تفسير سفر الرؤيا - حـ 11 ✟ الانبا رافائيل فى ها أنا أتى سريعا
باسم الاب والابن والروح القدس الاله الواحد امين .
في البداية احب اهنيكم استقبال صيام الست العدرا . بنصلي ان ربنا يجعل هذا الصوم سبب بركة في حياتنا . وسلام للعالم وهدوء وطمأنينة . وينتهي الازمات ازمة كورونا والازمات اللي بتحصل في العالم زي اخواتنا في لبنان اللي بنصلي من اجله .
احنا في دراستنا لسفر الرؤيا في برنامج ها انا اتي سريعا .
حاليا شغالين في الختوم السبعة . اللي كانوا محطوطين على كتاب او سفر زي الرول وبعدين جه المسيح يفك هذه الختوم .
اخدنا خمس ختوم من السبعة والنهاردة بنعمة ربنا ناخد السادس .
افكركم الختم الاول بعد ما اتفك طلع فرس ابيض وقلنا الفرس الابيض يرمز للسيد المسيح الغالب والمنتصر واللي بيطمنا . الختم التاني خرج فرش احمر يرمز للاستشهاد وسفك الدماء . الفرس التالت كان لونه اسود ويرمز الى البدع والهرتقات والفترات السوداء في تاريخ الكنيسة . وبعدين فرس الاخضر قلنا بيرمز الى بدعة كبيرة جدا . انتشرت في ربع العالم ما زالت . و اللي راكب على الفرس باسمه الموت والهاوية تتبعه . وكان اعطي سلطانا انه يقتل الناس بالسيف وبالجوع . وبالموت وبكل وحوش الارض . يعني فيه اربع حاجات بيستخدمهم في تدمير الناس .
بعدها ربنا عزانا ان احنا شفنا في الختم الخامس الشهداء تحت المذبح . بيتمتعوا بمجد ابدي . و بيطالبوا ان ربنا ينهى الازمة بتاعة الاضطهاد وبتاعة الظلم اللي موجود في العالم . فقال لهم يعني اعطوا ثيابا بيضا وقال لهم استريحوا قليلا لغاية ما يكمل العبيد رفقاؤكم .
طيب احنا كده وقفنا عند المنظر بتاع السما والشهداء تحت المجد . طب ايه بقى الوضع الارض في الايام الاخيرة . هو ده الختم السادس .
يقول ونظرت لما فتح الختم السادس واذا زلزلة عظيمة حدثت . طبعا انتم عارفين الزلزال معناها حركة في الارض . انتم عارفين باطن الارض ملي المواد الساخنة جدا والمعادن . لكن عشان قشرة الارض سميكة وتقيلة فمستحملة الضغط والسوائل السخنة جدا اللي موجودة جواها . لكن احيانا الشواية دي لما تتحرك حركة عنيفة بتهج قشرة الارض . وحسب بقى العنف بتاع الهزة دية تحصل الاثار بتاعة الزلزال . لو عنيفة قوي ممكن توقع البيوت وتوقع العمارات وممكن ذات نفس قاع البحر يتهز فيطلع التسونامي ده اللي هي المية اللي تغطي وتغرق الدينا . احيانا بيبقى الزلزال خفيف فالناس تحس بالهزة لكن ما يحصلش فيه اثار متعبة .
هنا ليه الكتاب المقدس بيحكي لنا عن الحاجات اللي هتحصل دي ؟ دي بتفكرنا بالنص جميل اللي جه سفر التكوين ان ربنا بيقول هل اخفي عن ابراهيم ما انا فاعله ؟ برضو اتضاع من ربنا انه يخبرنا باشياء لسه هتحصل . ولما بيخبرنا بها علشان نطمئن ونأخذ حذرنا . يعني لما نكون عارفين دي حاجة هتحصل . يعني اذا ربنا عامل حسابها واخد باله فاحنا نبقى مطمئنين . ما هياش حوادث دي حاجات تدبيرية . فبنشكر ربنا ان هو بيكشف لنا عشان نطمن . وعلشان نمسك فيه وعشان نحتاط وناخد حذرنا . نرجع اليه بالتوبة علشان يحمينا .
طبعا الزلزال دوت قال عنه ربنا يسوع نفسه في متى اربعة وعشرين سبعة قال لانها تقوم امة على امة ومملكة على مملكة وتكون مجاعات واوبئة وزلازل في اماكن . يعني من بدري ربنا قال ان هيبقى فيه شعوب قايمة ضد بعضها وفيه مجاعات وفيه اوبئة . ما نستغربش بقى وزلازل في اماكن الزلازل كثيرة .
وفي اشعيا قال ازلزل السماوات وتتزعزع الارض من مكانها في سخط رب الجنود . وفي يوم حمو غضبهم . طبعا هنا برضو الحاجة الغريبة كلمة ازلزل السماوات . موجودة برضو في حجي اصحاح اتنين اية واحد وعشرين ازلزل السماوات والارض .
لما احنا بنقول الزلزال عبارة عن حركة في الارض . ازاي بقى السما تتزلزل . يبقى واضح هنا ان الزلزال له معنيين . معنى حقيقي حرفي . ومعنى رمزي بيرمز لحاجة . فالمعنى الحقيقي الحرفي هو فعلا فيه زلازل . فيه اضطرابات في الطبيعة . طبعا في كل الاجيال في كل العصور بتحصل الزلازل . لكن واضح ان قبل مجيء المسيح التاني هيبقى فيه كمية زلازل كتيرة بتهز العالم كله . والعلماء نفسهم بيتوقعوا حاجات زي كده بسبب ان يمكن يكون احوالنا في الارض مرتبطة كتير بالشمس . الشمس هي الكوكب الكبير اللي مرتبط به الكواكب اللي حواليه المجموعة الشمسية . ففي جاذبية في الشمس وفي طاقة بتطلع منها . وفي تفاعلات بين الشمس والكواكب فيزيائية وقوانين فضائية معقدة جدا جايز احنا ما نعرفش تفاصيلها العلماء يعرفوها . فهم بيرصدوا الشمس وجدوه ان فيها بقع سودا . قالوا البقعة السوداء دي بيفسروها ان الطاقة اللي عمالة الشمس كل سانية باستمرار منذ بداية الخليقة يعني بتخلي ان الشمس ممكن تبتدي تبرد . طبعا تبرد دي بالنسبة للشمس يعني ارقام درجات الحرارة حاجات مهولة يعني . لكن معناها مع الاف وملايين السنين هيحصل أن الشمس تفقد كل الطاقة اللي فيها . هشبها لكم زي ايه ؟
لو انا عملت كوباية شاي وحطيتها قدامي كده ولعة خالص . وبعدين استنيتها تبرد شوية علشان اشربها . لكن انا مشغول باني عمال احضر فنسيتها . وانتبهت لها بعد ساعة لقيتها تلج . خصوصا لما يكون الجو شتا يعني . فليه ؟ لان الحرارة اللي طالعة منها بتفقدها . لغاية لما تبرد . طبعا دي كوباية شاي . لكن الشمس بالطاقة اللي هي بتدفي كل المجموعة الشمسية دي والطاقة اللي بتقذفها في الفضاء . كميات ضخمة جدا فبيتوقعها العلماء بالمنطق ان الحاجة مع الوقت هتبرد . نتيجتها بقى يحصل الكوارث الطبيعية اللي اللي اتكلم عنها الكتاب المقدس .
ففي حاجة حرفية هتحصل . طبعا الله وحده يعلم امتى ؟ والعلماء بيقعدوا يتوقعوا حاجات جايز تطلع مواعيدها صح وجايز تطلع غلط لكن هيحصل هيحصل .
اما من الناحية الرمزية فالزلزال معناها فيه حاجة هتهز استقرار الناس وثباتهم . وطبعا برضو حصل في تاريخ الكنيسة زلازل كتير . يعني مثلا أريوس زلزال . جه عايز يوقع الكنيسة لولا ان هي ماسكة في الصخر اللي هو المسيح . كانت وقعت . والهراطقة كلهم كانوا زلازل في تاريخ الكنيسة . في الايام الاخيرة بقى الزلازل دي هتبقى عنيفة قوي . ليه ؟ لان دلوقتي في حاجتين يساعدوا على ان الناس تتهز في ايمانها . وارجوكم تاخدوا بالكم عشان احنا ما نتهزش .
اول حاجة الميديا .. الميديا خلت اي حد بيكتب اي حاجة توصل لكل الناس . اللي بيكتب ده قد يكون يعرف او ما يعرفش . قد يكون متعلم او بينقل . ما نعرفش ايه مصدر المعلومة . وبعدين نتيجة الميديا جعلت الناس عندهم طبيعة ان هم يصدق اللي يقراه . ويطلع تاني يوم كدب . فبيصدق بتاع النهاردة لغاية ما يطلع بكرة انه كدب يصدق بتاع بكرة لغاية ما يطلع بعد بكرة انه كدب . كلنا ماشيين بالطريقة دي . نقرا حاجات نصدقها ونشيرها ونهتز لها وننفعل . وفي الاخر يطلع كله اونطة . والخبر ممكن يستمر لمدة يوم . يومين بالكتير .
لكن ورا بعضه ورا بعضه ورا بعضه احداث ما بتخلص . عشان كده الميديا دي هتساعد على ان الناس تتزعزع في ايمانها بسبب سهولة نشر الافكار . ايام ما احنا كنا اطفال الواحد عشان يكتب مقالة شغلانة كبيرة قوي . كلكم عارفين . بيقعد يكتب وبعدين يروح مكتب الالة الكاتبة ويكتبوه على الورقة اللي فيه الكربون ويطبع . وبعدين مكلف جدا ويقعد يوزعه كده على زملاته في الكنيسة ولا في المدرسة ومكلف . النهاردة مش محتاج ده كله انت قاعد في بيتك في التكييف اخر تمام تكتب كلمتين بتوصل للدنيا كلها . وطبعا كان ممكن اللي بيكتب مذكرة وبيكتب نبذة يقبضوا عليه انت بتعمل منشورات . ما في لازم تصاريح . النهاردة فين التساريح ؟ كل واحد بيكتب اي حاجة بينشرها . فاصبح الافكار متاحة ان تقرأ وان تنتشر . فده اول سبب .
السبب التاني هو تمجيد العقل . يعني احنا البشر زمان بتمجد الالهة . لما جه ربنا يسوع المسيح نمجد الله الحقيقي . هو عرفنا بالله الحقيقي . وبعدين الكتاب المقدس ده له كرامته وقدسيته . وبعدين الاكليروس ابونا وسيدنا برضه لهم هيبتهم مهابتهم ومن فم الكاهن تؤخذ الشريعة .
النهاردة الحكاية دي عمالة تقل تقل تقل لغاية ما احيانا منعدمة . يقول لك ابونا قال كذا ابونا ايش فهمه ؟ سيدنا يا عم كلمة سيدنا دي اصلا غلط . طب المجمع المقدس يا عم دول جهلة ؟ طب قداسة البابا يا عم قداسة البابا في حتة واحنا في حتة . مابقاش حد له سلطان او هيبة . كل واحد سلطانه دماغه .
فعندنا حاجتين ممكن يزلزلوا ايماننا . ان في افكار بتنتشر واي حد اعطى لنفسه سلطان انه يعلم . وانه يقول وانه يفتي وانه يعطي رأيه . واشعر احيانا ان بعض الناس بيحس انه لو ما كتبش رأيه هيبقى ملوم . بينما ما حدش هيلومك ان انت ما كتبتش . ادرس الاول . اللي يجاوب عن امر دون ان يعرفه . يحسب له حماقة . الكتاب المقدس قال كده . فازاي انا افتي في كل فرع من المعرفة وانا مش عارف . وازاي انقل مقالة وابعتها للناس وانا مش عارف مدى صحتهم . او مين اللي كاتبها ؟ او هدفه ايه لما كتب .
فلذلك اخبار كتيرة تلاقيها مغلوطة وممكن يبقى مبالغ فيها ممكن طبعا هو معظم النار من مستصغر الشرر وما فيش نار من غير دخان ما فيش دخان من غير نار . معناها فعلا ممكن يكون في حاجة صح . لكن كبرت وبقى المعلومة اللي واصلة لنا مش هي دي الاصل . بناء عليه انا باخد موقف وباخد قرار بادي رأيي افجس الناس اقلقهم . وبعدين ما فيش هيبة للكبير . حتى بابا وحتى المدرس وحتى رئيس الدولة او حتى الوزير كله ما فيش هيبة . ثقافة الثورة خلت كل واحد عايز يقول اي حاجة ومش بيحترم الاخرين .
ده هيساعد كتير ان يبقى فيه زلزال . يزال السماوات والارض . ونتيجة كده يحصل ايه ؟ الشمس صارت سوداء كمسح من شعر والقمر صار كالدم .
هنا الشمس احنا عارفين الشمس هي المسيح . والقمر هو الكنيسة . شمس نور المسيح ينور الكنيسة ينعكس على القمر اللي هي الكنيسة . فتنور للناس . يعني ايه ؟ الشمس صارت سوداء كمسح من شعر .
طبعا مسح من شعر معناها زي ما يكون نسيج اتعمل من الشعر فبقى لونه اسود . لما تيجي تحطه كده قدام الشمس حجب بالنور . فاولا سوداء تفكرنا بالحصان الفرس الاسود اللي قلنا عليه الهرطقات . تخيلوا بقى ربنا ما يسمحش ان احنا نشوف الايام دي . ان نور المسيح ينحجب عن الكنيسة بسبب كثرة الهرطقة . ويصير الهراطقة كمثل نسيج . يعني بالرغم ان الهرطقات احيانا تبقى ضد بعضيها . لكن هيتحالفوا مع بعض وكلهم ضد بعض لكن اتحالفوا مع بعض ضد الكنيسة ضد المسيح ضد الايمان المستقيم . فيصير نور تعليم المسيح مش واصل وبالتالى هيبقى القمر زي الدم يعني ايه زي الدم ؟ صار الدم . معناها لونه احمر .
وانتم عارفين الناس في خبرتهم في الشعوب يقولوا القمر مخنوق . ليبقى لونه محمر خالص . فهو ده نتيجة ان حجاب نور المسيح عن الكنيسة . تصير الكنيسة نفسها مش من اولها . عشان كده الواحد ساعتها يقول له يا رب انقذ شعبك انقذ كنيستك . وبنصلي ان احنا ما نشوفش الايام الوحشة دي . ما زال نور المسيح منور وما زال التعليم موجود والكنيسة قوية وفيه مجمع قوي وفيه بابانا بيحفظ الايمان ويحافظ عليه . لكن فيه اجيال هيحصل فيها حاجات كوارث .
يقول اشعياء عن هذا الكلام هوذا يوم الرب قادم . قاسيا بسخط وحمو غضب . ليجعل الارض خرابا ويبيد منها خطاتها . قال فان نجوم السماوات وجاببرتها لا تبرز نورها تظلم الشمس عند طلوعها والقمر لا يلمع بضوءه واعاقب المسكونة على شرها والمنافقين على اثمهم وابطل تعظم المستكبرين واضع تجبر العتاة .
يعني حتى ايام اشعيا وقال ان ده هيحصل . نتيجة الشر . السيد المسيح نفسه قال في متى اربعة وعشرين على علامات ما قبل المجيء . قالوا الى الوقت بعد ضيق تلك الايام تظلم الشمس . والقمر لا يعطي ضوءه . والنجوم تسقط السماء وقوات السماوات تتزعزع .
دايما احنا في النصوص دي بنفهمها بطريقتين متكاملتين .
الطريقة الاولى اللي هي الحرفية هيحصل فعلا الناس تبص تلاقي الشمس ضلمت . ولا عجب لانه حصل يوم صليب المسيح . يعني في مجيئه الاول حصل مجيئه التاني هيحصل برضو . فعمليا هيحصل شمس تضلم . وزي ما قلت لكم من شوية ان الطاقة اللي طالعة منها ، و طبعا في نظريات تانية بتقول ان بتجدد نفسها تفاعلات كيميائية بتطل الطاقة فمش بتخلص . لكن العلماء قالوا ان شايفين كده لونها سودا في الشمس معناها ان في حتت انطفت . فتخيل بقى لما دي تكتر تكتر لغاية ما الشمس تظلم . والقمر لا يعطي ضوءه . بس من الناحية التفسيرية الرمزية يبقى الشمس هي التعليم النقي بتاع المسيح والقمر هو انعكاس في الكنيسة .
اما النجوم فهي كواكب الكنيسة . اساقفة ورهبان وكهنة وقادة خدام ومعلمين . ربنا يرحم فيتساقطوا . وقوات السماوات تتزعع اللي هي قوات الكنيسة .
انا مش عايز اخوفكم لان دي حاجات هتحصل قبل المجيء التاني على طول واحنا لسة شايفين في خير موجود في الكنيسة وفي العالم مهما كان حاجات دلوقتي بتحصل لكن مش بكرة . يعني اطمئن شوية . عشان كده المسيح قال ان بعد زلام الشمس دية على طول العدد اللي بعده اللي هو متى اربعة وعشرين تلاتين قال وحينئذ تظهر علامة ابن الانسان في السماء ويبصرين ابن الانسان اتيا على سحاب السماء بقوة مجد كبير . يبقى دي حاجات هتحصل في الاخر خالص .
وفي يؤئيل قال نفس التعبير واعطي عجائب في السماء والارض دما ونارا واعمدة دخان تتحول الشمس الى ظلمة . والقمر الى دم قبل ان يجيء يوم الرب العظيم المخوف . بس هنا بقى في حتة جميلة كده ويكون ان كل من يدعو باسم الرب ينجو . عشان كده لازم ندرب انفسنا من دلوقتي ان احنا في عز الضيقات نمسك في اسم ربنا . اللي يدعو باسم الرب ينجو . لانه في جبل صهيون وفي اورشليم تكون نجاة . طبعا هنا جبل صهيوني اوسليم هو الكنيسة .
ونجوم سقطت الى الارض كما تطرح شجرة التين سقاطها اذا هزتها ريح عظيمة . هنا بقى بعد الشمس ما تضلم والقمر لا يعطي ضوءه ويبقى احمر زي الدم . نجوم السماء تسقط للارض
بس هنا قال ايه ؟ كما تطرح شجرة التين سقاطها اذا هزتها ريح عظيمة . اي شجرة لما الهوا يزقها الحقيقة اللي بيقع منها حاجة اسمها السقاظ . السقاظ هو الثمرة الدبلانة والمعتبة والورق الدبلان الاصفر . لكن الثمرة القوية الناضجة تمسك في الشجرة قوي . والورق الاخضر الطري ما يطيرش . على طول دي تفهم نفهمها ان في ناس هيطيروا وناس هيثبتوا .
شوفوا مثلا المزمور اللي بنصلي كل يوم في باكر مزمور الاول . الانسان اللي ماسك في ربنا قوي يقول لك فيكون كشجرة مغروسة عند مجاري المياه . التي تعطي ثمرها في اوانها وورقها لا يذبل . وكل ما يصنع ينجح . العكس بقى ليس كذلك الاشرار لكنهم كالعصافة التي تذريها الريح . اول ما تيجي الريح العظيمة دي تهز شجرة التين فتوقع الحاجات الضعيفة .
عشان كده معلمنا بولس الرسول كان قال لنا معلومة جميلة قال انا وضعت اساس واخر يا ابني . الاساس اللي حطه بولس هو الايمان بالمسيح . زي ما ماري مرقص جه حط اساس هنا في مصر . وكل اب من اباء الرسل وضع اساس . وبعدين اخرون يبنوا عليه . اخرون ده هم الاجيال اللي بتبني على نفس الاساس . وقال ما حدش هيقدر يحط اساس اخر غير الزي وضع . ما حدش هيقدر يشيل المسيح . ويحط اساس اخر . لكن وانت بتبني خلي بالك . في ناس بيبنوا دهب وناس بتبني فضة . حجارة كريمة . خشب . عشب قش . ده كلام بولس الرسول . وقال بقى ان اليوم سوف بين عمل كل واحد . اليوم هو يوم التجربة يوم الهزة دية . يوم ما يجي لك موجة الحاد . موجة اباحية . موجة مش عارف تشكيك في الكتاب المقدس تشكيك في الوهية المسيح . انت خادم في الكنيسة . هيبان انت عملت ايه . لو ولادك كلهم طاروا يبقى انت خدمتك كانت قش . لو هم ثبتوا يبقى انت خدمتك دهب . لان الدهب لما يتحط في النار يلمع . والقش لما يتحط في النار ينتهي . فعشان كده كل واحد فينا لازم يلاحظ خدمته . هل انا بخدم خدمة دهب ؟ يعني الناس اللي انا عمال اعلمهم في مدارس احد ولا في اجتماع الشباب ولا في الكنيسة . ساعة ما تيجي موجة زي بتاعة الوباء بتاع كورونا ده . يهتزوا ويخافوا ومش عايزين يتناولوا وخايفين وقلقانين ولا يقولوا لأ احنا احنا في ايدين ربنا . اللي هيحصل يحصل . احنا في ادين ربنا . يعني ان عشنا فلربنا نعيش و متنا فللربنا نموت فان عشنا وان متنا في للرب نحن . هيبان بقى انت عملت ايه ؟ طول السنين اللي انت بتخدمها . ساعة التجربة . يعني انت عارف زي ايه ؟ طول السنة المدرسين شغالين والطلبة بيشتغلوا بتدفع فلوس . بيبان النتيجة في اخر السنة . هل مذاكرته كانت صح ؟ هو قاعد بيذاكر فعلا بيحصل معلومات وبيجاوب بطريقة فيها اه ذكاء وفيها فهم ومعرفة . ولا هو بيقرا بطريقة غلط ؟ وبيذاكر بطريقة غلط ؟ والمعلومات مش في ذهنه وكان متوقع حاجة ما جتش هي فبالتالي جايب حاجة مش مظبوطة . هو ده بالظبط . الخدمة بتاعتنا هي زي الطالب اللي بيذاكر طول السنة والمدرس اللي بيذاكر . بيعلم . يوم الامتحان بقى بيبان . طبعا بغض النظر عشان ما حدش يزعل مني يعني بغض النظر طريقة التقييم في الامتحانات بتاعتنا صح ولا غلط . لكن انا بتكلم عن ربنا بقى . انه بيقيم صح . والاحداث والدنيا اللي احنا عايشين فيها بتقيم صح . لو انت عندك مناعة قوية بييجي الفيروس ما يقدرش عليك . واضحة . الفيروس ده يقابل كل الناس . انا متأكد ان كلنا اتعرضنا للفيروس . مهما خدت احتياطاتك فبييجي انسان عنده مناعة يجي الفيروس ما يقدرش عليه . واحد تاني مناعته غلبانة قليلة . المناعة دي هي التعليم في الكنيسة . هيخلي الريح ييجي يهز شجرة التين . وانت واقف ماسك في ربنا اعلم . واحد تاني وقع
يبقى كما تطرح شجرة التين سقاطها اذا هزتها ريح عظيمة . وده بيتكلم عن مين ؟ عن نجوم السماء . يعني مش بس الشعب العادي . حتى من هو يظن في نفسه انه نجم فى الكنيسة تيجي الريح يقع .
بان بقى ان كل اللي بيقوله كان كلام . فين الايمان ؟ فين العزيمة ؟ فين ان انت طول عمرك تقول احنا بنفتخر بالهنا القوي الجبار . عند اول تجربة الانسان يقع و يخور
والسماء انفلقت كدرج ملتف وكل جبل وجزيرة تزحزحا من موضعهما .
طبعا السماء انفلقت معناها يعني انقسمت . حاجة مرعبة . اذا كان طبيعيا هنشوف السما بتعمل كده دي حاجة مرعبة . لكن كمان لما يكون بالمعنى الرمزي ان الكنيسة يحصل فيها الانذعاج ده . ده شيء مؤلم جدا . كل جبل .. جبل معناها الصمود والشموخ والثبات والهيبة الواحد لما يشوف جبل كده يخاف منه . بيتزحزح . طبعا اشارة للناس اللي هي في حياتها في مجتمعنا مثل الجبال . فلان بيه وفلان باشا وسيادة الزعيم وسيادة اللواء .. الجبال . كله يتهز .
والجزيرة ترمز طبعا انتم عارفين الجزيرة دي حتة ارض في وسط البحر . كبيرة صغيرة مهما هي جزيرة متحوطة من كل ناحية بالمياه . لكنها مش متصلة ببقية القارات . فدي اشارة للانسان اللي بيعزل نفسه بعيد عن الكنيسة . يعزل نفسه بعيد عن الناس . لانه حاسس ان هو حاجة جميلة . حواليه البحر من كل حتة . عادة الجزر بيبقى فيها غنى شوية لانها حواليها البحر . البحر فيه خير . وممكن يبقى فيها زراعة . ممكن يبقى فيها صيد . سمك كتير لان من داير كده البحر . ففيها الغنى والجمال . فالجبل يرمز للشموخ والجزيرة ترمز للانعزال . الانسان اللي حاسس ان هو جبل والانسان هو حط نفسه في جزيرة معزولة عن الناس . كل ده يتزحزح .
في متى اربعة وعشرين السيد المسيح قال كلامي لا يزول . عشان في ناس بتسأل هو فعلا الارض دي ممكن تروح خالص السما كمان ؟ اه . المسيح قال السما والارض يا زولان . وقال برضه في متى خمسة الى ان تزول السماء والارض لا يزول حرف واحد او نقطة واحدة من الناموس . وفي سفر الرؤيا قال رأيت عرشا عظيما ابيض والجالس عليه الذي من وجهه هربت الارض والسماء ولم يوجد لهما موضع . ده طبعا معنا ان السما والارض اللي احنا شايفينها دلوقتي هيروحوا ما لهمش مكان . وشرحها معلمنا بطرس في رسالته التانية بتفاصيل جميلة . تفاصيل جميلة من حيث المعلومة عشان تبقى واضحة . قال سيأتي كلص في الليل يوم الرب الذي فيه تزول السماوات بضجيج تزول السماوات بضجيج ضجيج يعني هيصه .
لو انتم شفتم الفيديوهات بتاعة الكارثة اللي حصلت في لبنان .
تخيل دي في حتة صغيرة في في المرفق دمرت بيقولوا تلت تربع او نص بيروت كلها . تخيل بقى ربنا يحمينا يعني لما يكون كرثة على العالم كله شكلها ايه .
تزول السماوات هيبقى فيه ضجيج وتنحل العناصر محترقة . وتحترق الارض والمصنوعات التي فيها . فبما ان هذه كلها تنحل . اي اناس يجب ان تكونوا انتم في سيرة مقدسة وتقوى . لما انا عمال اكنز وابني قصر وابني فيلا وابني مش عارف ايه وعندي ايه وفخور بها وتبص كده على منظر بتاع بيروت دية مدينة الجمال والثقافة و كل حاجة حلوة يعني فجأة تبقى رماد . والناس اللي هي بتفتخر ان له مكان على البحر ضاع .
فبيقول يعني ما دام انت عارف الحاجات دي كلها هضيع انت ليه مشغول بها ؟ اي اناس يجب ان تكونوا انتم في سيرة مقدسة وتقوى . منتظرين وطالبين سرعة مجيء يوم الرب الذي به تنحل السماوات ملتهبة . قال تانى والعناصر محترقة تذوب . لكننا بحسب وعده ننتظر سموات جديدة وارضا جديدة يسكن فيها البر . وعد ربنا ان الحاجات دي هتروح لكن هيجيب لنا حاجات جديدة .
يعني زي ما بيحصل الكوارث ديا تبص بقى الدول كلها تكاتفة و بعض التبرعات ويعاد اعمار المدينة . تلاقي بيروت دي بعد ما اتبهدلت خلال سنتين تلاتة ويعيد اعمارها وبقت مدينة جميلة تاني . والناس تعيش في سلام وتفتخر بان احنا بعد ما الدمار عرفنا نقوم على رجلينا تاني .
فربنا بيقول ان الكون هيدمر لكن هيعمل لنا سماء جديدة وارض جديدة .
ذكرت في سفر الرؤيا ثم رأيت سماء جديدة وارضا جديدة لان السماء الاولى والارض الاولى مضت والبحر لا يوجد فيما بعد .
و قال فى اشعيا لانها هانذا خالق سماء جديد و ارض جديدة فلا تذكر الاولى ولا تخطر على بال يعني ايه بقى ؟ يعني اذا كنا النهاردة بنقول ان بيروت مدينة الجمال وبعدين ادمرت وجم بقى المجتمع الدولي تكاتف انه يعيد اعمارها . بس جمال ابهى الاول . فنقول ياه دي بقت احسن بكتير . ده القديمة لا تذكر ولا تخطر على بال . فده اشارة ان احنا هنرجع تاني يبقى لنا سماء جديدة وارض جديدة بس اجمل بكتير جدا من اللي دلوقتي .
وقال كده في اشعيا كما ان السماوات الجديدة والارض الجديدة التي انا صانع تثبت امامي تثبت معناها ما لهاش بقى زوال زي الارض دي . هكذا يثبت نسلكم واثمكم .
حكاية بقى ان السما والارض تزول ربنا يعمل لنا حاجة جديدة يسموها زمن التجديد . في رؤية قالها نصنع كل شيء جديدا . ها انا اصنع كل شيء جديدا . وقالها المسيح في متى تسعتاشر لابائنا الرسل ؟ انتم الذين تابعتموني . في التجد متى جلس ابن الانسان على كرسي مجده انت هتجلسه على اتناشر كرسي وتدينه اصبات اسرائيل . سماها في التجديد . ايه التجديد ده ؟ هو كل شيء يبقى جديد . الخليقة دي تزول ويعمل لنا بقى الحاجة اللي تليق بنا في الابدية السعيدة . ل
وبعدين يقول ايه ؟ وملوك الارض ركزوا معي . والعظماء والاغنياء . والامراء والاقوياء . وكل عبد وكل حر . يعني مش بس الناس العظماء لكن كمان العبيد . اخفوا انفسهم في المغاير وفي صخور الجبال .
تخيل بقى لما ملك ويستخبى طبعا احنا شفنا في الاجيال بتاعتنا وكل الاجيال فيها كده تلاقي رئيس دولة واتحط في السجن . وتلاقي واحد وراح مستخبي في سرداب تحت الارض . ويجيبوه بقى زي بعد ما كان هو الحاكم بامره واللي بيزل الناس وبيقتل الناس . جايبينه كده قابضين عليه . فبيقول ملوك الارض والعظماء والاغنياء والامراء كله هيخفي نفسه في المغاير وفي صخور الجبال . ده في سفر زكريا بيتكلم عن الفترة الاخيرة دي وتقف قدماه في ذلك قدمي الرب . هيقف برجليه على جبل الزيتون الذي قدام اورشليم من ناحية الشرق . فينشق جبل الزيتون من وسطه نحو الشرق ونحو الغرب وادي عظيما جدا وينتقل نصف الجبل نحو الشمال ونصفه نحو الجنوب . طبعا ده فيه حاجة رمزية ان هيبقى فيه انقسام عظيم في العالم . وفيه حاجة حقيقية ان نتيجة زلزال عظيم جبل الزيتون هينشق ويبقى فيه بينهم وادي . وده بيسموه وادي هو الانشقاق .
فده بيدل على ان ما فيش حد هيقدر يقف قدام الازمات العظيمة اللي هتيجي . يمكن من ضمن الدروس بتاعة كورونا ان العالم كله واقف على رجل . والدنيا كلها عطلت . والعلماء تركوا كل شيء وبيسخروا انفسهم لخدمة هذا الفيروس . ازاي نخلص منه ؟
كنت بتسائل مع حد من الدكاترة بقول له انتم ليه المستشفى بتاعتكم بعد ما كانت عزل ؟ خلاص هترجع تاني ؟ هل عشان الحياة انتهت ؟ قال لي مش عشان الحالات انتهت . عشان بقية المرضى مش لاقيين فرصتهم . في ان هم نتابعهم . فنضطر نخلي كل مستشفى مثلا عشرين في المية من كفائتها للعزل والباقي يشتغل . تخيلوا احنا على مدى الشهور دية في مريض عايز يروح المستشفى قالوا له لأ دي بتاعة عزل . طب انا هروح فين ؟
فالعلم محتار قدام فيروس . اشحال بقى الكوارث دية .
هيقولوا للجبال والصخور اسقطي علينا واخفينا عن وجهك جالس على العرش وعن غضب الخروف . طبعا ارجوكم فيه ناس بتشيع ان الله لا يغضب ولا ينتقم ولا يعاقب . الله جميل يصالح . الكلام ده مش مظبوط . كتاب المقدس ما قالش كده . ارجوكم ما تسمعوش كلام الناس اللي بيضللونا . الله طيب يا صالح فعلا لكن من ضمن صلاحه وطيبته انه يعاقب الغلطان . ارجو ان الحكاية دي انا بقولها كتير ما تزهقوش مني . الاب الصالح لما يلاقي ابنه حلو ياخده في يطبطب عليه ويدي له مكافأة ويجيب له هدية ويفسحها . لما يعمل حاجة غلطة يقول له انا مش مبسوط منك النهاردة . اطلع برة لا بقى ما تقعدش معي لان انا زعلان منك . لما نصلح غلطتك تعالالي . لو ما عملش كده ما يبقاش صالح . وبعدين الاب الصالح الحنون ده اللي هو بياخد اولاده في حضنه . لو نازل في الشارع وشايف واحد جاي يهجم عليهم يضربهم ويسرقهم . يقول انا صالح ما اسيبهم يضربوا . بقى ربنا من صلاحه يلاقي الاشرار بيخبطوا فينا . وفي الاخر ما يغضبش عليهم .
ده عادل عند الله ان الذين يضايقونكم يجازيهم ضيقا . عشان كده الناس الاشرار دول اللي هم كانوا بيظلوا في انفسنا و بيعاكسوا الكنيسة . وهم معهم سلطان في ايده قرار ممكن يكتب او لأ امضة واحدة يخلص لنا مشاكل كثيرة . لكن هو بخلان علينا بأمضئ . لانه في ايده السلطان وهو مفكر نفسه فرعون . هيجي ساعتها يستخبى في الجبل يقول يا جبال اسقطي علينا ويا اكام غطينا . من وجه الجالس على العرش . اين العظمة ؟ واين الفخر ؟ واين السلطان ؟ كله هيضيع .
و فى هوشع قال كده . يقولون للجبال غطينا و شوف بقى العكس يعني الواحد لما يكون له علاقة حلوة مع ربنا يروح يقول له يا رب انظر الينا يا رب انظر الينا اطلع علينا زي ما بنقول في التسبيحة واقول له يا رب لا تحجب وجهك عن عبدك لكن التاني اللي خايف .. خايف مرعوب مش خوف الله . يقول يا جبال غطينا من وجه الجالس على العرش . عشان احنا بنحبه لا خوف في المحبة بل المحبة الكاملة تطرح الخوف الى خارج . الخوف له عذاب . اما من خاف فلما تكمل في المحبة . علشان كده بالرغم الناس تقول له مش عايزين نشوفك موسى قال له ارنى مجد . ممكن اشوفك ؟
لانه قد جاء يوم غضبه العظيم ومن يستطيع الوقوف ؟ طبعا لما ييجي يوم غضبه ما حدش يقدر يقف قدامه .
اشعياء يقول ولولوا لان يوم الرب قريب قادم كخراب من القادر على كل شيء .
عايزكم تتخيلوا ان في عصابة هجمت على بيت ورفع مسدسات وسيوف . وهددوهم اي حركة واي اتصال احنا هنموتكم . وجه واحد كتف الناس دول بحبال والعصابة عمالة بتسرق . وبعدين في هذه اللحظة طب البوليس على البيت . لواء يرعب ومعه قوة كبيرة . هل كل اللي في البيت هيخاف ولا في ناس هتخاف وناس هتهلل وتفرح ؟ طب اللي جاي دوت هيقتل الموجودين ؟ ولا جاي علشان يقبض ؟ على الاشرار ويحرر المظلومين . هذا هو مجيء الرب .
عشان كده هيبقى اليوم ده مرعب لعصابة الحرمين . ومفرح لولاد ربنا . لانه انقاذ . اول ما جه البوليس بقى بالنسبة لهم ده الامل ده الانقاذ . ده هم من غير ما يتصلوا ما تعرفش به ازاي احنا مش عارفين نتصل هو جه لوحده . اول ما جه بقى فرصة نجاة للناس الغلابة وفرصة قضاء على الشر . عشان كده للاشرار نقول لهم ولولوا لان يوم الرب قريب قادم كخراب من القادر على كل شيء . عشان انا خايف تكونوا انتم خايفين . انتم لأ ده انتم هتتحرروا من القيود بتاعة الناس الاشرار . لما يقول ولولوا ده مش لنا احنا نفرح . بنقول له امين تعال يا رب يسوع مش بنقول له وننتظر قيامة الاموات وحياة الدهر الاتي . ننتظر هنا بمعنى احنا يعني بنشتاق لهذا اليوم نتطلع .
يقول من يحتمل يوم مجيئه ومن يثبت عند ظهوره يعني ايه ؟ العصابة اللي هي ماسكة لنا الاسلحة وبتخوفنا اول ما يلاقوا البوليس هيروحوا يسلموا نمر . من اللي كان عامل نفسه بطل بقى فار .
لانه مثل نار الممحص مثل اسنان الكسار . الجبال ترتجف منه في نحوم . والتلال تذوب . والارض ترفع من وجهه . والعالم وكل الساكنين فيه من يقف امام سخطة ومن يقوم في حمو غضبه غيظه ينسكب كالنار .
اوعى واحد يقول لك ربنا مش بيغضب ومش بيعاقب وطيب وصالح . ده مش معقول ما يبقاش اله . اللي هو سايب السايب في السايب ده . الصخور تنهدم منه . صالح هو الرب . حصن في يوم الضيق حصن ليا . يعرف المتوكلين عليه . ولكنه بطوفان عابر يصنع هلاكا تاما لموضعها . واعداؤه يتبعهم ظلام . في نحوم واحد من خمسة لتمانية .
لما واحد يقول لك ربنا مش بيعاقب . يبقى هو مش عارف ربنا . ولا قرا كتاب مقدس هو بيتوقع حاجات من دماغه . او حد قال له من غير ما يكون في تفكير صح . لا ده من ضمن صلاح الله انه يعاقب الانسان الشرير اللي مش بيتوب . عايزكم تتخيلوا لو شاول الطرسوسي قتل استيفانوس . وربنا ظهر له قال له يا شاول ارجع يقول له لا انا مش عايز ارجع لك انا عاجبني اللي انا فيه . وعاش بقية حياته يدمر في الكنيسة زي النيرون وغيره . كان ربنا في الاخر يدي له مكافآت واكاليل ويدخله السما . ويقول لك اخيرا قد وضع له اكليل البر . مش ممكن . لكن الميزة بقى ان شاول بالرغم ان قتل استيفانوس لكن رجع خلاص انا نسيت ان انت قتلته بالنسبة لك اتنست . اي انسان يعاكس الكنيسة ويضطهد شعب الله ويتكلم ضد المسيح . له فرصة توبة . اذا تاب ، ده عندنا اريانوس والى انصنا ناحية ملوي كان فنان في تعذيب المسيحيين لكن في الاخر بقى قديس وشهيد نسى كل اللي يعمله لكن واحد مات في شره وفي ازيته وفي عنده ومخالفته لله لا يجب له عقوبة والا الاله ده ما يبقاش اله صالح ولا طيب ولا عادل .
من ضمن صلاح الله وطيبته ان هو يعاقب الاشرار . لكن احنا نفرح بمجيء المسيح اوعوا تخافوا من النصوص الصعبة دية . ده مقصود بها انه بيقول لنا هل اخفي عن عبد ابراهيم ما انا صنعه ؟ طب انت هتعمل ايه يا رب ؟ قال انا ههلك سادم و عمورة . لكن ابراهيم انت حبيبي . فلما بيقول لنا بقى في زلزالة وفي يا بيقول لنا ما تخافوش انتم واولادي واحبائي . لكن الاشرار لهم عقوبة .
ladlamp
يسعدنا ان نقدم لكم كل ما يخص المحتوى القبطى باستمرار – كما نتمنى منكم دعمنا و تشجيعكم لنا من خلال مشاركتكم و تعليقاتكم على محتوى موقعنا – حتى نستطيع تقديم المزيد بشكل مستمر
فتابعونا دائما على [ ladlamp.com ]