية في خمسمية مربعة حواليه وخمسون زراع مسرحا له حواليه من هذا القياس تقيس طوله . خمسة وعشرين الف وعرضه عشر تلاف هتلاقوا ارقام كده ايه ما كناش نسمع بها قبل كده قدس من الارض هو يكون للكهنة خدام المقدس المقتربين لخدمة الرب . دي بتفكرني بتعبير المسيح لما قال ياخذون مائة ضعف في هذا الزمن . يعني ايه مائة ضعف ؟ احنا مش داخلين بورصة ولا استسمار طبيعي .

مائة ضعف معناها ايه ؟ طب اللي ساب مثلا  بيت يتفتح له ميت بيت يحبوه مش هياخدهم على الورق يعني . لكن يبقى ميت بيت يقول له ده بيتك . مش كده ؟ واللي يسيب مثلا والديه في الخدمة تلاقي ميت راجل وست كبار في السن يقولوا له ده انت ابننا . ويدوا له محبة الابوين واللي يسيب اخ او اخت يطلع له الف اخ واخت في الخدمة وفي الكنيسة . وانتم كخدام دقتم الحاجات دي . تلاقي ان الدايرة وسعت جدا انت بتسيبه ربنا بيوسع عليك . عطايا بلا عدد . لانه انت مش حتى العلاقات ما هي العلاقات دي ثروة بس العلاقات اللي تتركها من اجل المسيح تتضرب في ميت ضعف . فتلاقي عندك علاقات قوية مع ناس كتيرة قوي بيحبوك ويهتموا بك . رغم انه ايه انت يعني ما دفعتش حاجة .

والخمسة وعشرين الف في الطول وعشر الاف في العرض تكون لللاويين خدام البيت لهم ملكا عشرون مخدعا تجعلون ملك المدينة خمس الاف عرض وخمسة وعشرين الف . يعني ايه ؟ يرتاحوا ياخدوا بزيادة . المكرسين بالذات بياخدوا بزيادة ياخدوا في السماء . مش في الارض . نصيبي هو الرب . فاللي ادى عمره لربنا نصيبة في السما اكبر . حساباته في السما اكتر . ليه ؟ لانه كل ما ده كان بيدي وقت اكتر . مجهود اكبر . فكل اما بيمشي في سكة تكريس وعطاء كل اما الكنز بيزيد .

ولا الرئيس من هنا ومن هناك من تقدمة القدس ومن ملك قدام تقدمة القدس وقدام ملك المدينة من جهة الغرب من جهة الشرق شرقا والطول موازي احد القسمين من تخم الغرب الى تخم الشرق تكون له ارض . يعني هنا بقى ايه ؟ طبعا الرئيس او الملك ده اشارة للمسيح نفسه . فكلما تتشبه بالمسيح الريس والملك تلاقى تخومك و سعة .