سفر حزقيال ( عهد قديم ) تفسير أبونا داود لمعى ـ [6.10.2020 ] ✟ الأصحاح 43 ، 44 – 📹 📝 – ✔

بسم الأب و الابن و الروح القدس

الاله واحد أمين

نكمل تأملاتنا في سفر اصحاح تلاتة واربعين .

احنا دلوقتي في نهاية سفر حزقيال واتفقنا ان الاصلاحات الاخيرة عبارة عن وصف جميل للهيكل بس بمعاني روحية ومعاني العهد الجديد وبمعاني السما ومختلفة في بعض الامور عن الهيكل المعتاد بتاع سليمان حتى انه بعض مفسري الكتاب يسموه هيكل حزقيال . طبعا حزقيال ما لوش هيكل خاص به . لكن فى الرؤيا شاف هيكل زي ما شافه يوحنا الرائي وكانه هيكل سماوي . وده بينقلنا الى افراح العهد الجديد والعلاقة بربنا في العهد الجديد .

في اصحاح تلاتة واربعين بدأ بخبر حلو ان مجد ربنا وصل للهيكل ولو تذكره في الاصحاحات 10 – 11 ، مجد الله فارق الهيكل ، كونه فارق الهيكل معناه ترك هيكل العهد القديم ثم عاد الى هيكل شكله مختلف ببهاء مختلف وكأنه عادة في العهد الجديد لشعب جديد من المسيحيين .

يقول جاء مجد الرب الى البيت (عدد 4 ) من طريق الباب المتجه نحو الشرق فحملني روح واتى بي الى الدار الداخلية واذا بمجد الرب قد ملأ البيت وسمعت يكلمني من البيت وكان رجلا واقفا عندي .

الراجل ده ربنا يسوع . زي اشعيا زي ارميا زي دانيال كل دول شافوا المسيح بعينيهم . ولكن دي ظهورات للمسيح .

عشان كده القديس بولس فعبرانين واحد يقول بانواع وطرق شتى . كلم الله اباءنا بالانبياء .

احد الطرق هى الظهور، و ظهورات المسيح له المجد او ظهورات ملايكة او رسايل سماوية وهكذا .

وقال لي هذا الرجل ( اللي هو المسيح اللي هو المجد الظاهر لحزقيال ) قال لي يا ابن ادم هذا مكان كرسيا ومكان باطن قدمى بيتكلم عن الهيكل .

بيقول له هنا الكرسي بتاعي . تذكروا ان المزمور بيقول اي بيت تبنون لي ؟ اين هو موضع راحتي ؟ حتى ان القديس أستفانوس ذكرها والقديس بولس ذكرها في العهد الجديد . على ان ربنا ما يحدوش المكان . كون في هياكل ونسجد له في بيته . ده مش معناه ان ربنا محدود في مكان . السماوات كرسي الله والارض موطئ قدميه . وبالتالي ربنا مالي كل مكان ولا يحويه مكان . لكن ان وجد مكان مخصص مدشن و مكرس للعبادة وكأن المسيح مشي عليه فيقول ده ايه ؟ ده مكان باطن قدمي . يبقى موضع قدم المسيح هي دي الكنيسة .

عشان كده احنا بنسجد وكاننا بنبوس ارض الكنيسة لان احنا بنحس المسيح ماشي على الارض دي جوة الهيكل بنسجد ونقبل عتبة الهيكل ليه ؟ لان المسيح بيقول ده مكان كرسيا ومكان باطن قدميه .

حيث اسكن في وسط بني اسرائيل للابد .

طبعا ذكر للابد تؤكد انه لا يعني بنى اسرائيل حرف وانما يعني شعب الله عموما .

ولا ينجس بعد بيت اسرائيل اسم القدوس .

يبقى في اشارة للبيت القديم المنجس بنجاسات اليهود . فبيقول لا يعودوا ينجسون بيتي . ولا اسمي القدوس . اذا اسم الله اوهين في بيت الله قديما فاذكروا عالي الكاهن وتجاوزات اولاده تذكروا الكتبة والفريسيين اللي يعني حرفوا في التعليم فاذكروا قول ربنا يسوع له المجد سيأتي عليكم كل دم ذكي من دم هابيل الصديق الى دم زكريا ابن براخيا الذي قتلتموه بين الهيكل والمذبح . اذا الهيكل القديم ده كان شاهد على نجاسات وتجاوزات ولخبطة كتير .

فبيقول لا ينجس بعد بيت اسرائيل اسم القدوس لهم ولا ملوكهم .

يمكن بسبب الكلمة دي ربنا يسوع علمنا في الصلاة الربانية كل مرة نصلي نقول له ليتقدس اسمك . زي ما يقولها ملاخي لان اسمك عظيم بين الامم وفي كل مكان يقدم بخور لاسمك القدوس . تقديس اسم الله معناها الخشوع وذكر اسم الله بحب وبهيبة بوقار وتقديس اسم الله معناه ان احنا نعيش كما يليق باولاد الله فيتقدس اسمه فينا . يروا اعمالكم الحسنة يمجدوا او يقدسوا اباكم الذي في السماوات  .

يقول لا هم ولا ملوكهم يعني ايه ؟ هم نجسوا الاسم والملوك نجسوا الاسم ده في العهد القديم . بزناهم ولا بجثث ملوكهم . يعني ده مش هيحصل تاني خلاص في العهد الجديد لن تتنجس العبادة بالملوك لانها لم تعد عبادة تخص مملكة ارضية . انما اصبحت الكنيسة ملكوت السما . احنا ما لناش مملكة على الارض ولا لنا نظام سياسة في الدنيا . كمسيحيين احنا ملكوتنا ملكوت السما . احنا نتقدس بحمل اسم الله وروح الله ونسلك بقداسة في اي مجتمع في اي مكان . نحب الكل ونحب الخير ونبقى دايما مواطنين صالحين . لكن ليست لنا ها هنا مدينة باقية . ما لناش مكان محدد نقول دي مملكتنا على الارض . ده فكر غير مسيحي .

 

بجعلهم عتابتهم لدى عتبتي وقوائمهم لدى قوائمي وبيني وبينهم حائط فنجسوا اسم يعني ايه ؟  .

في العهد القديم استخدموا حاجة ربنا لمجدهم الباطل . استخدموا ادوات الهيكل لهواهم . استخدموا الذبايح لمزاجاتهم . استخدموا مكانتهم . كرؤساء شعب ورؤساء كهنة في ابتزاز الشعب . فهنا كانهم تجاوزوا عتبة الله تجاوزوا القوائم بمعنى يعني خدوا حاجة ربنا لحسابهم هم الشخص سرقوا ربنا . ومن هنا كان الغضب على هذا البيت والغضب على اليهود . بيتي بيت صلاة يدعى وانتم جعلتموه مغارة لصوص . هو بيته يترك لكم خرابا .

نجسوا اسم القدوس برجاستهم التي فعلوها فافنيهم بغضبي . اذا اهانة بيت الله تغضب الله . ببيتك يا رب تليق القداسة طول الايام . الخشوع في الكنيسة ضرورة .

 

الكلام في الكنيسة خطية . التهاون في دخول بيت ربنا خطية . لانه ده بيت ملائكة ده بيت تسبيح . ده بيت قداسة ده حتة من السما . اللي حاسس بحضور الله يدخل الكنيسة على طراطيف صوابعه . ويسجد للثالوس الاقدس . ويقف في مكانه كده زي العسكري في منتهى الوقار والخشوع . ويسجد مع كل سجدة لائقة .

لكن في الزمن ده فيه ناس ابتدت تتهاون ببيت ربنا . اللي تدخل لبسها خليع جوة الكنيسة . دي اهانة لبيت ربنا . طب ده هي كده بدل ما بتاخد بركة الكنيسة بتاخد غضب الله . لانها تسببت في عثرة بدل ما تمجد اسمه القدوس اهانة اسم الله بسلوك غير لائق . وفيه ناس تقول الله ايه الكلام ده ؟ ده كلام ناس متخلفين . لا ده كلام الانجيل . لباس الحشمة والورع . نساء متعهدات بتقوى الله . دي كلمات العهد الجديد . اذا الاحتشام و وقار العبادة والخشوع والهدوء في الصلاة والحرص على النظام والطاعة للمسئولين كل شيء في الكنيسة لازم يبقى بترتيبه بنظام لانه ده بيت مقدس .

فليبعدوا عني الان زناهم وجسس ملوك فاسكن في وسطهم للابد .

هم اهانوا البيت القديم انه الملوك بعضهم تجاوز زي مثلا عزاريا ده المالك دخل عاوز يعمل فيها كاهن . فاصابوا البرص . فجسس الملوك كادت تصل الى عتبة بيت الله . والجسس في العهد القديم رجاسة او نجاسة . فهنا ريحة بيت العهد القديم فيها ريحة الموت زي ما وصفها القديس بولس في كرونثوس تلاتة . لما بيبقى في خدمة العهد القديم كانت خدمة موت خدمة دينونة . لان موسى ما يقدرش يدي حياة ابدية للناس اللي ماشيين  وراها

دريان بخطاياه . من اجمل المشاعر اللي يدخل بها الانسان بيت ربنا مشاعر الخجل . عارفين تعبير ؟ اعترفوا للرب . وادخلوا ابوابه بالاعتراف .

الاعتراف ده معنيين . معنى الاعتراف بمجده . الاعتراف بفضله . باحساناته . وايضا الاعتراف بالخطية . انا يا رب ما استاهلش بيتك . انا ما استاهلش اقف وسط الملايكة . ببيتك يا رب تليق القداسة . وانا انسان خاطئ . يبقى هنا موقف الاعتراف اما بعظمة الله . واما بضعف الانسان ده موقف مظبوط جدا . انما في واحد داخل الكنيسة لا دريان بفضل الله واحساناته ولا دريان بخطيته .

اخبر بيت اسرائيل عن البيت ليغزو من اسامهم . وليقيسوا الرسم .

وهنا زي ما قال القديس بولس امتحنوا انفسكم احنا بقى مش هندخل الكنيسة نقيس الارضها وطولها وعرضها . لأ احنا بنقيس نفسنا . ما احنا هياكل لله . رح الله ساكن فينا . لازم نبقى دايما في حالة قياس . يا رب فكري ده يعجبك . عينيا دي عجباك وداني دي شغالة كويس . ايديا دي بتشتغل لحسابك . قلبي ده مليان بحبك جسدي ده يليق انه يتقدم منه ذبيحة زي الهيكل . اقيس على طول فبيقول وليقيسوا الرسم .

فان خزوا من كل ما فعلوه فعرفهم صورة البيت ورسم . يعني ايه لما الواحد يخجل من خطيته يبص على الهيكل او البيت كما يجب ان يكون . يبص على المسيح له المجد . لاننا اتخلقنا على صورته . والمسيح بتجسده وفدائه اعاد لنا الصورة دي . حط فينا البصمة الالهية عشان نرجع تاني شبهه . فنقوم نفسنا عليه . فنلاقي فين الوداعة بتاعته فينا . فين الطيبة بتاعته فين الحكمة فين القداسة الكاملة ؟

فيقول ان خزوا من كل ما فعلوا عرفهم . صورة البيت ورسمه . ومخارجه ومداخله وكل اشكاله . عشان كده تلاحظوا قراية الاناجيل الاربعة بالذات هي اساس العبادة . ليه ؟

في الاناجيل الاربعة الكنيسة بتحط قدامنا كل يوم ان كان عشية ولا باكر ولا قداس . صورة المسيح . بيدخل ويطلع ويتكلم ويروح ويجي واحنا عمالين نقيس نفسنا عليه . لان المفروض نبقى شبهه في العهد الجديد .

وكل اشكاله وكل فرائضه وكل اشكاله وكل شرائعه واكتب ذلك قدام اعينهم .

يبقى رجل الله شغلته انه دايما يصور المسيح امام اولاده . احنا شغلتنا كم معلمين ؟ نحط جمال المسيح وصورة السما قدام الناس طول الوقت عشان يقلدوا المسيح ويشتاقوا للسما . ونفضل نعلم حتى لو الناس مش عاجبها الكلام . ليه ؟ لانه ده طريق الحياة الابدية .

فيقول اكتب ذلك قدام اعينهم . ليحفظة كل رسمه وكل فرائضه ويعملوا بها . يبقى التذكرة المستمرة التعليم المستمر الرجوع للحقيقة الكتابية . فهم القصد الالهي من كل شيء . يخلي الشعب مستنير ويخاف من الخطية ويمشي في التقوى . ويبقى شعب حسب قلب الله . لكن هلك شعبي من عدم المعرفة . لو ناس ما تعرفش الانجيل بيقول ايه . ولا عارفة المسيح عاش ازاي وعمل ايه . وناسيين وصايا ربنا . خلاص بقوا نسخة من الدنيا . وكده يبقى راحوا ورا الدنيا من الباب الواسع على الهلاك . حتى كانوا اتعمدوا . لانه ربنا يسوع وصانا نتشبه به نجاهد ونسهر . ونبقى تابعين له . يعني قال امشوا ورايا . احمل صليبك واتبعني كل يوم .

هذه سنه البيت . يعني قانون هذا البيت الممثل العهد الجديد له قانون يتمثل في المسيح . يعني لو نسيت الوصايا الكتير بص على المسيح واعمل زيه . شف لو ربنا يسوع كم مطرحك كان عمل ايه ؟ مع الجيران دول مع الناس اللي في الشارع دول مع المشكلة دي . مع التجربة اللي انت فيها دي .

هذه سنه البيت على رأس الجبل . كل تخم حواليه قدس اقداس .

يعني ايه ؟ ما هو الهيكل هنا على راس جبل . فربنا يسوع بيقول لحزقيال الجبل كله مقدس .

الشعب كله مقدس . احنا في العهد الجديد مش الكهنة ممسوحين والشعب مش ممسوح . كلنا مسيحيين . كل ممسوحين . صحيح في كهنة واخدين مسئولية تقديس الاسرار وقيادة الشعب للخلاص . لكن الشعب نفسه مقدس . الشعب ممسوح بالروح القدس . كل واحد في الشعب هيكل لربنا . فكل الجبل مقدس . هذه سنة البيت بتاع العهد الجديد . يعني فرق العهد الجديد عن العهد القديم ان كل الشعب مقدس بالروح القدس . وكل شعب مدعو للقداسة . وكل الشعب يعمل في رح الله من اجل التشبه بالمسيح . هذه هي سنة البيت .

وهذه اقيسة بالازرع . ابتدى بقى ايه ؟ فرجه على اهم حاجة جوة البيت ده اللي هي الدار الداخلية دي . المذبح . طيب في العهد الجديد فيه مذبح ؟ طبعا . لكن مزبحنا في العهد الجديد زي ما ذكروا عبرانيين 13 ما قالش انه مذبح حيوانات . لأ في العهد الجديد ذبيحتنا المسيح وحده . الذي ذبح على الصليب ما زال جسده ودمه على المذبح قائما كل يوم . فصحنا المسيح ذبح لاجلنا . ربنا يسوع قال خدوا كلوا هذا هو جسدي . خدوا اشربوا هذا هو دمي الذي للعهد الجديد . الذي يسفك يبقى الدم اللي بنتناوله هو بالظبط الدم اللي يشوفه على الصليب هو هو . احنا مش بنكرر ذبايح . احنا مش بنعيد ، هي نفس الذبيحة مستمرة . بقوة الروح القدس . جسد ودم المسيح المعلق على الخشبة هو الجسد والدم اللى على المذبح هو الجسد والدم اللي بنتحد به . وهو ايضا جسد المسيح له المجد الذي يأتي في مجده ليدين الاحياء والاموات .

فهنا بيقول تعال نقيس المذبح حسب المنظر اللي شافه حزقيال وقلنا طبعا هذا التخيل ساعات يصعب علينا . فبن المقاييس بسرعة شوية لكن هنبسطها .

الزراع هي زراع وفكر كده يعني ايه ؟ دراع وحتة ايد كده عشان تبقى جهاد ونعمة . الحضن زراع يعني البيز بتاعه كده زراع والعرض زراع وحاشيته دايما كده فيه شفة طالع من المذبح حواليه .

شبر واحد هذا ظهر المذبح ومن الحضن عند الارض للخصم الاسفل دراعين . والعرض زراعه من الخصم الاصغر للخصم الاكبر . بص المذبح ده عبارة عن زي المذبح اللي انتم عارفينه . لكن معمول زي درجات اوسع وبعدين بتضيق شوية وبتضيق شوية وفوق . فيه بقى حاجة اسمها الموقدة . يعني اللي المفروض كان يتحط عليها ذبايح العهد القديم وتتحرق . فبيطلعوا له بسلالم ويبقى كل الناس شايفين المنظر لانه اعلى من كل الناس .

حكاية المذبح العالي ده المرتفع اشارة انه العلاقة بالمذبح هي قدس اقداس الحياة الروحية . يعني ايه ؟ انت بتقرا الانجيل في بيتك . بتقول تراتيل بتاخد خلوة حفظت تسبحة . شاطر . اه بتخدم ربنا . بس اقدس لحظة في سبوعك هي اللي واقف فيها قدام المسجد بتقرب من المسيح وتتحد به جسده ودمه . فما نعرفش عبادة بعيدة عن المذبح . حزقيال هنا مش بيتكلم عن هيكل قديم خلاص الهيكل القديم كان اهين . وقت حزقيال وقت السبي . حزقيال شايف المستقبل . شايف عبادة العهد الجديد وبيعبر عنها بتعبيراته اليهودية على قد ما يقدر . فبيكلمنا ان المذبح هو اغلى حاجة في المكان . اعظم حاجة . القديس بولس يقول لنا مذبح ولا سلطان لليهود الذين يأكلون من المسكن بذبائح حيوانية يعني ان يأكلوا من مذبحنا . خلاص دول ما يقدروش لان دول لسه ماسكين في الحيوانات . يجوا يتناولوا مننا ما ينفعش . دول لازم بقى ايه يقفلوا على حكاية الحيوانات المذبوحة دي . ويطلعوا برة العهد القديم ويدخلوا في عز العهد الجديد بالمعمودية والميرون . عشان يقتربوا من مذبحنا .

يكمل ويقول و الموقد اربع اذرع ومن الموقد الى فوق اربع قرون . لو تذكروا المذبح القديم كان دايما له قرون المذبح كده . يعني حتة كده معوجة كده زي القرن فعلا . واه ودي كان لها طقس جميل قوي في العهد القديم اللي يمسك في قرون المذبح كانه مسك في ايد ربنا . يقدر يقرب منه . وده ما زال هذا المعنى مستمر . اللي يحط حاله على المذبح ومشاكله على المذبح . واللي يشكي للمذبح واللي يلمس المذبح ان كان كاهن او شمامسة . وطبعا الشعب واخد الذبيحة كلها . اه اعظم من كل شيء . هنا انه اتحد اتحاد كامل بالله وبالتالي مشاكله كلها بقت عند ربنا . فقرون المذبح رمز للقوة الالهية . القرن دايما قرن خلاص . والقرن رمز للقوة . والنصرة . فهنا الانتصار كله طالع من المذبح . لو الشعب ادرك قد ايه عظمة القداس وقد ايه جمال الذبيحة اللي على المذبح ؟ وان فيها كل القوة وكل النصرة على الشياطين وكل المشاكل تتحل عند المذبح وبالمذبح ده الكون كله يتغير العالم كله ممكن يعرف المسيح بالقوة الخارجة من صليب المسيح اللي هو دلوقتي مذبح  .

وانا ان ارتفعت عن الارض المسيح له المجد قصد صليبه وقصد ايضا ذبيحة الافخارستية . اجزب الي الجميع . ومن الموقد الى فوق اربعة قرون والموقد اثنتا عشر طولا باثنتا عشر عرضا مربعا على جوانب الاربعة والخصم اربعة عشر طولا واربعة عشر عرضا على جوانبه الاربعة والحاشية حوالين نص دراعه وحضنه . يعني حاجة منتظمة الابعاد جدا . كانها بتغطي العالم كله بالصلاة كده . ولها القرون بتاعتها وواضحة وعالية قدام كل الناس .

وقال لي ( المسيح بيكلم حزقيال ) يا ابن ادم هكذا قال السيد الرب هذه فرائض المذبح . يوم صنعه لاصعاد المحرقة عليه ولرش الدم عليه . كان فيه عند اليهود زمان طقس تدشين المذبح لغاية دلوقتي عندنا الطقس ده بس بالمذبح العهد الجديد وبالمعنى الجديد . لكن عشان يبقى المكان ده مخصص لله . وهو يقدس الذبائح المرفوعة عليه . بيتحط عليه دلوقتي زيت الميرون . المذبح فيدشن . يصير كرسي لله .

فتعطي الكهنة اللاويين الذين من نسل الصدوقين المقتربين الي ليخدموه يقول السيد الرب فثور من البقر لذبيحة خطيب . هنا في عملية التدشين او التقديس دايما نحتاج للدم . في العهد القديم دم ثيران و تيوس وعجول . لكن نفس الكتاب يقول وهل يقضي الدم الثيران والتيوس ان يغفر خطية ؟ اذا كانت كلها رموز وظلال . لما جه المسيح بدمه الحقيقي بروح ازلي  . . خلاص اصبح دم المسيح مسئول عن التقديس .

فنحن نتقدس بالفداء اللي صنعه المسيح . وبطلت الحيوانات والذبايح الحيوانية . ثور من البقر لذبيحة خطيئة وتأخذهم من دمه وتضعه على قرونه الاربع يعني الدم ده ييجي على قرون المذبح عشان يصير هذا المذبح مخصصا لله . فيبقى الدم هو الاساس التقديس . لما تبص على هياكلنا احنا يعني احنا كلنا هياكل . اذا المسيح يجعلك ملك للمسيح . ويجعلك قرن خلاص تخلص وتخلص ايضا الذين يسمعونك . ليه ؟ انت شايل دم المسيح على متنا كمسيحيين مستقيم الرأي . ان احنا بنرسم صليب وبنتناول جسد ودم المسيح . ابسط مسيحي بيعمل كده  . . كده هو بينه وبين المسيح عهد كده قوة ربنا يسوع شغالة فيه . كده هو متغطي حقيقة بدم المسيح لانه بيلمسه . فالموضوع مش مجازي مش ذكرى عقلية . نقول الدم ده بقى له الفين سنة . لأ ده دم . حقيقي . دم يسوع المسيح الهنا حقيقي على المذبح كل يوم .

وتأخذ من دمه وتضعه على قرونه الاربعة وعلى اربع زوايا الخصم وعلى الحاشية حواليها فتطهره وتكفر عنه .

القديس دهبي الفهم له تعبير جميل يقول ايه ؟ يقول الافخارستية تطهر النفس وتجملها ويقول كلمة تالتة كمان وتلهبها . يعني جوة القداس بيحصل تطهير للانسان . ويحصل جمال لكل نفس جاية تصلي . وبعدين تكمل الحكاية بالافخارستية القلب يبقى ملتهب . يبقى التناول ده بيعمل لنا تطهير وتقديس وجمال يحط جمال المسيح علينا ويخلي القلب سخن .

 

كل دي حاجات بيعملها التناول فينا . الشيطان يتفنن انه يعطل الناس عن القداس والتناول  . ممكن يسيبهم يرتلوا ويسيبهم يروحوا خلوات انما يبعدوا عن التناول . لانه يدرك قوة دم المسيح وجسده . عارف القوة الجبارة المخزونة في ال مذبح . فاهم كويس . عشان كده يلهينا احيانا بشعارات وافكار وفلسفات وقرايات ودوشة . لكن لو طال يبعدنا كلنا عن المذبحة .

فيقول هنا اه تطهره وتكفر عنه وتأخذ صور الخطية فيحرق في الموضع المعين من البيت خارج الموقف . عشان كده المسيح عشان يحقق هذه النبوءات تألم خارج الباب . ده اللي استخدمه بولس في عبرانين تألم خارج المحلة لانه كان التور يتدبح وبعدين نجيب دم ونحطه بقى ايه في التدشين . وفي اليوم التاني عملية التدشين تاخد تمن 8 ايام  . ده كل يوم ذبيحة . وكأننا طول غربتنا على الارض نحتاج للافخارستية ما ينفعش واحد يقول ما انا متناول من شهر ايه يا ابني! انت تقدر تعيش من غير القوة دي! ازاي! ده يقال ان القديس كيرلس الكبير بيقول انا حزين على شعبي لانه لا يتقدم للاسرار اكتر من اربع مرات في الاسبوع . شوفوا بقى عز الكنيسة في القرن الخامس ده كنيسة اسكندرية بتاعتنا . كان الشعب عارف قوة التناول . وكان القداس اهم حاجة في حياته .

فيقول في اليوم التالي تقرب تيسا من المعزى . صحيحا . دايما الذبيحة صحيحة لانها اشارة لكمال المسيح . ذبيحة خطية . فيطهرون المذبح كما طهروه بالتور . يعني ايه ؟ ده كل ده عملية تطهير للمذبح . ده التدشين . وبالتالي احنا المذابح في العهد الجديد نتنقى بدم المسيح . نتنقى بأن نذبح ارادتنا .

قديش بولس له تعبير جميل في روميا 12 يقول قدموا اجسادكم ذبيحة ، طب ازاي انا هقدم نفسي ذبيحة جسدي ذبيحة يعني لما بقف وابقى تعبان وانا واقف ما هو عملية ذبح لما صايمين كلنا ما هو الصيام ده عملية ذبح لما بنسجد اننا مستعدين قد حسبنا كغنما للذبح لما بنقدم العبادة اللي فيها تعب كل ده عملية ذبح بالارادة . وعشان كده سماه ذبيحة حية . مش مطلوب ان احنا نموت حرفا لا . لكن بنموت طباعنا الشريرة بنموت ارادتنا الردية . فنتقدس في وضع الذبيحة ده . وبعد كده عشان يأكد انها مش حركة حرفية يعني لازم ندبح روحنا بجد ، قال عبادتكم العقلية . يبقى الزهن ده مركز قوي في الكلام القداس ويعبد الله بالقلب والفكر . هنا دي اسمها ذبيحة مقبولة .

واذا اكملت التطهير تقرب ثورا من البقر صحيحا وكبشا من الضأن . ده كل يوم في ذبيحة معزة وكبش وثور . طبعا هذا التنوع البعض ممكن يربطه بايه ؟ الجسد يتقدم ذبيحة بالصيام . والتعب والسهر والفكر يتقدم ذبيحة بالتركيز والتأمل . والقلب يقدم بالانفعال والاحساس فيبقى الانسان على بعضه كده بيذبح امام الله . تحب الرب الهك من كل  . . حط كل حاجة بقى قلبك وفكرك ونفسك وارادتك . فتلاقي ذبيحة متنوعة لان الكل يتقدس .

تقربوا قدام الرب و يلقى عليهما الكهنة ملحا . ايه حكاية الملح دي ؟ ده طقس قديم عند اليهود ومزكور في العهد الجديد في كم اية ؟ كانوا في اخر عملية حرق الذبيحة يرشوا شوية ملح . البعض قال قال يعني عشان الريحة تهدى شوية من كتر الذبايح . والبعض قال كانت تتحط الملح عشان يعني تقلل برضه العفونة من البداية . انما الملح كتير من الاباء شافوه مقصود به النعمة . عشان كده في العهد الجديد يقول ليكن في انفسكم ملح . ايه يعني حط في نفسي ملح يعني ايه ؟ يعني خلي عندك نعمة ربنا . عشان كده ليكن في انفسكم ملح وسالموا جميع الناس . ملح نعمة ربنا يخليني في حالة سلام مع كل الناس لاني عايش في نعمة . ربنا يوسع قلبي فتستحمل كل اللي حواليا . واحب حتى اعدائي دي نعمة .

 

فرشة الملح على الذبيحة معناه احنا بنجاهد لكن في ملح النعمة ده هو بقى اللي يشيل الريحة الوحشة . وهو اللي يخلي الموضوع يكمل تقديس . لانه الجهاد فقط لا يكفي . والنعمة ما تشتغلش من غير جهاد . من له يعطى ويزداد من ليس له الذي عنده يؤخذ منه . فهنا يقول يلقي عليهما الكهنة ملحا . وهنا دي اشارة للاسرار . الكاهن اللي بيدي الحل ده بيدي نعمة غفران . الكاهن اللي بيرشد ولاده دي نعمة الارشاد . الكاهن اللي بيعمد يجوا لناس وجايبين الطفل ومستعدين بس هنا نعمة المعمودية على يد الكاهن . نعمة الولادة الجديدة . فهنا النعمة مرتبطة بالكهنوت .

و يصعدونهم محرقة للرب . سبعة ايام تعمل في كل يوم تيس الخطية ويعملون ثورا من البقر وكبشا من الضأن صحيحين .

يعني تفضل طول حياتك سبع أيام دي يعني العمر كله . دماغك مع ربنا وقلبك مع ربنا وارادتك مع ربنا . كل حاجة مقدسة وصحيحة . فعبادة عقلية وعبادة جسدية وعبادة نفسية وكله رايح لربنا . تلاحظوا احنا دايما في القسمة نقول المعنى ده . طهر نفوسنا واجسادنا وارواحنا وقلوبنا وعيونا وافهامنا وافكارنا ونياتنا ، كله لازم يتطهر ده احنا هنلمس المسيح . احنا هنبقى اعلى من الملايكة . كل ده لازم يتطهر . طب احنا هنعملها ازاي دي ؟ مش في ايدينا . النعمة تعمل ده . بس احنا واقفين نصلي بنعمل الحتة اللي علينا . ونطلب ونجمع دماغنا ونسجد . لكن في دور الهي . تطهير زي ملح النعمة ده .

سبعة ايام يكفرون عن المذبح ويطهرون ويملأون يده . يعني ايه ؟ يبقى كرما في عملية تدشين المذبح ده . الانسان اللي مركز مع نقاوته . مع قداسة فكره . قداسة حواسه . تقديس اراد الله . الانسان اللي بيجاهد ده بيعجب ربنا اوي . بيفرح ربنا . لان دي كلها تعبيرات حب . معناها انك بتحب ربنا وعاوز تفرحه . وربنا بيحب القداسة . ربنا بيكره الخطية . بتحب ولاده بس بيكره الشر .

فالتطهير والتنقية الكاملة بتجيب رضا ربنا وسلام في القلب . اذا تمت هذه الايام يكون في اليوم التامن فصاعدا ان الكهن يعملون على المذبح . من يوم التامن خلاص المذبح ده بقى ايه مدشن ومتكرس يلا يشتغل بقية التاريخ كله مذبح . اليوم التامن دايما رمز لبعد السبعة . العمر سبعات يبقى تمانية بيتكلم عن بعد العمر . يبقى لو قضيت حياتك في جهاد في نشك في صلوات في اصوام في ضبط للنفس . انت يجي عليك اليوم االتامن تخرج من هذا الجسد ، اذا ما فيش جهاد تاني خلاص . صرت مقدسا مكرسا مخصصا الى اخر الدهور . خلاص خلصت جهادك . يبقى مع اليوم التامن تنتهي عملية التدشين ليه? بقت دي الحالة المستمرة بقى . ودي حالتنا في الحياة الابدية ، في السما ما عدش فيه جهاد . الجهاد دلوقتي . الشاطر اللي دلوقتي يشتغل . يصوم دلوقتي في السما ما فيش صيام . بس هتقول يا ريتني صومت . دلوقتي سبح ليس في الموتى من يزكر ولا في الجحيم من يشكر . دلوقتي وقت خدمة وتعب هناك . ما فيش خدمة من النوع اللي فيه تعب . دلوقتي ضبط الحواس وضبط الارادة وضبط الفكر كويس اشتغل . لكن اول ما تخلص العمر خلاص دخلت على حالة من القداسة لو كنت عملت في السبع أيام طول العمر اللي بيتقال لك . لو كنت اجتهدت وخضعت للوصايا وركزت في تقديس نفسك لله . وعمل النعمة بيساعدك ، ساعتها تدخل على حالة مستمرة من اليوم الثامن . اليوم التامن ده الحد . ما هو السبت سبعة . فالحد تمانية يبقى بعد العمر بقى .

اذا تمت هذه الايام يكون في اليوم الثامن فصاعدا ان الكهن يعملون على المذبح محرقاتكم ذبائحكم السلمية . نكمل بالتسبيح بقى في السما على طول . وبدون تعب كمان . فارضى عنكم يقول السيد الرب .

ربنا بيفرح لما يلاقوا ولاده مركزيين معه . اللي جاي الكنيسة بدري . واللي بيعمل مطنيات بجد . واللي بيرسم الصليب بالراحة . واللي مركز في كل جملة واللي مراعي سلامه مع كل الناس واللي واخدها جد في ضبط جسده وحواسه كل ده ربنا بيشوف ويرضى عليه ويفرح به .

اصحاح اربعة واربعين :-

ثم ارجعني الى طريق باب المقدس الخارجي المتجه للمشرق . بعد ما خلصنا فرجة على المذبح الوسطاني ده خده تاني ناحية الباب الشرقي وده اهم باب . لان ده مدخل كل المدينة المقدسة . وهو مغلق . بعدين بقى استغرب حزقيان لانه جت له رسالة جديدة من نوعها . فقال لي الرب - الرب اللي هو ربنا يسوع اللي ظهر له - هذا الباب يكون مغلقا . لا يفتح ولا يدخل منه انسان . لان الرب اله اسرائيل دخل منه سيكون مغلقا .

اباء الكنيسة منهم قالوا ده رمز من رموز بتولية العدرا . ليه ؟ لانه ربنا يسوع له المجد سكنا في احشاء امنا العدرا . وخرج الينا متجسدا وهذا الباب يكون مغلقا . امنا العذراء نقولها كده زي ما علمونا الاباء . دائمة البتولين . البتولية قبل الحبل واسناء الحبل واسناء الولادة وبعد الولادة هي دائمة البتولية .

لان هذا الباب باب عجيب خاص بالمسيح وحده . بعضهم شاف انه الاشارة الى المسيح نفسه كأنه ليس باحد غيره الخلاص . يعني المسيح يعدي من الباب ويقفل . اللي لازقين في المسيح هيعدوا معه . طب اللي مش لزقين في المسيح ما لهمش خلاص .

وارجوكم انتبهوا لهذه العقيدة . ربنا يسوع اعلنها مرارا وتكرارا . من يؤمن بالابن ليست له الحياة . من لا يؤمن بابن الله يمكث عليه غضب الله . المسيح قال انا هو الباب لا يستطيع احد ان يأتي الى الاب الا بي . انا هو الطريق . انا هو القيامة . انا هو الحياة . يبقى برة المسيح موت . فاي حد ممكن النهاردة يدعي ان في ناس اخلاقها كويسة تروح السما هو بيقول حاجة ما قلهاش المسيح . ده اقتراحه هو . ده عرض منه دي فكرة من البشر . لكن دي كذبة من الشيطان . لان الطريق الحقيقي هو المسيح وحده . وهذا الباب يكون مغلقا . يعني ايه ؟ ما حدش يقدر يجتاز طريق الخلاص الا المسيح وحده . طب واحنا نلزق في المسيح ؟ محسوبين عليه . احنا شايلين روحه . احنا لازقين له بالافخارستية . احنا ما فيش اسم بنعرف نقوله الا اسم ربنا يسوع . وليس اسم اخر تحت السماء به ينبغي ان نخلص . هذه العقيدة هي حجر اساس الايمان المسيحي كله . لو تنازل المسيحيون بادعاء ان في ناس ممكن تدخل السما بدون المسيح ما عادوا مسيحيين . لان اباءنا كانوا يستشهدوا على دي . يعني ايه ؟ المسيح المسيح المسيح . طب يا اخي يعني اقبل شوية بخور للاوثان ولا كبر دماغك ؟ ولا فيه ناس حلوة تاني عايشة ما لهاش دعوة بالمسيح . ما بيتنازلوش ليه ؟ لانه هو طريق واحد للسما . وما اوسع الباب وارحب الطريق المؤدى للهلاك . فيه اقتراحات كتير . وفيه بقى فلاسفة كتير وفيه افكار غريبة كتير بس ده كله مش تبع ربنا .

يكون مغلقا . الرئيس الرئيس ده على المسيح نفسه . الريس الريس الكبير الريس الكل ملك الملوك . هو يجلس فيه . يعني هذا الباب خاص بربنا نفسه . باب الخلاص . هو يجلس فيه عشان كده هتلاحظوا ان الهيكل يسموه هيكل لله الاب وفي حضن الاب المسيح قاعد على العرش . هو رئيس خلاصنا . ده تعبير العبرانيين . هو ريسنا اللي ماشيين وراه . فمش هنمشي ورا اي شخص تاني ما يقدرش يدينا الحياة الابدية .

الرئيس الرئيس هو يجلس فيه ليأكل خبزا امام الرب . يعني ايه ؟ وكأنها اشارة ان المسيح يعمل في كهناته في العهد الجديد ويعطيهم خبز الحياة . لان المسيح العامل في الكهنوت . احنا ما نقدرش نقدس . ازاي ناخد قربانا وتبقى جسد المسيح ؟ ايه يعني قوتي كانسان عشان اعمل كده ؟ لكن الكهنوت المأخوذ من رب المجد . من رئيس الكهنة الاعظم . يجعلنا قادرين على هذا السر . على هذه المعجزة دي خاصة بالروح القدس . احنا ادوات في ايدين الروح القدس . فنعطي خبز الحياة لشعب المسيح بقوة المسيح الساكن فينا بروحه .

الرئيس الرئيس هو يجلس فيه ليأكل خبزا امام الرب . من طريق رواق الباب يدخل ومن طريقه يخرج

يعني المسيح يتقدم طريق خلاصنا كده . زي ما وظف نفسه كراعي صالح قال خراف تتبعه . لانها تعرف صوته ولا تتبع الغريب لانها لا تعرف صوت الغريب . يدعو خرافه الخاصة باسمائها ويخرجها . ومتى اخرج خرافة الخاصة يذهب امامه و الخراف تتبعه . فالمسيح اتحرك قدامنا وكلنا كمؤمنين ماشيين وراه  . نطلع على الصليب يلا نروح على الصليب ندخل القبر ندخل القبر وراك نطلع على القيامة نمشي وراك في القيامة . وبعدين نحتفل معك في السما بالمجد الابدي .

ثم اتى بي في طريق باب الشمال الى قدام البيت فنظرة واذا بمجد الرب قد ملأ بيت الرب . يبقى ده اشارة للعهد الجديد لان مجد الرب يسكن في اولاد الله في العهد الجديد . فطبعا حزقيال فرحان جدا لان المجد فارق الهيكل في اورشليم وهو يراه في الرؤيا في المستقبل بيت ربنا في مجد الهي حقيقي .

ملأ بيت الرب فخررته على وجهي . عشان كده بيت ربنا يليق بالسجود . استغرب ان شمامسة ساعات تكسل تسجد . فانت جاي تعمل ايه طيب ؟ ده احنا جايين في هذا المكان نقبل باطن قدمين المسيح على ارض ونخر على وجوهنا ده انبياء وابرار . متى رأوا المجد الالهي ؟ كانوا يخروا على وجوههم . انت هتبقى اعزم من ايليا النبي اللي خر على وجهه من موسى النبي اللي خر على وجهه من التلاميذ يوم التجلي اللي خروا على وجوههم . ليه الناس بستكتر السجود ده السجود علامة خشوع وعلامة ايمان وعلامة شكر وعلامة اعتراف وعلامة خجل التوبة وعلامة حب وعلامة كل حاجة حلوة . لكن زي ما قال المسيح هذا السجود ينبغي ان يكون للاب بالروح والحق .

خررت على وجهي قال لي الرب يا ابن ادم اجعل قلبك وانظر بعنيك واسمع باذنيك كل ما اقول لك .

ركزوا في الاية دي بقى . اجعل قلبك وانظر بعينيك . واسمع باذنيك كل ما اقوله لك عن كل فرائض بيت الرب . دي رسالة يا احبائي قلبك مشغول بكلمة ربنا . عينيك مركزة في وصايا ربنا ودانك بتسمع صوت ربنا . دي حالة محب المسيح . دي حالة القداسة . قلبك جعل على هذا الامر . جعلت قلبك يعني مركز . يعني ده الموضوع اللي شاغلك . عينيك مفتوحة على ربنا وصيته . ودانك مفتوحة على كلامه طول الوقت . يبقى ربنا يسوع نفسه بيقول كده . قلبك فين ؟ ودانك فين ؟ عينيك فين ؟ يبقى دي العبادة . داخل هذا الهيكل لازم القلب يبقى كله ملك لله . والعين طوبى لعيونكم وللودن طوبى لاذانكم . فلنستحق ان نسمع ونعمل باناجيلك المقدسة . يبقى الطبيعي ان الواحد يخلي قلبه في الحاجة لانه كتير ما نصلي . ويبقى

 

ويبقى القلب في حتة تانية . وتبقى العين زيغة يمين وشمال وتبقى الودان . يعني الكلام مطرطش فيها بتاع الدنيا . طب انت جاي تقف قدام ربنا ازاي ؟ يا ابن ادم اجعل قلبك وانظر بعنيك واسمع باذنيك كل ما اقوله لك . ما اجمل الشخص المبتلع تماما داخل اللوتورجية داخل القداس . يبقى كده مش دريان باللي حواليه . منفصل عن العالم . كل حواسه وافكاره ومشاعره دخلت كده جوة القداس . هي دي الحالة اللي تدوقه طعم السماء . هي دي اللي تخليه يصح ملكوت الله داخلكم . هي دي اللي يطلع من القداس يحس انا كنت في السما . انا لمست المسيح . انا دوقت حاجة عمري ما في الدنيا تاني ويبقى مشتاق يرجع للمذبح كل يوم .

اجعل قلبك وانظر بعينيك واسمع بودانك كل ما اقوله لك عن كل فرائض بيت الرب . برضو هنا الانتباه للطقس الفرائض بيت الرب . تنبهنا انه الطقس يا احبائي ضروري . هو الوعاء المقدس اللي بندلق من خلاله مشاعرنا وافكارنا كذبيحة حب لربنا . يعني من غير الطقوس كنا نمل . لكن ده كل حركة كل لحن كل ايقونة كل شمعة كل لبس كل حاجة بتحصل بنظام لها معنى ولها مغزى ولها خلفية كتابية ولها عمق . فدي جواهر مقدسة . فرائد بيت الرب الطقوس دي اساسية جدا في العبادة . وربنا يسوع له المجد ما هو عمل طقوس . مش هو اللي اسس العشاء الرباني بنفسه . بيبقى هو ربنا يسوع مؤسس الاسرار . ما حدش اسسها بعد المسيح . المسيح هو المؤسس . وهو اللي مثلا في الصباح باكرا خرج يصلي في موضع خلاء . طب ما هو صلاة باكر اهو . وبعدين تلاميذه لقيناهم طالعين يصلوا صلاة التاسعة في الهيكل . في اجبية يعني او في سواعي .

اذا فرائض بيت الرب بحيث ان كل شيء يبقى منظم وبترتيب ده تعليم كتابي . ويبقى كل حاجة لها معناها يجعلك تتزوق كل شيء . لانه السما الهنا اله النظام . مين قال ان السما هتبقى عشوائية ، لا من دواعي الجمال دايما النظام والتركيب . فالجمال اللي يعمله ربنا ان كانت الارض دي منظمة وجميلة . كم وكم تبقى جمال السما ؟ وكمالها في كل شيء .

وعن كل سنانة واجعل قلبك على مدخل البيت . يعني ايه ؟

اهم حاجة في الطقس انك طول الوقت مركز في المسيح نفسه . الطقس على غير ما الناس اعداء الطقس يقولوا بيشتتنا عن المسيح . لأ . ده هو الطقس اساسه كله يزقك على المسيح . ده انت الشوريا يمشي بها ابونا الجمرة دي بتشاور لك على المسيح . ده الشمعة اللي بتتحرق دي بتشاور لك على المسيح . ده الايقونات كلها مرسومة على شبه المسيح . ده الالحان كلها فيها اسم ربنا يسوع . ده السجود نسجد للمسيح له كل المجد . المسيح هو اساس الطقس . هو المدخل بتاع كل طقوس . فاحنا مش بنمارس طقوس في حد ذاتها لها هي لأ الطقوس كلها وسيلة للاحساس والفهم والادراك والتمتع بالاتحاد بالمسيح .

فيقول اجعل وجهك على مدخل البيت . اتفقنا مدخل البيت اللي هو هو الباب انا هو الطريق يبقى المسيح . مع كل مخارج المقدس . يبقى اللي مركز في ربنا يسوع قادر يستمتع بالطقس ويعيش في جو سماوي .

 

لالهنا كل مجد وكرامة . الى الابد امين .