تفسير سفر حزقيال – أبونا داود لمعى ـ [3.11.2020 ] ✟ الأصحاح 48 و ختام السفر – شاهد و أقرأ – 📹 📝 – ✔

بسم الأب و الأبن و الروح القدس أله واحد أمين

 

مراجعة : -

حزقيال اسم معناه الله يقوي . زي دانيال الله يا دين زي اشعياء الله يخلص . حزقيال تنبأ في مراحل السبي . هو زمنيا سبي بعد دانيال لكن الاتنين اثناء سبي بابل اللي كان تنبأ عنه ارميا النبي فكان حزقيال ده تلميذ ارميا .

ودانيال استقر في العاصمة . وخد مكانة كبيرة كوزير وبعدين رئيس وزراء ، انما حزقيال قعد في منطقة تانية اسمها تل ابيب عند نهر خابور . وما كانش له مكانة في السياسة هناك . او يعني ما خدش منصب . لكن الاتنين كانوا بيحاولوا مع الشعب . دانيال بينما دوره الاساسي كان تجاه الملك والقيادات الكبار . وبامانته صومه وصلاته عمل كرازة للعالم كله . حزقيال كان همه اكتر في توبة شعبه . كان مركز مع اليهود المسبيين اللي حواليه عشان يرجعوا لربنا ويتوبوا . انما عموما ابقى افكركم بقاعدة قلناها كتير ان كل كتب الانبياء أشعياء وارميا وحزقيال ودانيال وهوشع ويؤيل وعاموس وعوبيديا كل دول . بيتكلموا فى التوبة .

فاي كتاب من السبعتاشر كتاب الاخارة بتوع العهد القديم . تبحث لي عن رسايل توبة . لانه كان الازمة الكبيرة من بعد داوود الملك . الشعب اليهودي زاغ عن ربنا وعند و يستبيح خطايا كتيرة وقلد الشعوب الوثنية . فكان الانبياء دايما يدعوهم للتوبة . ان كان بحياتهم او برسايلهم بنبوءاتهم وهكذا .

حزقيال بنقول عليه صعب شوية ليه ؟ لانه مليان رؤى . والرؤى عموما في تفسيرها احيانا يبقى فيها بعض الالغاز . زى سفر الرؤيا . انما حزقيال لو هتدرسوه تاني مع نفسكم ركزوا على رسايل توبة هتلاقوها كتير قوي . وركزوا على رسايل رجاء . رغم ان هو بيتوب الناس . انما جزء كبير من رسايل حزقيال مرتبطة بالعهد الجديد ومجد العهد الجديد وكنيسة العهد الجديد . والخلاص اللي المسيح جاي يعمله والسما اللي مستنيانا والمجيء التاني كل ده مذكور في حزقيال. فكأنه هو نظر الى سوء حال اليهود وخطاياهم مش قادر ينسى المنظر الاخراني بتاع السما والمفديين وهكذا . ودي مهمة قوي لاي خادم انه مهما كان شايف الواقع المؤسف ينساش عمل الله والنعمة والنتيجة النهائية ان ربنا له ناس في كل جيل يخلصه .

حزقيال كمان من اكتر الناس اللي شافت السما في مجدها . يعني نستغرب انه في العهد القديم لكن شاف الاربع كائن غير المتجسدين بالتفصيل . اللي وصفهم يوحنا الرائي لكن وصف حزقيال اكثر استفاضة . من يوحنا الرائي ومن اشعيا دول اكتر تلاتة شافوا العرش الالهي . فشرحوا حزقيال واحد و حزقيال عشرة . شكل مجيد جدا . وبالمناسبة كلمة مجد الرب بتيجي عشرات المرات فان مجد الرب هو الموضوع اللي شاغل حزقيال لان ربنا ممجد الى الابد ما بيغلطش في احكامه ابدا .

برضو اقول لكم حزقيال خد لقب يا ابن ادم . يعني جت تقريبا مية مرة . ربنا كل اما يقول للناس حاجة يقول لهم قولي يا حزقيال يبقى كلمة الرب الى حزقيال قائلا يا ابن ادم ويبتدي جملة . ايه حكاية يا ابن ادم دي ما كنش بيقولها كتير لبقية الانبياء . بياخدوها الاباء ان كلنا نبقى مطرح حزقيال. يبقى الكلام لي . بني ادم برضه . ولانه هيشوف مجد عظيم جدا عاوز يفكره بضعفه . يقول له انت برضو ابن ادم . لكن ادم حرمنا من المجد بخطيته والمسيح استعاد المجد بعطيته .

فاول اصحاح بيفرجنا عن مجد السماويات والعرش الالهي وبعدين اصحاح اتنين وتلاتة الدعوة ، دعوة حزقيال لبداية الخدمة . يقابلها مثلا ارميا واحد واتنين يقابلها اشعياء ستة يقابلها بداية دعوة اي نبي بتبقى لها كده ظروف خاصة . و غالبا دعوة اي شخص للرسالة بيبقى فيها لمسة الهية . يعني ربنا بيكلمه وهو بيخاف ويقول له انا ما اقدرش على الشغلة دي . فيقوم ربنا يلمسه . اللمسة دي اشارة للتجسد واشارة للنعمة . انت مش هتشتغل لوحدك . ربنا هيشتغل بك .

فحزقيال شاف المسيح كذا مرة اثناء الرؤى وخد اللمسة الالهية دي وفتح بقه وبقى ربنا يحط الكلام في بقه حط كده عشان يقول له كل ما تاكل الكلام كل ما تعرف تروح وتقول للناس ايه اللي هيحصل . وبعدين قال له بص انت هتقول لكن الناس مش تسمعك . فيعني ما تتخضش . انا من الاول بعرفك بس . انت هتروح وهتقول لكن ما تفتكرش الناس ايه هتخاف زي ما انت فاكر كده . للاسف قلبهم زي الماس اكتر من الحجر الجرانيت . فهم مش عاوزين يسمعوا . لكن يبقوا عارف ان ربنا بعت لهم نبي . ويبقى عارفين ان ربنا افتقدهم برسايله . تابوا او ما تابوش دي بتاعتهم . انت تعمل دورك لكن من الاول باقول لك الغالبية مش هتسمع .

هو طبعا هو كل اما يستقبل رسالة قلبه لان كتير من الرسايل كان فيها دينونة للشعب . كانت نبوءات عن اكتمال السبي وخرابه أورشليم خالص . ونبوءات عن غضب الله على الشر وغضب الله على الرعاة . الاشرار . فكتير من النبوءات اللي تنبأ بها حزقيال كانت بتوجعه . والاقرب له هنا ارميا نبي ، النبي الباكي لان كتير من اللي كان بيقوله كان بيطلع من قلبه بمرارة لانه ما يتمناش لشعبه الهلاك .

احنا قلنا دانيال طلع في فوج من المسبيين و حزقيال طلع بعديه تقريبا بتسع سنين . بعدها بكذا سنة  انهارت اورشليم خالص على يد البابلين . فهو تنبأ في الاصحاحات الاولى عن الخراب ده . اللي هيحصل ده . وكان سنه تقريبا يعتقد خمسة وعشرين سنة . لما سبي وبدأ النبوءة تلاتين سنة . حتى ان العلامة اوريجنوس بيحطه في مقارنة مع المسيح . لما بدأ خدمته تلاتين سنة كانت اول نبوءات حزقيال تقريبا في سن التلاتين .

حزقيال من ضمن ما تنبأ عمل كده حاجة اسمها باللبنة يعني زي ما كات كده الاورشليم وقعدوا قدامه كذا يوم . عشان كل اللي يعدي يقول له قاعد كده ليه ؟ يقول له عشان ده الحصار بتاعه اورشليم لازم الناس تصلي وتصرخ لان ايه في حصار هيحصل على اورشليم . برضو ما خدوش على كلامه لكن ده اللي حصل .

و حزقيال اتعلم الصوم زي ما احنا بنصوم كده الفول والعدس والقمح و فضل بالسنين صيام نباتي ودي احد الادلة على ان احنا لما نصوم نمتنع عن الاكل ولما ناكل ناكل اكل نباتي لان حزقيال اللي ربنا قال له اعمل كده .

بعد كده لقيناه مثلا من ضمن الرؤى انا باحكي لكم حزقيال كده مراجعة للسبعة واربعين اصجاح فخليكم ايه مركزين . لقيناه قال له احلق خالص ووزع شعرك ده تلاتة . تلت هيروح في السيف وتلت في الوبأ وتلت في النار . او في المجاعة . فكان الشيء صعب . قال له ده اللي هيحصل مع شعبك . ان كانوا لزقين فيا زي شعر راسك لازق فيك . للاسف بسبب خطيتهم هيروح تلتهم في السيف وتلتهم في الوباء . وتلتهم هيروح في الجوع .

من ضمن كمان ان النبوءات على خراب اورشليم . انه كتير ما اتكلم عن كبرياء اليهود . وضح لنا ان الكبرياء ده اساس كل الخطايا . لان هو اللي بيخلي القلب عنيد والقلب قاسي . فما بيستقبلش صوت ربنا . ويفضل المكابر ده شايف نفسه كويس والناس كلها غلط لغاية ما يهلك . فده كان شعب اليهود ينطبق عليهم الحكاية دي .

وصف كمان الرجاسات او النجاسات اللي زادت اوي . ازاي بيعبدوا اوثان حتى جوة اورشاليم بعد السبي . وكتير من اللي في اورشليم بقايا السبي ما زالوا بيعبدوا الاوثان رغم التأديب . ودي اتكلمنا فيها زمان ازاي ربنا يأدب الناس وبعد كده بدل ما الناس تخاف مع التأديب وترجع ساعات يزداد العند او تأويل الاحداث وكأن ربنا مش في الصورة والناس تكابر وتكمل في الغلط .

جم مجموعة كده قال يعني قالوا حزقيال هم عارفين انه نبي بيتكلم كلام ربنا . قال له انت فاكر دول جايين يسألوك بجد عشان للمنفعة ؟ تعال افرجك بيعملوا ايه من وراك ؟ وكشف له اسرار ان اللي جايين يسألوه دول يقدموا ذبايح للاوسان ويعلموا الناس الخطية . بس جايين قال يعني يعملوا نفسهم متدينين ويستفسروا من حزقيال

بعد كمية نبوءات كده حزينة جينا في حزقيال عشرة رجعوا تاني يتفرج على مجد السما . وفرجوا ازاي العرش الالهي حواليه لاربع كائنات غير المتجسدين وربوات الملايكة وتسبيح دائم . وقال له ده نصيب الابرار . هيبقوا حوالين العرش الالهي ده . لكن هو لاحظ بقى ان مجد الرب يفارق وسليم . فكان حزين جدا لانه شاف النور اللي كان على اورشليم الارضية انتقل وظلمت اورشليم .

فده برضو كان اشارة واضحة ان ربنا هيرفض اليهود في النهاية ، نهاية العهد القديم . هو ده بيتكم يترك لكم خرابا . وبعد شوية ادى له رجاء ان النور هيرجع بس على هيكل جديد . في اخر السفر . اللي هو هيكل العهد الجديد وكنيسة العهد الجديد و الحياة الابدية .

من ضمن النبوءات اللي شافها حزقيال انه شاف الانبياء الكذبة والنبيات الكاذبات اللي بيضللوا الشعب . وازاي ربنا هيحاسبهم حساب صعب اوي لان المضلل اكتر من الضال . اللي بيلخبط الناس عقبه اصعب كتير من الناس اللي اتلخبطت . وان الناس مستهويها الكلام بتاع اللخبطة دي ومش عاوزين يسمعوا كلام عن التوبة . وده في كل جيل . ما تحصل مشاكل و حد يتكلم عن التوبة تلاقي الناس تقول له ليه النغمة دي وليه الكلام ده ؟ ما احنا كويسين نفسر بطريقة تانية لكن اي تفسير يقول ان الناس وحشة ومحتاجة تتوب تلاقي الناس مش مستحملين . فحزقيال اربعتاشر تستغربوا انه ذكر تلات قديس كبار لهم مكانة عند ربنا كبيرة اوي . نوح ودانيال وايوب . طبعا نوح وايوب كانوا مشيوا دانيال كان موجود لسه . لكن كان معروف ان دانيال دا لا يقل عظمة عن نوح وايوب . قال له رغم غلاوة التلاتة دول حتى لو صلوا للناس والناس ما بتوبش ما فيش فايدة . فربنا عاوز يقول له في ناس بتصلي وفي ناس غاليين علي قوي لكن في الاخر التوبة قرار شخصي . عشان كده اما نقول في ناس  تحب القديسين ايوة حب القديسين ما يعطلكش عن التوبة . او بتحب ابو سيفين روح توب لو بتحب ماري مينا روح توب . لكن ما تقعدش تبقى بتحب القديسين وانت مكمل في الغلط . وتتصور ان القديسين يكفي معرفتهم لخلاصك . لا القديسين دول لازم نعمل زيهم . ونقلدهم . ولو تشبهنا بهم يبقى ناخد نصيب معه

حزقيال 16 كان عندنا اصحاح كده نادر او يعني مميز جدا في الكتاب المقدس كله . عن قصة البشرية مع المسيح . كفتاة كلقيطة مشوهة لا تمن لها ولا قيمة لها عملها ملكها .

نضفها وغسلها ولبسها وسترها وكبرها وبعدين اعتبرها ملكة راحت خانته . ودي قصة البشرية او بالذات شعب اليهودي . وفي اخر الاصحاح ده مستني شعبي يرجع . رغم كل الاهانات اللي عملوها في ربنا . فتذكر الرؤى بتاعة حزقيال ان شعب بابل عامل زي النسر وشعب مصر عامل زي نسر تاني وعمالين يلعبوا باورشليم . لان اورشليم بعدت عن ربنا فاصبحت فريسة للشعوب الوثنية .

اصبح 18 علمنا مبدأ جديد قال لنا بطلوا تقولوا المثل البلدي بتاعكم اكل الاباء الحصرم واسنان الابناء درست . لان ده بيخليكم الفاكرين ان ربنا ظالم يعملوها الكبار ويرفعوا تمنها الصغيرين لأ . كل واحد يحمل حمل نفسه . الاب لا يموت بذنب ابنه . والابن لا يموت بذنب فهنا فسر لنا انه ما حدش يقول اكمن الاباء كانوا وحشين ادينا احنا ايه حالتنا كده ، هو الاباء كانوا وحشين دفعوا التمن واحنا لو ما كناش كويسين وتائبين برضه في عقاب ينتظرنا . وهنا قال لهم انتم طرقكم غير مستقيمه انتم بدل ما تتوبوا عمالين تدوروا على حجج عشان تقولوا التأديب ده اصله بسبب غلطات الاجيال اللي قبلنا . طب وانتم ؟ لو انتم مش غلطانين كان ليه جه التأديب عليكم ؟

من ضمن الرؤى اللي شافها حزقيال انه بدأ يتنبأ على الشعوب المحيطة به . بني عامون وصور ودمشق واه اورشليم ضمنيا . ومصر وكل البلاد دي كانت وثنية وكانت بتاكل في شعب الله . فقال لهم كل دول لهم حساب مع ربنا . هو مش ان ربنا يأدب شعبه انه يغفل عن عقاب الاشرار . لأ . هو بيأدب شعبه عشان يرجعوا له . لكن اللي واخدين في وشهم الشر طبعهم دول حسابهم عسير قوي . وربنا لو سكت شوية مش بيسكت على طول . وله حساب شديد مع كل الامم .

كمان نلاقي انه مع ذكر صور بالذات الاباء قالوا ده كان بيتكلم عن سقوط الشيطان مشبها اياه بمالك صور اللي حب يعمل فيها ربنا ويقعد في مجلس الالهة وقال انا اله وقال له انت فاكر نفسك مين ؟ انت مخلوق في الاول وفي الاخر وحسابه الصعب اوي رغم انه كان كروب . فهنا حزقيال بالروح القدس وصف لنا كيف سقط الشيطان قبل خلقة البشر . قال له كنت الكروب المنبسط المظلل . واقمتك وبعد ان كنت كامل في طرقك . حتى وجد فيك اثم . فكأن حزقيال عرفنا القصة ما كنش البشرية دريانة بتفاصيلها . كيف سقط هذا الملاك المطوب بالكروب . وبقى رئيس شياطين .

تتوالى النبوءات بسقوط البلاد الوثنية وتأديب شعب الله وبعدين نوصل مثلا لتوبيخ الرعاة . اصحاح مشهور اربعة وتلاتين ان رعاة اسرائيل هم اللي اساؤوا وهم علموا الناس الغلط وكانوا قدوة سيئة جدا . وان ربنا له حساب عسير لكن مع الاخبار بييجي خبر حلو ان المسيح يقول انا هاجي ارعاهم بنفسي . فتبان نبوءة صريحة ان المسيح يعلن انه سيأتي ويكون الراعي الصالح . بنفسه . فيبقى احد القابه اللي جاية من حزقيال وقالها يوحنا بالتفصيل الراعي الصالح . ويوصف نفسه بداوود فيقول هنرجع لهم داوود بقى الحقيقي . يبقى داوود القديم دا كان راعي كويس لكن داوود الحقيقي هو رب المجد يسوع في العهد الجديد الراعي الصالح .

تيجي كمان وسط الاخبار المفزعة بالتأديبات وهلاك الاشرار ييجي اخبار حلوة قوي للتائبين . فنلاقي مثلا في ستة وتلاتين يقول ايه ؟ ارش عليكم ماء طاهرا تطهرون . واعطيكم قلبا جديدا و اجعل روحا جديدا في داخلكم وانزع قلب الحجر من لحمكم . اعطيكم قلب لحم اجعل روحي في داخلكم  واجعلكم تسلكون في فرائضى . يبقى هنا كلها اخبار عن العهد الجديد . فيه قلب جديد فيه روح جديد وان نشيل القلب حجر ده ونحط قلب لحم . وكلها نبوءات دقيقة على العهد الجديد .

أصحاح 37 لو انتم فاكرين من اجمل اصحاحات العهد القديم اللي بيصور لنا بدقة ماذا سيحدث يوم القيامة . لان النبوءات مش بس بتقول لنا المسيح جاي انت بتقول لنا المسيح جاي وجاي ليه وهيعمل ايه وجاي تاني وهيحصل ايه . فالنبوءات عموما تتكلم عن المجيء الاول وتتكلم ايضا عن المجيء التاني . يعني دانيال شاف المسيح جاي على السحاب . يوم المجيء التاني . حزقيال وصف كيف يقوم الكل من القبور ما فيش وصف في الكتاب كله زي حزقيال السبعة وتلاتين لليوم ده . ازاي كل العضم يركب على بعضه وربنا يكسيه بلحمه و واعصاب وبعدين يحط فيه الروح وترجع له الروح ويقوم اعداد مهولة جدا سماها جيش عظيم جدا جدا . ومنهم الابرار اللي يروحوا للنعيم الابدي ومنهم الاشرار اللي يقوموا لكن للهلاك الابدي .

ايضا يذكر جوجو ومأجوج المزكورة في سفر الرؤيا اشارة الى زمن الارتداد العظيم والحرب الاخيرة اللي بين ابليس وجنوده وبين شعب الله او الملايكة وازاي في الاخر انه ابليس يتكسر وربنا له المجد ياخد اولاده على السما .

الجزء الاخير من اصحاح واحد واربعين بيكلمنا بقى عن هيكل جديد مدينة مقدسة جديدة . عالم بمعايير جديدة ومقاييس جديدة وده اللي بقى لنا فيه اربع مرات بندرسه . ازاي فكرة انه فيه سماء جديدة وارض جديدة يسكن فيها البر . والجزء ده طبعا رغم ان هو يعني غامض شوية لان المقاييس كلها لا تنطبق على اورشليم الموجودة دلوقتي لا في زمن سليمان ولا بعده لانها مقاييس مضاعفة جدا . وجمال لا يوصف . زي بالظبط بتاع سفر الرؤيا .

نختم بقى احنا وصلنا لاخر اصحاح حزقيال تمانية واربعين .

بعد ما وصف لنا في سبعة واربعين المية اللي موصوفة في سفر الرؤيا طريق المفديين زي المعمودية كده الماية اللي زي البلور دي اللي واقف عليها كل الابرار وصف لنا الهيكل الضخم جدا اللي ربنا قاعد فيه ووصف لنا المعنى اللي قاله يوحنا الرائي الله وفق شعبه يسكن وسط ان دايما في نور ما فيش ضلمة ابدا . كل دي اشارات للسماء . قال لنا بقى مين اللي داخل السما ؟ في اخر اصحاح بيقول لنا مين اللي نصيبه في السما ؟ او الملكوت الابدي ؟

هذه اسماء الاسباط . اللي هيدخلوا بقى المدينة المقدسة .

من طريق شمال لجانب طريق حسون لمدخل حماة عينان تخم دمشق شمالا - معلش انا باعدي الحتة الجغرافيا لانها صعبة في الشرح - .

اولا لدان دي بقى اول رسالة غريبة سبط دان بالذات . اللي فاهم تقسيمة يشوع زمان قبل المسيح بالف وربعميت سنة . ده ان كسبط كان اكثر الاسباط وثنية . ودان جه توزيعه ابعد سبط عن الهيكل فاكتر سبط زاغة . لان كل اما تبعد عن الهيكل تبعد عن الكنيسة . كل اما تزوغ اكتر لدرجة بعض اباء الكنيسة قالوا من سبط دان يأتي ضد المسيح . جابوها من فين ؟ جابوها ان يعقوب لما تنبأ عن اولاده جه عند دان وخاف . وقال دان حية على الطريق وفي أفعوان على السبيل ، حد يقول كده على ولده ده كان بيتنبأ قال على يوسف بقى كلام حلو قوي وعلى يهوذا كلام حلو جه عند دان وقال دا تعبان . فالاباء قالوا ايه دا ؟ اهو بيتنبأ مش على دان الموجود على اولاده لانه بيتنبأ للمستقبل ابونا يعقوب . ابو الاسباط . فهنا كتير من الاباء قالوا يبقى دان لانه في التاريخ كان اكتر شعب وثني وهمجي . وكان مستبيح جدا وكان فيه المثلية والاباحية بكل اشكالها . قالوا اكيد ميدان ده هيطلع الشر كله . تتعجبوا بقى ان حزقيال بيقول لنا اول ما جات لدان .

طب ايه دي معناها ايه دي ؟ معناها ان اولون يكونون اخيرين واخيرون يكونون أوليين . وهو لو تاب حد من دان . لو كان حياته كلها ملخبطة وتاب هيبقى مصيره في الاول . زي اللص اليمين يبقى مصيره في الاول .

فهنا عشان تيجي تقسيمة الحياة الابدية اتحط سبط دم في الاول دي بتدي رجاء لان ده ان كان معروف عند اليهود انه سبط. يعني اقرب للامم . بيتعاملوا مع بتوع دان دول كانهم وثنيين من يومهم وكانهم ما كان يهود .

فبيقول اول مسافة دي تكون لدان . فيكون له من الشرق للبحر قسم وحده على تخم دان من جانب المشرق لجانب البحر . ييجي وراه اشير . قسم واحد . و على تخم اشير من جانب الشرق لجانب نفتالي . ومن تخم افتالى لمنسى . و على تخم منسى من جانب الشرق الى جانب البحر لفرايم . يبقى هنا جاي تقسيمة الاسباط مختلفة خالص عن التقسيمات اللي قبل كده . لانه تقسيمة الارض مع يشوع زمان كانت معروفة ، القرعة اللي عملها اما ترجعوا لسفر يشوع . فى اسباط خدت في الاول واسباط خدت من الأخر . هنا التقسيمة مختلفة خالص . ده بيأكد لنا ان هنا شيء والحال في السما شيء تاني . يعني ايه ؟ ممكن يكون واحد غني . وبعدين يدخل السما يبقى داخل كده على الباب . واحد غلبان نلاقيه في السما منور و قديس عظيم جدا . ونجمه ساطع . ممكن واحد يكون خادم معروف . وبعدين يطلع يدخل السما لو دخل السما . يبقى اخر الكل . وواحد تانى كان خدمته هادية ومختفية ونلاقيه زي الشهداء . اذا في التقسيم في السما ما لوش علاقة بالشغل بتاع الارض . لان ربنا له معايير غير معايير البشر . لانه مثلا اللي بيعملوا صداقات قدام الناس يقول قد استوفوا اجرهم . طب بتاعة الفلسين ؟ لا بتاعة الفلسين دي من ولا حد داري بها غير ربنا يسوع . اذا اعمال الخفاء الصيامات والنسك والزهد والجهاد الروحي وتعب المحبة ومشاعر مقدسة وخدمات الرحمة . في حاجات كده الناس ما تقدرهاش . انما عند ربنا مقدرها جدا . وفي حاجات شكلها لها بريق زي صنع المعجزات . ده لدرجة المسيح يقول ده في ناس هتعمل معجزات هيقول لهم انا ما اعرفكوش . اذهبوا عني يا فاعل الاتم . انتم كنتم تعملوا معجزات وتعملوا خطية معهم .

فهنا التقسيم غريب اللي جاي في اخر اصحاح من حزقيال يدينا ايحاء ان السما دي ما هتتملي مفاجآت . هتبقى مفاجآت غريبة يعني تصوروا واحد فيكم كده يقابل واحد يبقى عارف انه طول حياته الراجل ده بيتقال عليه حرامي اوي اوي اوي . وبعدين يفاجأ بوجوده معه في السما . ويمكن كرامتة في السما اعلى من كرامتة الخادم ده . ده ليه ؟ لانه تاب . وخدها جد لي حتى لو انت ما درتش بتوبته . بعض الاباء كانوا يقولوا لما تشوف واحد بيغلط حتى لو غلط وفظيع . وواضح قل في بالك حد عارف بكرة الحال يمشي ازاي ؟ ما يمكن ده يتوب ويسبقني . ويمكن انا اللي ماشي النهاردة عدل . مش هتقدر تقول على الغلط صح . ويل على للقائلين عن الخير شرا وعن الشر خيرا . بس تقدر تقول الله اعلم . بكرة هيمشي ازاي ؟ ما يمكن الخاطي قوي ده يتوب ويسبقني . ويمكن اللي فاكر نفسهم جوة الكنيسة ومتدينين يغلطوا غلطات وحشة على اخر حياتهم ويبعدوا خالص عن ربنا . لان المسيح نبهكم يحكم ازاي ؟ لا تحكموا قبل الوقت . الانجيل قال كده في العهد الجديد . لا تحكموا في شيء قبل الوقت . ليستنى اليوم ده . اليوم ده هتبقى النتيجة عجب .

ربنا يسوع قال نفس الفكرة بطريقة تانية و يأتون من المشارق والمغارب ؟ لما كان اليهود يسمعوا مشارق ومغارب اعتبروهم كلهم وثنيين وكلاب . في لغة اليهود . قال لهم هييجوا من المشارق والمغارب ويتكئون في حضن ابراهيم واسحق يعقوب . اما بنوا الملكوت يطرحون خارج - مثل المدعوين - قال لنا البهوات الاحق بالدعوة اصحاب الملك اللي دعاهم لم يكونوا مستحقين . طب رسيت على ايه في الاخر الدعوة ؟ الغلبانين والعرج والعمي والجودع الكراكيب دول الشحاتين هي اللي دخلوا . عشان كده الواحد يفضل دايما عايش بشعار لا تحكمه في شيء قبل الوقت . تحكم على مين ؟ تعرف مصيره ايه ؟ تعرف اخر لحظات من عمره هتمشي ازاي ؟ ما تحكمش . اللي كان شف يهوذا وهو بيعمل ده انا نفسي ابقى ربع يهودي . لأ ما تقولش كده . يهوذا هلك . لكن يهوذا كان بيعمل معجزات . وكان لازق في المسيح ضمن الاتناشر . انا باقول كده عشان بس هذه التقسيمة العجيبة كانت ما تتفاهمش خالص عند اليهود القدامى . وما زالت سر حتى التقليد اليهودي يقول ده سر . ما نعرفش دي بتتعمل ازاي كده لان هم حفظين تقسيمة يسوع جغرافيا على الارض . التقسيمة دي عجيبة بالنسبة لهم .

وبعد كده يقول . من تخم أفرايم لرؤوبين قسم واحد من تخم رؤوبين ليهوذا قسم واحد من تخم يهوذا تكون التقدمة التي تقدمونها خمسة وعشرين الف عرض والطول كاحد الاقسام  ويبتدي يدي مقاييس وبعدين هنا يتكلم عن تكون تقدمة القدس للكهنة ، هي بالظبط تلاقوا سبع أسباط فوق حوالين الهيكل من كده وخمس اسباط من تحت . لكن هنا الهيكل في النص المدينة المقدسة حواليها الاسباط مرصوصين كده . وده نفس المعنى اللي سفر الرؤيا هيشرحه لما يقول الله وسط شعبه . ده المنظر السماوي الى الابد . اللي هي الكنيسة بتحاول تعيشه لنا من دلوقتي . كل ما ندخل الكنيسة نقول عمانوئيل ألهنا في وسطنا .

المذبح ده احنا حواليه كلنا ندخل ونقرب من المذبح عشان نتناول فيبقى المسيح وسطينا . لان في السما هي السما كده . الله وسط شعبه . فده كان منظر اخر اصحاح في حزقيال بيحاول يبسط للفكر اليهودي يعني ايه الهيكل يبقى في النص والاسباط كلهم حواليه . لما تدرسوا خريطة فلسطين زمان الهيكل تحت في اورشليم في صدق يهوذا وجنبه بنيامين . بعد كده حط الاسباط شمالا كلهم بعاد جدا عن الهيكل . بمسافات متباعدة . لكن هنا محطوط في شكل سنترال كده مركزي عشان كل الاسباط يبقوا حواليه فكله شبعان بحضور الهيكل اللي هو اشارة للمسيح .

فيقول اما يكون مقدس الرب في وسطه . اما المقدس فللكهنة من بني صدوق الذين حرسوا حراسة الذين لم يضلوا . هنا بيتكلم عن الكهنة اللي ما ضلوش . لان عند اليهود كان فيه كهنة كتير ضلوا وضللوا الناس . لكن الكهنة اشارة للاربعة وعشرين قسيس . لما تروحوا للرؤيا تلاقوا العرش الالهي حواليه ربوات من الملايكة . قبل الملايكة و الاربعة وعشرين قسيس . حوالين العرش الالهي . اول ناس تسجد ويطرحوا تيجانهم امام العرش الالهي . فكأن الكهنوت له مكانة ان كان كهنوت لم يضل . لو عاش بتقوى . لو عمل المطلوب منه يبقى طبعا يا بخته . لانه هيبقى واخد الناس على السما . فبيقول دول الذين حرسوا حراستي . الذين لم يضلوا حين ضل بني اسرائيل كما ضل اللاويون . عشان كده يا بخته اللي يعيش صح لو كل الدنيا غلط . لانه احيانا الناس تمشي على التيار بدال كله يلا الغلط سهل بقى . نعمل زي غيرنا . ما هو كله بيغش . صموئيل لما طلع في جو فاسد كان احد مجالات مديحه امام الله انه استمر نقي جدا مع انه شايف ولاد عالي الكاهن اللي يعتبروا مثله الاعلى زى شياطين . اشرار جدا . فهو ما شفش كاهن فاضل بالمعنى . ما شافش الكهنوت الصح . لكن لانه كان تقي وكان حنا امه دى ست قديسة عظيمة . فضل ماشي مستقيم ما بصش على اللخبطة اللي حواليه . وبعد شوية كل الناس عرفت ان صموئيل ده بتاع ربنا بجد ده غير عالي وغير ولاده خالص . فهنا بيقول الذين حرسوا حراستي ولم يضلوا . حراسة ربنا اللي هي العقيدة اولا . الكاهن حارس العقيدة اولا . حارس الايمان . لانه الايمان دايما معرض ان الشيطان عاوز يهزه بيهز الاساس اللي مبني عليه الكنيسة كلها . الاساس هو الايمان . فلو الكاهن فرط في الايمانيات يبقى ضل ويبقى ما حرسش الحراسة وما لوش نصيب في السما . لكن الكهنوت هو اساس اول دور حراسة الايمان . وبعد كده حراسة الشعب . حراسة كل نفس لانه سيسأل عن كل نفس . وتكون لهم تقدمة من تقدمة الارض قدس اقداسها لا تخبر لهم . وبعدين لللاويين على موازاة تخم الكهنة يعني الكهنة اقرب ناس للهيكل . وبعدين اللاويين و بعدين الاسباط كلهم .

خمسة وعشرين الف في الطول وعشر تلاف في العرض والمقاييس بقى الشاسعة دي بيقولوا دي تعدي مدينة اورشليم كلها بمرات ومرات . وعشان كده ده اكيد مش كلام حرفي . ده اكيد كلام رمزي .

لا بيعون منه ولا يبدلون ولا يصرفون باكورات الارض لانها مقدسة للرب . يعني ايه ؟

اللي خد نصيب في السما خلاص ما فيش حاجة بتتغير . انت النهاردة تقدر تغير موقفك . تكون خادم بتدلع وتبقى خادم جد قوي . يا بختك! لحقت نفسك تبقى بتدي عشور وبعدين ربنا يديك قوة تاخد قرار تدى ربع المرتب نص المرتب يبقى خد خطوة كبيرة قوي . تبقى يعني مضغوط عليك وتجارب وتغلب نفسك وتشكر . كويس قوي . تجتهد هنا زي ما انت عاوز وانت شغال هنا بتغير موقف طب وصلت هناك ما فيش تغيير خلاص . ما فيش تصليح نتايج . ما فيش ملاحق . ما فيش تعديل موقف . كله دلوقتي . فهناك يقول ايه ؟ لا يبدلوا ولا يصرفوا ولا يبيعوا . اللي هي زي ما قالها المسيح بطريقة تانية يمكن اكثر بساطة . قال في السما . لا يسرقون ولا ايه يفسد سوس ولا صدأ . يعني ما فيش حاجة بتتغير . فاللي وصل لنصيب في السما ما بيروحش منه خلاص . عشان كده يقول تعبكم ليس باطلا . طب اللي تعب في خدمته ؟ التعب ده يروح منه ازاي ؟ خلاص تعب والتعب متخزن له في السماء ناخده . مين يسرق تعبه ؟ تتعب في الدنيا يتسرق تعبك . اهو تتعب في الدنيا لقيت فلوس الفلوس تطير . يبقى تعبك راح عليك . لكن تتعب في شغل ربنا . ان كنت متواضع وتميل للخفاء وبتتعب لربنا بس لا يمكن تعبك يروح عليك . عالمين ان تعبكم ليس باطلا . اتعب براحتك لان كله بيتخزن في السما . كله بيتحوش . لا يتباع ولا يتشال منه حتة ولا يقل باي حاجة .

يقول لا يبيعون ولا يبدلون ولا يصرفون لانه مقدسة للرب .

وبعدين يقول ايه في جزء كده الخمسة ألاف الفاضلة من العرض قدام الخمسة وعشرين هي محللة للمدينة للسكنة او للمسرح مدينة كلها مقاييس للمناطق المقدسة للكهنة واللاووين .

نوصل مثل لمسرح المدينة كل ده وصفه للمدينة المقدسة اقرب شيء لرؤيا واحد وعشرين .

متين وخمسين من ناحية ومتين وخمسين ومتين وخمسين شرق غرب جنوبه شمال والباقي من الطول موازي تقدمة القدس عشرة ألاف نحو الشرق وعشرو ألاف نحو الغرب .

اما خدمة المدينة سيخدمونها من كل اسباط اسرائيل . هنا تلاحظوا الخدمة ما بقتش واقفة على الاويين . فلحظة سفر الرؤيا يوحنا الرأي لقى ان كل المخلصين المفديين اللي بالملايين دول يقول عبيده يخدمونه . طب مين عبيده كل اللي في السما طب ايه الخدمة ؟ تسبيح . كان زمان التسبيح واقف على اللاويين بس اللاويين عندهم فريق اسمه المغنيين او المرتلين اللي هم زي العرفاء والمعلمين .. لأ في السما كله بيسبح . كله مشترك في الخدمة . هنا بيقول خدمة المدينة يخدمونها من كل اسباط اسرائيل . يبقى اللي صوته وحش هنا ما يقلقش هناك صوته هيتصلح ويبقى بيرتل برضه . اللي ما بيفهمش في القبطي معلش محلولة برضه في السما . يعني هناك التسبيح تسبيح ملائكي يعطى كنعم لكل الابرار . فالكل بيشترك في التسبيح حتى لو ما كانش مخصص للتسبيح زي اللاويين قديما .

وبعدين يقول البقية للرئيس من هنا ومن هناك لتقديمها القدس ولملك المدينة قدام الخمسة وعشرين الف للتقدم الى تخم الشرق ومن جهة الغرب . وبيعيد تاني المقاييس ليه ؟ مقاييس السما منتظمة جدا . يعني تحس انها ايه ؟ متظبطة . يعني المدينة مربعة وكل ضلع قد التاني في اصغر الامور واكبر الامور . فحاجة تحفة كده جميلة جدا وما فيهاش سنتى يفرق . لانه اللي ما كانش كامل على الارض يكمل في السما . الكمال هو رغبة كل واحد فينا . لكن ممكن نقضي عمرنا نسعى للكمال ولا نصل له . الكمال ناخده هدية في السما . ربنا يكمل نقصنا . يكمل ضعفنا . فاللي ناقص فينا يدخل على باب السما . يجد الكمال هدية من المسيح . ويدخل كانه ملاك للاخر .

وباقي الاسباط فمن جانب الشرق لجانب البحر لبنيامين قسم واحد ولا تخم بنيامين تلاقي شمعون وعلى تخم شمعون . تلاقي يا ساكر ومن تخم يا ساكر . تلاقي زبولون وعلى تخم زبولون . تلاقي جادو على جاد تلاقي  من ثمار لمياه مريبة قادس النهر الى البحر الكبير دي اخر واحد جاد .

هذه التي تقسمونها ملكا لاسباط اسرائيل وهذه حصصهم يقول السيد الرب . انا بس قبل ما اخلص عاوز اوديكم عند الرؤيا اديكم مشهد قريب لنفس المشهد .

يقول ايه ؟ سمعتوا عدد المختومين رؤية سبعة . مية و اربعين الف مختوم من كل سبط من بني اسرائيل من سبط يهوذا اتناشر الف مختوم . من سبط رأوبيين اتناشر الف مختوم . من سبط جاد اتناشر وهكذا . يبتدي يعد الاسباط .

تعالوا نروح لاخر سفر الرؤيا . نشوف المدينة اللي وصفها حزقيال وشافها يوحنا وشاف جمالها وقعد يوصف .

فبيقول ايه ؟ جاء الي واحد من السبع ملايكة رؤيا واحد وعشرين . الذين معهم السبعة الجامات المملوءة من السبع ضربات الاخيرة . وتكلم معي قائلا . هلم فاوريك العروس امرأة الخروف . اللي هي الكنيسة المنتصر . وذهب به بالروح الى جبل عظيم عالي واراني المدينة العظيمة أورشليم . يبقى واخد من حزقيال نفس الاسم . فضلت الكنيسة اسمها اورشليم . المقدسة نازلة من السماء من عند الله .