تفسير سفر الرؤيا - حـ 6 ✟ الانبا رافائيل فى ها أنا أتى سريعا - شاهد و أقرأ - 📹 📝 - ✔
تفسير سفر الرؤيا
بسم الاب و الأبن و الروح القدس اله واحد امين.
( ها انا اتي سريعا). واحب افكركم من غير ما تزهقوا مني. ان احنا في البرنامج ده بندرس مع بعضينا سفر الرؤية. والهدف بتاعنا هو الاجابة على والتخوفات بتاعة الناس بخصوص نهاية الزمان والمجيء التاني والاختطاف. وآآ لازم نبقى عارفين ان معرفة الامور الالهية معرفة اعلانية. وان احنا معرفتنا من جهات الله واموره محدودة من جهات فاحنا عارفين ان في مجيء تاني. لكن مش عارفين ميعاده. عارفين بعض العلامات لكن في امور غامضة.
سفر الرؤية بتكلم عن المجيء التاني لكن كمان بيتكلم عن مستقبل الكنيسة. من ايام الرسل حتى المجيء التاني. وعن الابدية السعيدة. و بدأنا في دراستنا بالسبع رسائل اللي ارسلها الله الى سبع كنائس موجودين في اسيا. (إفسس – سميرنا – برغاموس – ثياتيرا – ساردس - فيلادلفيا - لاوديكية). وقلنا ان دي كنائس حقيقية لها اماكن جغرافية وكان فيها شعب وفيها اسقف وفيها كهنة. لكن الرسايل مش بس لهذه الاماكن المحدودة. لكن لكل كنيسة وكل قلب. وبعض المفسرين قال ان هي بتمثل عصور متتالية في الكنيسة. لكن ممكن برضو تبقى بتمثل كل كنيسة في كل وقت. كل رسالة بتتكلم الاول عن اسم المدينة. وبعدين السيد المسيح يصف نفسه بوصف مناسب لاحوال الكنيسة دي وبعدين يرسل لهم رسالة مديح وتشجيع. وبعدين رسالة عتاب ودعوة للتوبة. وبعدين في الاخر يختمها بوعد بمكافأة الغالبين. للي يغلب.
اخدنا اربع رسايل من السبعة افسس اللي هي المحب وتمسل عصر الرسل بالاغلب. سميرنا اللي هي المرة ودي عصور الاضطهاد. برغاموس يعني الاقتران وتمسل العصور اللي فيها كان بدع وهرطقات وفيها مجامع. بتناقش الامور الايمانية. وتفرز الصح من الغلط .
وبعدين الاسبوع اللي فات اخدنا كنيسة سياتيرا وقلنا سياترا معناها المسرحية بتشير الى الفترات اللي تبقى فيها الكنيسة مشغولة قوي بالمزاهر اكتر ما تنشغل بالجوهر.
النهارده اكتب ملاك كنيسة التي في ساردس ، ساردس دى كلمة معناها البقية. ودي الاسم نفسه فيه امل. ان مهما الواحد فينا ضعف او بعد او ضل. و شت بعيد. لكن بيبقى فيه بقي لسه جوة قلبه. كتير من الامهات تيجي تشتكي تقول ابني كان وهو صغير حلو اوي بيحب الكنيسة وشماس ومواظب ، وبعدين دخل كده في سن المراهقة ابتدى يبعد. فاقول لها ما تخافيش. اللي اتزرع فيه وهو صغير هينبت. الفترة بتاعة الشتتان دية هتنتهي ويرجع تاني الاصل. فيه بقية مزروعة جوة. وعشان كده مهم جدا ان انتم اطفالكم تربوهم في مخافة الله. وفي جو كنسي كويس وجو اسري دافئ وحلو. يقوم لما يكبروا اللي زرع ينبت. لما بنيجي في مرحلة متوسطة كده بيبقى الواحد فيها لسه مش عارف نفسه.
ما هو سن المراهقة. بيبقى مشتت ما بين النضج وما بين الطفولة. فبنلاحظ انه بقى غريب. مش هو ده ابننا اللي احنا ربناه. ما تخافوش عليهم لان في بقية لسه مزروعة جوة قلبهم.
ملاك الكنيسة التي في ساردس هو كان اسمه القديس ميليتون. وبعدين هنا ربنا بيوصف نفسه { هذا يقوله الذي له سبعة ارواح الله و السبعة الكواكب }. كلمة سبعة ارواح الله جت في الاصحاح الاول. { نعمة لكم وسلام من الكائن والذي كان والذي يأتي ومن السبعة الارواح التي امام عرشه }. رقم سبعة رقم غريب شوية. ليه يعني له اشارات كثيرة في الكتاب المقدس. وفي بعض الارقام كده يعني رقم 40. رقم 12 رقم 70. ومن ضمنهم رقم سبعة لها برضو معنا.
مثلا الزمن متقسم اسابيع. مش دي حاجة برضو تخلي الواحد يقول اشمعنا رقم سبعة؟ ، في مثلا سبع طغمات الكنيسة ، سبع اسرار الكنيسة. فهنا لما يقول سبعة ارواح الله انتم عارفين الروح القدس هو روح واحد. وفي صلواتنا بنقول واحد هو الاب القدوس. واحد هو الابن القدوس . واحد هو الروح القدس .
ليه سميه سبعة ارواح التي امام عرشه؟ ، هنا سبع ارواح اشارة للروح القدس العامل في الكنيسة في السبعة اسرار. سبعة اسرار دي اتشرحت في مزمور بيقول ايه؟ ، { نهرا سواقية تفرح مدينة الله } لحظ تشبيه النهر ماشي كده وفيه سواقى بتفرح المدينة طبعا الماية لما تطلع من الترعة تسقي الارض كأن الارض بتفرح. فالساقية بتطلع نهر ده الروح القدس. السواقي هي السبعة اسرار اللي بتروي الكنيسة فتفرح مدينة الله .
عشان كده سماهم سبعة ارواح الله. اما كلمة السبعة كواكب برضو ورد في الاصحاح الاول كلمة معه في يده اليمنى سبعة كواكب. سبعة كواكب دى هم ملائكة الكنايس. فلما يقول الذي له سبعة ارواح الله يعني الابن له الروح القدس. وله السبعة كواكب يعني الأساقفة بتوع الكنايس دول بتوعه. عامل زي الكلمة اللي جت في سفر النشيد حبيبي لى وانا له. احنا بتوعه. حاجة فخر ان الله يقول فلان ده بتاعي. واحنا نقول له احنا بتوعك يا رب. حبيبي لي وانا له.
في الاصحاح الاول يقول { سبعة الكواكب التي رأيت عن يميني وسبع المناير }. قال السبع كواكب هي ملائكة السبع كنائس. وسبع مناير هي سبع كنايس. يعني نفس سفر الرؤيا فسر الكواكب والمناير.
واتفقنا ان كلمة سبعة ترمز الى كمال الزمان. لان الاسبوع يبدأ بالحد ينتهي بالسبت. السبت دوت اللي هو اليوم السابع. وبعدين نبتدي اسبوع جديد يرمز الى بداية جديدة وزمن جديد او الابدية. الله بقى قال له انا عارف اعمالك. ان لك اسما انك حي وانت ميت. مؤلمة جدا ان ربنا يقول للانسان كده. انت في نظر الناس حي لكن في نظري انت ميت. ودي اقدر اسميها خطية حنانيا وسفيرة. ليه بقى؟ ، حنانيا وسفيرة كانوا عندهم ملك. وبعدين شايفين كل الناس بتبيعي ممتلكاتها وترميها تحت ارجل الرسل من كل قلبهم. فهم فكروا بنفس الفكرة دي. احنا هنعمل زي بقية الناس والا يبقى شكلنا وحش. فاحنا نبيع الحاجة اللي ملكنا بس مش هنحط كل الفلوس عند الرسول . فناخد خلى جزء عندنا ونحط الباقي عند رجليهم. فيبان قدام الناس ان احنا زينا زيهم مش اقل منهم. لكن برضو ما احنا مش مجانين ان احنا نحط كل حاجة هناك. ففي نظر الناس هم ضحوا لكن حقيقة الامر هم كانوا مختلسين. بطرس الرسول سماها اختلاس. وقال لهم الحاجة بتاعتكم كانت تبقى في ملككم. انتم ليه بعتوها؟ وليه لما تبيع تكدب؟ الخطية دي انا شخصيا خايف منها. ليه؟ ، لان ممكن يكون شكلي عند الناس ان انا بوعظ وبعلم. وربنا باصص علي في حاجة تانية. يقول لي لا لا لأ انت لك شكل خارجي غير الحقيقة الداخلية. دي خطية حنانيا يا شفيرة.
شوفوا دي الخطية اللي وقع فيها الكتبة والفارسيون. اسمعوا قول المسيح. { على كرسي موسى. جلس الكتبة والفارسيون فكلما قالوا لكم ان تحفظوه فاحفظوه وافعلوه. ولكن حسب اعمالهم لا تعملوا. لانهم يقولون ولا يفعلون} . الخطية سمجة ، لك اسم انك حي وانت ميت. يقول كل اعمالهم يعملونها لكي تنظرهم الناس. ادي الهدف. وعشان كده { قال لهم ويل لكم يا الكتبة الفرنسيون المراؤون. لانكم تعشرون النعناع والشبسة والكمون. وتركتم اثقل الناموس. الحكم والرحمة والايمان. كان ينبغي ان تعملوا هذه ولا تتركوا تلك }. في نظر الناس ان هم مدققين جدا بيعشروا حتى النعناع والشبت والكمون. لكن في حقيقة الامر تركه اثقل الناموس الحكم والرحمة والايمان. وقال لهم تنقون خارج الكأس والصحفة. وهما من داخل مملوءان اختطافا ودعارة. ( من برة هالله هالله من جوة يعلم الله ). من خارج تظهرون للناس ابرارا ولكنكم من داخل مشحنون رياء واثما. الخطية دي اكتر ناس بيقعوا فيها هم اللي في الكنايس لان ممكن واحد هو سعى ان يكون خادم وبقى من خدام الكنيسة له اسمه انه خادم لكن حقيقة الامر بيخدم نفسه. واحد يشتهي الكهنوت. ويسعى وراه ويمثل على الناس لغاية لما ينال مراده ، كل الناس زكته للاب الاسقف. كل الناس فرحانة به. اول ما ياخد الكهنوت ما بقاش كاهن. شكله الخارجي كاهن لكن حقيقته قدام ربنا يقول لك اسم انك حي وانت ميت. الرهبنة. انا في نظر الناس راهب لكن هل حقيقتي من الداخل راهب .هل فعلا في بتولية حقيقية؟ هل في نسك حقيقي؟ هل في زهد في الدنيا؟ خطية الحقيقة مخيفة. ان الانسان يبقى شكله قدام الناس غير حقيقته امام الله. عشان كده ربنا بيعلمنا ان ما يهمكش كلام الناس. قدام ربنا هو ده اللي هيحكم عليك في الاخر. الله مش هياخد رأي الناس. دايما باقول لكم العبارة دي. في اليوم الاخير ربنا مش هيعمل ( فوتنج ) مش هيعمل تصويت. مش هيقول يا جماعة ايه رأيكم ناخد فلانة? لا. الكارسة ان الواحد يبقى مطمن ان الناس كلها بتحبه والناس كلها بتمدحه. وهو صدق ناس من كتر كلام الناس ومدحهم. ودي ازمة المسؤولين. ممكن واحد يبقى في مركز فيلتف حواليه الناس اللي يحب يمدحه. انت اروع واحد انت قائد معلم انت احسن اسقف. فالواحد من كتر مديح الناس يصدق نفسه. ولو جه واحد قال له انا بس زعلان ان انت عندك الحتة دي غلط يزعل جدا. ازاي انت بتنتقدني؟ ده كل الناس بتمدحني.
عشان كده من الصالح انك لما تكون مسؤول هات جنبك الناس اللى يقولوا لك ده غلط مش الناس اللي سقفوا لك. الناس اللي يقولوا لك لا الحتة دي غلط لان دول هينوروك. لكن لما بتكون بتحب الناس اللي تقعد تقول لك تحت امرك انت اللي كويس انت اللي بتفهم انت انقاذ الله لنا عشان كده ربنا حطك هنا فالواحد بيعمى عن حقيقة نفسه.
ربنا اللي هيقول له لك اسم انك حي وانت ميت. اجتهد انك تخلي جنبك اللي ينبهك لاخطاءك مش اللي بيمدحك على الفاضي والمليان. عشان كده في العدد التاني قال كن ساهرا. وشدد ما بقى الذي هو عتيد ان يموت. لاني لم اجد اعمالا كاملة امام الله. وحشة اوي. الواحد لما يكون ده حكم ربنا. قال لي خلي بالك كن ساهرا دي معناها ايه؟ السهر في الكتاب المقدس مش معناها نصحى بالليل. اللي بيسهر طول الليل هينام طول النهار. لكن يقصد بها ان الانسان يكون مصحصح. من من الحاجات الجميلة في اللغة القبطية. كلمة رويس معناها يسهر. وكلمة اش رويس معناها حريص.
لان هو نفس الفعل . فا ( اش ) دي بتاعة اللي يقدر، يقدر ان يسهر معناها الحريص. كن ساهرا معناها خليك مصحصح. شدد ما بقى يعني صحيح انا في عتاب انك جواك حاجات وحشة. بس انا كمان شايف حاجات كويسة. شدد ما بقى يعني الحتة الحلوة قويها. لاحسن ده عتيد ان يموت. تخيل واحد دخل الغيط بتاعه لقى كل الزرع مضروب بدودة وكله دبلان. لكن في الوسط فيه حاجات كويسة. فيقول له خلي بالك لان دي كمان هتموت. دي كمان هتدبل فابتدي ارعاها. فانا دخلت غيط نفسي لقيت كل حاجة خربانة. بس في الوسط ربنا قال لي في حاجة منورة اهي. خل بالك منها. زي ما ربنا قال قصد مردود لا يقصف وفتيلة مدخنة لا يطفئ. حتى يخرج الحق الى النصر. فزي ما المسيح بيعمل لما يكون قصدة مردودة يبتدي يسندها علشان تقف على حيلها فتبقى مدخنة يبتدي يحوط حواليها عشان تشعلل تاني فده اللي هو ما بقى .
وزي برضو في اشعيا لما قال { شددوا الايادي المسترخية والركب المرتعشة ثبتوها. هوذا الهكم }. اهو ربنا جاي. الانتقام يأتي جاي ينتقم من الشيطان. وينتقم من اعداء الايمان. جزاء الله هو يأتي ويخلصكم. فمهما كنا وحشين لكن شايف جوانا حتة باقية وهو نفسه هينفخ فيها لغاية ما يتشعلل وتزهزه. عشان كده الانسان فينا ما ينخدعش في ذاته. ربنا بيقول كن ساهرا وشدد ما بقى. لان اللي بقى ده عتيد ان يموت لو ما خدتش بالك. ولم اجد اعمالك كاملة امام الله.
لم اجد اعمالك كاملة امام الله نحطها قدام عنينا. لألا نسقط في الكبرياء. اي حد فينا يبص على انجازاته الروحية. او انجازاته الخدمية. انا ساهمت في بناء هذه الكنيسة. انا اجتماع كذا. انا اللي عملت كذا. فربنا يقول له خلي بالك اعمالك مش كاملة قدامي. ولذلك ربنا يسوع المسيح قال ايه؟ متى فعلتم ، كلما امرتم به فقولوا اننا عبيد بطالون. لاننا انما عملنا ما كان يجب علينا. يعني احزر من الاحساس بالانجاز. وان انت عملت اللي ما يتعملش. لان ده هيبقى وحش قدام ربنا. عشان كده يقول له فاذكر كيف اخذت وسمعت واحفظ وتب. كيف اخذت يعني اخذت الايمان واخذت الوزنة خدت الموهبة خدت فرصة خدمة. واحد ربنا اداله فصل في مدارس احد. واحد ربنا اداله يبقى كاهن على كنيسة. واحد ربنا اداله يبقى اسقف على ابرشية. اذكر كيف اخزت. وكيف سمعت ، سمعت الايمان واستلمت من ابائك القديسين. احفظ احفظ ما اخزته وما سمعت وتب. تب هنا معناها ارجع لربنا. لان احيانا احنا خلي بالكم. في البداية عندنا حماس روحي متوهجين قوي وبعدين نبتدي نبرد. ( وحشة ) ان داخل الدير يترهبن بيبقى عنده حماس. شويتين تلاقيه كسلان. اللي داخل في الكهنوت ينزل بقى كده هيسوي الهوايل. وبعدين شويتين نلاقي ذي الباقي اللي داخل الخدمة حاسس بالنشاط والحيوية وبعدين يعتاد. اللي بدأ حياة روحية بادئ بنشاط وحماس. شويتين يكسل. اللي ابتدى صيام. شوفوا ياما احنا في بدايات الصيام الكبير ولا غيره. يبقى عندنا شعلة نار كده. وبعدين شويتين تبرد. فربنا يحب ان احنا نبتدي يحب ان احنا نستمر. عشان كده قال احفظ الكتب .
فيان لم تسهر ان ما كنتش حريص. اقدم عليك كلص. طبعا اقدم عليك دي ممكن يكون المجيء التاني. كلصت معناها في ميعاد لا تعلم اي ساعة اقدم عليك. ما حدش يعرف الميعاد. او الموت. ما هو الواحد ممكن هو قاعد يتكلم. روحه تطلع. فربنا بيقول خليك حريص لانك ما تعرفش امتى هييجي. لانكم زي ما قال معلمنا بولس في تسالونيكى الاولى. { انتم تعلمون بالتحقيق ان يوم رب كلص في الليل هكذا يجيء. لانه حينما يقولون سلام وامان حينئذ يفاجئهم بهلاك بغتة كالمخاض للحبلى فلا ينجون }.
فالواحد يبقى حريص دايما لان ما نعرفش امتى هييجي ربنا يسترد الوديعة بتاعته زي ما بنقول. سيأتي قليص في الليل يوم الرب. الذي فيه تزول السماوات بضجيج وتنحل العناصر محترقة. وتحترق الارض والمصنوعات التي فيها.
فالواحد دايما يبقى واخد باله ودايما حايص. يعني في بعض اماكن الدراسة معاهد او كورسات او حاجة زي كده. ممكن الاستاذ يفاجئ الطلبة اللي هم طلع ورقة خد السؤال ده جاوب دلوقتي. طب انت ما قلتلناش ان في امتحان. يقول لا تكونوا دايما في حالة استعداد دايما دايما في حالة استعداد. انت عارف زي ايه؟ دكتور جا له مريض. حاجة اول مرة يشوفها. ما يقولش انا ما ذاكرتش. انت لازم تذاكر. لازم تبقى فاهم. لازم تبقى مستعد لمواجهة اي طوارئ. احنا دايما نكون جاهزين. بيعجبوني الشباب اللي في الكشافة عشان ما عندهمش شعار اللي هو ايه نكون مستعدا. يكون دايما مستعد لخدمة الناس. فحط قدامكم الشعار ده كن مستعدا. مستعد للقاء الهي. اي وقت ييجي نبقى فرحانين. نستقبله بفرح مش برعب. لان الانسان المستعد هيبقى ناجح.
يكمل يقول له { عندك اسماء قليلة في ساردس. لم ينجسوا ثيابهم }. يا بختهم. الثياب هنا يقصد بها الجسد. لان الروح لابسة جسد. فالجسد ده هو الثياب بتاعتنا. ففي ناس اسماء قليلة في ساردس . هنا معناها برضو البقية. ما هي كلمة سردس قلنا معناها البقية. لو هتطبقها على قلبك يبقى جوة حاجات كويسة كده ربنا شايف ان هي لسه منورة. لم ينجسوا ثيابهم فسيمشون معي في ثياب بيض لانهم يستحقون. كلمة بيض جمع ابيض يعني. في ثياب بيض. والثوب الابيض يرمز للنقاوة. ويرمز للطهارة. يا بخت الانسان الذي لم ينجس جسده.
تقوللي طب انا ضعت. انا خلاص ما ينطبقش علي. النص الجميل ده. انا نجست ثيابي. نقول لأ. هو الواحد فينا لو هدومه اتوسخت هيعمل ايه؟ هيغسلها. لما تتغسل وتطلع جديدة ونضيفة. تخيل بقى هدومي اتغسلت واتكوت وبقت زي الفل. طيب ازا كنا احنا بنعرف ننضف اه الاثياب بتاعتنا. الله مش عارف ينضف اجسادنا. فالله يستطيع ان هو يخرج من الاكل اكله من الجاف يخرج حلاوة. امبارح الكنيسة كلها احتفلت بعيد القديس انبا موسى القوي الاسود. وده عاش حياته كلها قبل التوبة يعني في الشر. قاطع الطريق لكن التوبة غسلته بنقول في المديحة بتاعته التوبة لها مفعول تجعل الزاني بتول والمتمرد مقبول. فالتوبة تطهر الانسان. واذا كان النهاردة بيستطيعوا ان هم يعملوا ( ريسيكلنج يعني انا عندي جهاز باص بياخدوه يحطوه في المكنة يطلع جديد. عندنا البلاستيكات اللي بتترمي ده اللي بتاعة الماية وغيره. ياخدوها يحطوها في المكنة تطلع من جديد ) .
فاذا كان العالم بيعرف يعمل اعادة تدوير الاشياء. الله مش هينضفني ويعمل لي ويطلعني انسان جديد. بصوا لازم يكون عندنا هذا الرجاء. واقول له يا رب انا نفسي تقدسني وتطهرني. الناس بقى اللي هم يعيشوا في النقاوة دية فيمشون معي في ثياب بيض لانهم مستحقون. ودي نقراها في رؤيا سبعة. شوفوا الوصف الجميل. يقول بعد هذا نظرت. واذا جمع كثير لم يستطع احد ان يعده. عدد كبير. من كل الامم والقبائل والشعوب والالسنة. واقفون امام العرش وامام الخروف. متسربلين بثياب بيض. ادي المنظر. وفي ايديهم سعف النخل. سعف النخل علامة النصرة. لما كان زمان لما يرجع الجيش منتصر يرجعوا كل واحد معه سعف في النخل.
وهم يصرخون بصوت عظيم قائلين ادي التسبيح اللي في السما بقى. الخلاص لالهنا الجالس على العرش وللخروف. جلس على العرش ده الاب والخروف ده رمز للابن لان هو الذي ذبح من اجل حياة العالم. من يغلب ذلك سيلبس ثيابا بيضا. الوعد هنا اللي يغلب يا بخت اللي يغلب. هيلبس ثياب البيض علامة النصرة والنقاوة. ولن امحو واسمه من سفر الحياة. ركز معي بقى لن امحو اسمه ده يعني ايه؟ يعني الاسم مكتوب. وكان على وشك انه يتمسح. بس ربنا اصدر امره. لا لا ما تمسحوش اسمه. الله! يعني فيه ناس بعد ما اسمهم يتكتب هيتمسح انتبهوا لدي بقى. لان فيه بعض العقائد المنحرفة يقولوا ضمان الملكوت وعدم هلاك المؤمن ، ان الانسان اللي امن بالمسيح داخل داخل وانه لو اخطأ الله يؤدبه على الارض لكن ما يحرموش من دخول السما ودي عقيدة مريحة في الحقيقة عشان كده الناس بيجروا عليها. عقيدة لطيفة قوي يعني الواحد انا امنت بك يا رب يا خلاص انا السما. فانا مش عايز هم حاجة. اعيش بقى حياتي فرحان ومزقطط ولا عيل هم توبة ولا عيل هم حاجة. اه لو غلطت ربنا هيأدبني على الارض يؤدبني. ما المهم ان انا ادخل السماء . فبقت الحكاية رخيصة قوي.
فيه صليب ولا فيه باب ضيق ولا فيه اجتهد ولا فيه اللي يصبر لمنتهى ولا فيه اي حاجة الدنيا جميلة. عشان كده تلاقي العقائد دي بابها واسع وناس كتير تروح. لكن لما تيجي للكتاب المقدس لأ لأ ما قلش كده. ده قال عشان تدخل لازم تغلب. يعني فيه صراع طب انا ربنا هيسيبني اصارع? لا هيسندني هيسندني ويرفعني على الازرع الابدية ما تخافش ما تخافش. بس هو فيه حاجتين حاجة من عند ربنا حاجة من عندي. بتاعة ربنا دي اسمها النعمة وبتاعتي انا اسمها الجهاد. الاتنين ماشيين مع بعض. في الاخر ربنا يقول لك انت غلبت. اقول له يا رب انت عارف البير وغطاه انت عارف ان انت اللي غلبت في. و قال ثقوا انا قد غلبت العالم. يقول لي انا عارف ان انا اللي غلبت لك. بس انا حسبتها لك. انت اللي غلبت. انت اللي انتصرت. اللي يغلب بقى هلبسه ثياب بيض ولن امحه اسمها سفر الحياة.
طب ايه رأيكم لو احنا خدنا النص ده وحطينا من لا يغلب. من لا يغلب فذلك لن يلبس ثياب بيض وهمحو اسم من سفر الحياة. عشان كده اسمعوا لما ربنا يسوع بيقول في يوحنا 15 ، كل غصن في لا يأتي بثمر ينزعه. يعني الواحد ما يبقاش نايم في العسل ومفكر ان خلاص ضمن الملكوت. فهعيش بمزاجي. ربنا بيقول ده غصن فيا. مش واحد لسه هيآمن ولا واحد بعيد ده بقى غصن فيا بس لم يأتي بثمر ينزعه. يقول ان كان احد لا يثبت في يطرح خارجا كالغصن. وبعدين فيجف ويجمعونه ويطرحونه في النار فيحترق. شيء مزعج. عشان كده لازم نثبت فالمسيح ، اثبتوا فيا طب نثبة ، قال من يأكل جسده و يشرب دمى وده اللي خلى بولس الرسول يقول ايه { اقمع جسدي واستعبده حتى بعدما كرزت للاخرين لا اصير انا نفسي مرفوضا } .
بولس عظيم يقول على نفسه انا خايف انا نفسي في الاخر ابقى مرفوض. اقول له انت قلقان على ابديتك؟ يقول اه طبعا. لازم الواحد يبقى عينيه في وسط دماغه. علشان يثبت الى المنتهى. انت عارف زي الجماعة اللي بيدخل سبق. كانوا جايبين من عدة ايام فيديو صغير. مسابقة جري. اول واحد خلاص قدام عينيه نهاية السبق وهو اللي هيفوز. راح ملتفت للناس وحياهم فرحان ان هو وصل. فكان اللي بعده على طول سبقه ودخل. وكاتبين كده على الفيديو لا تحتفل قبل الفوز. لان هو لما انشغل بالناس وفرح بشبابه ان هو وصل خطوته بقت بطيئة. فاللي بعده سبقه. فاحنا في سبق ، بولس الرسول شرحها انها سبق وان احنا في حلبة في جهاد ضد الشيطان. وقال لنا سحابة من الشهود. محيطة بنا. ولازم نجاهد الى اقصى حد. قال جاهدت الجهاد الحسن اكملت سعي حفظت الايمان.
القديس اغسطينوس له قول جميل جدا بيقول انا لست افضل من السماء فقد سقط منها ملائكة. ساعتها بقى النص الطويل قال ايه
( انا مش احسن من ابراهيم اللي كان في بيته اسماعيل واسحاق. انا مش احسن من اسحاق اللي كان في بيته يعقوب وعيسى. انا مش احسن من يعقوب اللي كان في بيته راؤوبين اللي دنس فراش ابيه. انا مش احسن من داود اللي في بيته كان في ابن اعتدى على اخته. انا مش احسن من السما اللي فيها ملايكة سقطوا ). عشان كده يبقى الانسان دايما حريص الى منتهى الايام.
وبعدين ختم الرسالة ملاك كنيسة ساردس. لما قال من يغلب فذلك سيلبس ثيابا بيضا ولن امحو اسمه من سفر الحياة وساعترف باسمه امام ابي وامام ملائكته. فساعترف باسمه زي ما المسيح قال كل من اعترف بي قدام الناس يعترف به ابن الانسان قدام ملائكة الله. ومن انكرني قدام الناس ينكر قدام ملائكة الله. طبعا من انكرني قدام الناس؟ داخل فيها كمان واحد امن بالمسيح لكن انكره. زي بطرس ده بطرس لحق نفسه بانه خرج خارجا وبكى بكاء مرا. انت عارف لو ما عملش كده كان هيضيع ذي يهوذا. دايما احنا قدامنا باب حلو ندخل منه بس الشيطان يعمل لنا حفرة عشان نقع قبل ما ندخل. فالواحد يقول له يا رب انقذني ربنا ينقذه. لكن لو انا أطمنة طمأنينة مزيفة اضيع. ولو اترعبت يبقى انا مش فاهم ربنا الحلو الجميل اللي عايز يقدمني للابدية السعيدة. فيبقى عندنا الحرص وعندنا الطمأنينة. دايما باشبهها ذي الطلبة اللي في امتحانات. - ربنا يساعدهم بتوع السانوية العامة وغيره -. لو هو مرعوب هيضيع. لو هو مطمن بزيادة هيضيع نفسه. لكن لما يكون عنده الرجاء هينجح. الرجاء ده بيشجعه انه يذاكر. مش انه يطمئن يذاكر. وطول ما هو بيذاكر احنا كمان نساعده ونشجعه. ونصلي له. ولما بيدخل الامتحان بيبقى مهتم جدا وقعد حريص على كل كلمة بيكتبها. ولما يرجع نقول له عملت ايه؟ ونبقى فرحانين ان هو انجز. وفي الاخر نفرح بنجاح وتفوق.
احنا كده خلصنا كنيسة ساردس
تفسير سفر الرؤيا
ladlamp
يسعدنا ان نقدم لكم كل ما يخص المحتوى القبطى باستمرار – كما نتمنى منكم دعمنا و تشجيعكم لنا من خلال مشاركتكم و تعليقاتكم على محتوى موقعنا – حتى نستطيع تقديم المزيد بشكل مستمر
فتابعونا دائما على [ ladlamp.com ]
شاهد أيضا على : ladlamp2
