تفسير سفر الحكمة - الأسفار القانونية الثانية ( عهد قديم ) - أبونا داود لمعى ✟ أصحاح 6
بسم الأب و الابن و الروح القدس الاله الواحد امين.
نكمل تأملاتنا في سفر الحكمة. اصحاح خمسة اخر جزء.
أفكركم سفر الحكمة احد الاصفار اللي بنسميها الاصفار الحكمية وساعات يسموها الشعرية او الادبية وهي مجموعة من الاسفار فيها كرامة خاصة زي المزامير وايوب والامثال و الجامعة ونشيد الانشاد والحكمة ويشوع ابن سيراخ. ومنها بناخد مبادئ الحياة عموما. وان كان يغلب على سفر المزامير روحه الصلاة. لكن كمان مليان حكمة. فطبيعي من اسم السفر. او حتى لقب مجموعة الاسفار دي ، اللي يدرسها يزداد حكمة. والحكمة في الاسفار دي اما مقصود بها صفة الحكمة. يعني الانسان يبقى عنده حكمة. حكمة في الكلام وحكمة في التصرف. حكمة في ادراك الأموار ، لكن كمان فيها معنى اعمق هو اقتناء المسيح نفسه. المسيح هو الحكمة. ففكرة ان واحد يبقى حكيم مش مجرد واحد ذكي مثلا لا. الذكاء غير الحكمة. الحكمة معناها انه في قراءة دقيقة للواقع في فهم لارادة الله في تدبير للامور في تخطي للمشاكل في سعي وراء الحياة الابدية كل ده اسمه الحكمة.
وسفر الحكمة مختلط دايما بفكرة مخافة الله. يعني اسفار الحكمة اكتر اصفار يجي فيها ذكر خوف الله او مخافة الله. كلكم حافظين الاية المشهورة بتاعة رأس الحكمة مخافة الله. وفي ايات تانية تقول بدء الحكمة مخافة الله.
الجزء اللي كنا فيه المرة اللي فاتت في حكمة خامسة. بيتكلم عن الصديقين وعن الاشرار. والحكمة دايما تقارن بين الابرار والاشرار. مصير دول ومصير دول. سلوك دول وسلوك دول. فبيتكلم في اخر الحكمة خمسة. كان بيتكلم عن يتخذوا القداسة لا يقهر. كلام عن كل حكيم يبقى دائما يحتمي في القداسة. ويحدد غضبه سيفا ماضيا والعالم يحارب معه الجهال. يعني هذا القديس يحارب الجهل اللي في العالم والشر اللي في العالم. وعائز يعقل الناس يعني. رأس كل القديسين قدوس القديسين اقنوم الحكمة ربنا يسوع. فتنطلق صواعق البروق انطلاقا لا يخطئ. وعن قوس الغيوم المحكمة التوتير تطير الى الهدف. يعني الاشرار يجي لهم عقاب منشن عليهم لما يكون واحد عنيد مع الحق ومصر على جهله وغباؤه وشره ، تجيله الصواعق كأنها سايبة الدنيا كلها ومنشنة عليه. لان ربنا لا يخطئ في احكامه. يعني مش الشر بيجي وخلاص لا ربنا له تدبير وطابط الكل وكل حاجة محسوبة عنده.
سخطه يرجمهم ببرد ضخم ومياه البحر تستشيط عليهم. والانهار تلتقي بطغيان شديد. ضربة البرد مثلا سمعنا عنها في ضربات مصر بتاعة الفراعنة. وحكاية ماية البحر تهيج عليهم دي شفنا برضه فرعون غرق هو وعساكره في البحر الاحمر. اذا ربنا مهما ترك الاشرار فترة لعلهم يتوبوا. العقاب في الاخر شديد.
وتثور ريح شديدة زوبعة تذريهم والاسم يدمر جميع الارض والفجور يقلب عروش المقتدرين. الناس مش بترضى تشوف ان الشر يبوظ العالم. يعني الشيطان لانه كداب مسيح اللي قال كده كداب وابو الكداب يطلق اكذوبة ان الشر متعة وان الشر فايدة وان التطاول بتاعه يقول لك ان الشر حكمة منتهى الكذب بعكس الحقيقة والناس تتصور ان الشر يديها سعادة او حياة طويلة سعيدة. الحقيقة الشر نهايته وحشة. وهو اللي يقلب الناس على بعض. هو اللي يدمر الحياة. ونهايته دايما واضحة انها ردية. لكن مين يصدقه؟.
يقول له اشعياء يا رب من صدق خبرنا ولمن استعلنة زراع الرب. ناس مش بت تصدق الحق. يحبوا يمشوا وراء الاكاذيب. العالم يتباهى بالشرور. بينما الشر معناه دايما نهاية للعالم. او نهاية للشرور. تثور عليهم ريح شديدة و زوبعه تزريهم. والاثم يدمر جميع الارض. الشر يدمر العالم. يقلب عروش المقتدرين. في بلاد حوالينا تتباهى اليومين دول بشر. تتباهى بقوتها العسكرية وتتباهى بفلسفتها الجديدة. وفي بلاد بتتباهى بانكار وجود الله. تتباهى انها يعني بتعيش من غير ربنا وتحتقر المتدينين او المؤمنين. طب ده معناه ان النهاية قربت. منهم على الاقل. وان ده بداية الانهيار. الشعوب اللي بتركن ربنا دي وتبقى شايفة روحها. ده طبعا شعوب خضعت للشيطان والشيطان مكار وشرير ودايما غرضه وحش.
أصحاح سته : -
الحكمة خير من القوة والحكيم افضل من الجبار. المبدأ ده هيتلقى اتقال كتير في يسوع ابن سيراخ وفي الامثال وفي الجامعة. وهنا الفسر الحكمة. الحكمة خير من القوة. القوة اما قوة عضلات او قوة ذكاء او قوة مادية فلوس او قوة علاقات. كل دي الناس بتحسها قوة واحد مسنود يعني. الحكمة خير من القوة. يعني الحكمة معناها ارتباط بربنا. و المرتبط بربنا عنده مصدر القوة كله. يعني حطوا مثلا الموقف بتاع اليشع النبي مع ملك ارام. بعت جيش كامل عشان ياخد أليشع. من ناحية القوة. طب ده جيش. واليشع ده غلبان. كانه راهب في جبل . انما في الاخر قصة كانت لصالح اليشع لانه تبع ربنا. وهو اللي قاد كل الجيش ده ودخلهم عند ملك اسرائيل قال له اضربهم قال له لا ما تضربهمش اكلهم وروحهم. عشان يعرفوا كانه بيقول له عشان يعرفوا ان الحكمة خير من القوة. ووقفت الحرب كذا سنة بسبب حكمتها أليشع .
اذا الانسان الحكيم بيدبر الامور بطريقة لا تحتاج الى قوة بشرية او قوة مادية ويحل المشاكل بالحكمة. وطبعا زي ما اتفقنا ان سفر الحكمة كل اية تخلينا نقول يا رب اديني حكمة. عشان نبقى اقوى حتى من الشياطين ومن كل المشاكل بالحكمة.
الحكمة خير من القوة والحكيم افضل من الجبار. الشخص اللي بيعجز بيحس ان قوته بتقل. لا انت مش محتاج قوة بدنية وانت بتعجز ، محتاج حكمة. اما تقرب من ربنا اكتر تبقى حكمتك دي اقوى من اي قوة.
وانتم ايها الملوك اسمعوا وتعقلوا. ويا قضاة اقاصي الارض اتعظوا. اصغوا ايها المتسلطون على الجماهير. المفتخرون بجموع الامم. اشمعنى الحكمة رسالة خاصة للملوك واصحاب السلطة ؟ لان الفئات دي بالذات السلطة بتعميهم شوية. الشخص لما يبقى تحت ايده سلطة كبيرة. تستهويه فيفقد الحكمة ويمشي بنوع من الكبرياء. الكبرياء دايما ضد الحكمة. ويتصور ان هو اللي يقدر يغير الدنيا كلها. فتاذكروا ان نبوخذنصر. في وقت جت له ضربة كبرياء. وشاف نفسه أقوى واحد في الدنيا. و دانيال لانه كان قريب له وكان بمثابة مستشار له او رئيس وزراء عنده. حذره. بعد ما شاف حلم كده وشاف ان الحلم ده هيتقلب على الملك نفسه. فقال له توب عن شرك. وارجع عن كبريائك. وادي المجد لرب ، دانيال وعظه وبشره. ومع هذا نبوخذنصر لم يرجع عن كبريائه. وجات له بقى ايه خبطة شيطان كده وكأنها لوسة عقلية قعد سبع سنين. هيمان في الغابات كانه حيوان. وبعدين رجع لعقله واستناره وتاب واتعظ مجد ربنا.
اذا الملوك والذين في سلطة يحتاجوا جدا للحكمة. وكل ما واحد خد مسئولية اكبر كله محتاج حكمة اكتر. والحكمة دايما ملتصقة بالتواضع. انها عاوزة نعمة من ربنا. متواضعون يجدون نعمة. فاللى عايز حكمة يزداد تواضعا. والتواضع يدي له حكمة اكبر.
فبيقول اصغوا ايها المتسلطون على الجماهير المفتخرون بدموع الامم. يعني ما تبقى عندك ناس كتيرة تبعك. ما تفتخرش بدي. دي مسئولية كبيرة عليك. مسئولية على الناس مسئولية ضخمة. عندنا في الاسبوع اللي فات فى السنكسار كان عيد. واحد من بطاركة الكنيسة اسمه القديس مكاريوس. البطرك تسعة وخمسين. اه هو كان يتيم الاب من صغره. وربته امه تربية تقية ودخل الدير بقى راهب ورئيس دير وبعدين بقى بطرك. وعدى على قريته عشان يسلم على امه بعد ما بقى بطرك. فامه ما رضيتش ترفع وشها فيه. وفضلت تشتغل في المغزل. وقال لها يا ماما يعني انا ابنك. مكاريوس. فبصت و الدموع في عنيها و قالت له يا ابني انا كنت خائفة عليك عشان خلاص نفسك. دلوقتي خائفة عليك عشان خلاصك انت وشعبك. فبقيت مسئول عن شعب و ده الهم كبير. ورجعت تكمل شغلها. واحتفظ بهذه الروح او هذه التوصية بقية حياته. فحسست بالمسئولية يعني ما تخدهاش من ناحية كرامة. خدها من ناحية مسئولية. فلما تكون مسئول ما تستهوكش المسؤلية او السلطة. فكر لما تقف قدام ربنا تتسأل. ما انت هتتسأل حسابك اصعب من الشخص العادي. بحكم المسؤولية.
اسمعوا وتعقلوا الملوك يا قضاة اقاصي الارض اتعظوا اصغوا ايها المتسلطون على الجماهير المفتخرون بجموع الامم. فان سلطانكم من الرب. حكمة جميلة قوي. قاعدة حطها الانجيل قال لا يقدر احد ان يأخذ ما لم يكن قد اعطي له من فوق ، يعني ما حدش هيقدر ياخد منصب كبير الا لو كان ترتيب الهي. فسلطان اصحاب السلطان هو ترتيب الهية. ومن هنا لازم يخافوا ربنا. لان اللي ادى له المسئولية هيحاسبه عليها. اللي بقى ركن ربنا تصور انه بشطرته وصل الى هذه الدرجة او المكانة او المسئولية هو نسى ربنا. سلطانكم من الرب وقدرتكم من العالى. افرض واحد قال انا بذكائي وصلت للمركز ده. وهو الذكاء ده انت اشتريته. ما انت خدته من ربنا. قال بجهادي وتعبي انا سعيت واشتغلت لغاية ما اترقيت ووصلت. وهو الجهاد ده جه منين؟ مش المجهود ده عطية من ربنا. حتى لو افترضنا انك انت تعبت اكتر من غيرك. مش ده برضو نعمة من ربنا.
سلطانكم من الرب وقدرتكم من العالي الذي سيفحص اعمالكم. ويستقص نياتكم. حكمة جميلة. يفحص اعمالكم يعني كل حاجة الواحد بيعملها بالذات لو كان مسئول. هيتسأل عليه. ومش بس الاعمال النيات بقى كمان. لان ممكن تبقى بتعمل خير لكن النية اللي وراها انانية. او شريرة. الغرض مش نقي. بس الظاهر العمل شكله كويس. يفحص الاعمال ويستقصي النيات. لان ممكن الاعمال الظاهرة تخدع الناس. الكلام سهل. والخدمات العامة الناس بتمجدها. طب والنيات ، يبقى عند ربنا. من يستقصيها ، روح الله اللي بيشوف كل حاجة. وده برضو له حسابه عند ربنا. لان قد يكون شخص نيته نقية اعماله محدودة. وقد يكون شخص نيته مش حلوة واعماله كتيرة. عشان الناس تمجده لكن قدام ربنا يقف كمرائي. غشاش. ممكن يضحك على الناس بس مش هيعرف يضحك على ربنا. عشان كده القديس بولس يقول حكمة. يقول اقل شيء عندي ان يحكم في من يوم بشر. كون البشر يحكموا علي دي حاجة متشغلني .
الذي يحكم في هو الرب الذي سينير خفايا الظلام. ويكشف اراء القلوب حينئذ يكون المدح لكل واحد من الله. القلب فيه ايه ؟ دي حاجة يعرفها ربنا. هتبان. تبان في الاخر لان ربنا فاحص القلوب.
فان سلطانكم من الرب وقدرتكم من العالي الذي سيفحص اعمالكم ويستقصي نياتكم. فانكم انتم الخادمين لملكه. لن تحكموا حكم الحق ولم تحفظوا الشريعة ولم تسيروا بحسب مشيئة الله
أغلب ملوك الدنيا كده. عشان كده بيقولها بشكل عام انه انتم المفروض تخدموا ملك الكون ربنا. انتم الخادمين لملكه. لم تحكموا حكم الحق . ولم تحفظوا الشريعة ولم تسيروا حسب مشيئة الله. يقول له ساعات السياسة ما فيهاش اخلاق مش كده. ما نقصدش غير انه احيانا طرق هذا الدهر غير مستقيمة. فيعني للوصول الى بعض الامور تلاقي السكك ملتوية. انما طريق ربنا طريق نقى ما فيهوش التواء. وفيه نقاوة في الغرض وفي الوسيلة. يعني الغرض سليم والوسيلة سليمة. لكن ما في من دهاء او مكر او خبث او غش او الحاجات دي طبعا كلها ضد ربنا.
فبيقول لم تحفظوا الشريعة و لم تسير بحسب مشيئة الله وكأنها دعوة لكل المسئولين في كل العصور امشوا حسب مشيئة الله. ما تاخد مكانة كبيرة اسأل ربنا. ادير الشعب ده ازاي؟ ، زي موسى النبي كان واخد مسئولية كبيرة. لكن كان مرجعه ربنا. فصار حسب مشيئة الله. داوود النبي لما قعد على كرسي الملك كان رجل مزامير. كل اللي بيعمله بيرجع لربنا يا رب ماذا تريد ان افعل ؟ فطلعت المملكة مملكة مستقيمة. اتعلموا كلهم عبادة ربنا. وحفظوا مزامير. وكانت في ابهى عصورها. لانه كان يبتغي مشيئة الله. بيدور رأي ربنا ايه؟ رضا ربنا فين؟ ويعمله. ومن هنا نجاح ارضى ونجاح سما. والعكس بقى لما واحد ينسى ربنا ويعمل طموحاته هو يخسر في الارض ويخسر في السما.
فسيطلع عليكم بغتة مطلعا مخيفا ، دول بقى الملوك والسلاطين اللي هم ضد مشيئته. يطلع عليكم بغتة مطلعا مخيفا. لانه سيقضي على الحكام قضاء شديدا. يعني لكم يوم ولكم حساب شديد. ليه ؟ لان انتم مسئولين. مش مسئولية عن نفسك بس مسئول عن اللي وراك. عشان كده المضللين عبر التاريخ. حسابهم اصعب من المضللين. يعني في واحد الناس ضحكت عليه. هو برضو غلطان بدرجة لانه كل واحد مسئول عن قراره. يعني تنقصه الحكمة فاتضحك عليه. لكن بقى اللي ضلله. واللي غشه واللي ضحك عليه. واللي سحبه في اتجاه غلط. حسابه اصعب.
فان الصغير اهل للرحمة. اما ارباب القوة فبقوة يفحصون . برضو حكمة جميلة اما يقول الصغير اهلا يعني الشخص الغلبان لا مسؤول ولا ملك ولا سلطان على قده هو ده لانه على قده اهل للرحمة يوم ما بيغلط غلطته بسيطة مشكلته بسيطة علاجه سهل لانه غلبان. الصغير هنا يقصد صغير في المسؤولية وفي المعرفة. وفي الحكمة وفي العقل. تلاقي واحد يقول الاطفال اللي ولدوا يعني ناقصي ايه عقل شوية او ذوي احتياجات خاصة. دول اهل للرحمة دول اول ناس يسسبقونا للسما. دول اكتر ناس مطوابين في السما لان اخطائهم قليلة. ولان على قد الوزنات البسيطة اللي في حياتهم ياخدوا اجرهم. طب بقى اللي عندهم عقل بقى عندهم فرص. ويعني يقدروا يميزوا طب ما الحياة مطلوب منهم اكتر الذين يودعونه كثيرا يطالبونه باكثر. في عيلة الصغير اهل للرحمة .
اما ارباب القوة فبقوة يفحصون. عشان كده الواحد يميل انه يبقى صغير امام نفسه. يعني مهما ربنا اداك وكبرت شوية في المكان او المكانة لازم تبقى انت شايف نفسك صغير ما تبقاش شايف نفسك كبير. لان الصغير اهله للرحمة. ما تكبرش في عينين نفسك ابدا. افتكر انك في الاخر تراب. وافتكر انه اي حاجة حلوة دي هدية من ربنا.
نعمة من ربنا. فالتمسك بحكاية انا صغير. ده يحميك من حاجات كتيرة.
ورب الجميع لا يستسني احدا. يعني ما فيش عند ربنا استسناءات يوم الدينونة. ما ينفعش واحد قل له انا شرير بس انا كنت اعرف ماري جرجس مثلا اقول له يعني ايه طب ما مشيتش ليه زي ماري جرجس لو تعرفه؟ ربه الجميع لا يستسني احدا. خلاص انت زيك زي غيرك هتتحاسب. هتتحاسب عن حياتك وعقلك واولادك وبيتك و زناتك وفرصك وعمرك والوقت اللي خدته الفرص اللي خدتها انت غير مستسنا. بعض الناس بتظن ان لها استسناءات. لأ. استسناء الوحيد ده ما فيش استسناء لكن اذا كنت عشت بتعمل رحمة يبقى لك رحمة. طوبى للرحماء لانهم يرحمون. وويل لغير الرحماء ليس رحمة لمن لم يعمل رحمة. فلا تستسني نفسك ما تبصش على ان الاشرار دول حسابهم عسير وانت ما لكش في ده. طب اذا ما توبتش ما انت زيهم. ولا يستسنى احد في الاية اللي تخوف دي ان لم تتوبوا جه بعدها كلمة تقول ايه ؟ جميعكم كذلك تهلكون. اذا ما فيش استسناءات كله محتاج للتوبة. كله لازم يتوب. لا تقول كاهن ولا شماس ولا خادم. كله محتاج يتوب. لان الكل هيقف قدام ربنا.
رب الجميع لا يستسني احدا ولا يهاب العظمة لان الصغير والعظيم كليهما صنعه على السواء وعنايته تعم الجميع. الصغير والعظيم الاتنين ربنا عاملهم. وعناية ربنا تعم الكل.
لكن على الاشداء امتحانا شديدا. يعني الناس بقى اللي شايفة نفسها شديدة لهم امتحان شديد. برضو ده كلام يخوف ليه ؟ ما تشوفش نفسك شديد قل انا رب ضعيف. انا مش قد التجارب.
( اتعلمت درس جميل من شخص زمان. قال لي انا ربنا مانع عني تجارب كبيرة. اصل اللي بتجربه تجارب كبيرة دول شداد. دول اقويا. ايمانهم قوي. انا غلبان انا ايماني ضعيف. انا ما استحملش. فربنا عافيني من حاجات كتيرة مش لاني كويسة. لاني اقل من الناس دي كلها ). 23
اللي عندهم التجارب الشديدة دول اقوياء. ويجدوا نعمة في عينيه. انا مش طالب ان انا بس يحطني على باب السما. يبقى حتى لو جت تجارب للي حواليك ما جتش لك ده مش معناه انك انت احسن منهم. ده معناه انك انت ما تقدرش تستحمل اللي هم مستحملينه. لانه على الاشداء يأتي امتحان شديد. كنت شايف نفسك شديد طب خد امتحان شديد. بدال انت شديد يبقى خليك ضعيف احسن. عشان ييجي امتحانك على قدك. واهرب لحياتك. زي في قاعدة في الحياة الروحية. قدام الخطايا ما تعملش جدع ابدا. ما تثقش في نفسك ابدا قدام اي خداع او شهوة.
ما تقولش مثلا انا كبرت في السن يعني عنيا مش هتقع في اللي بيقعوا فيه الشباب. لا ما فيش حاجة اسمها كده. اهرب. ما تقولش يعني انا باخد بالي اتعودت خلاص ما اتكلمش اي كلام. فلو قعدت اي قعدة ما بغلطش. لا هتغلط. ما حدش كبير على الغلط. ما تعملش فيها شديد. اهرب لحياتك. قول انا الغلبان. انا صغير. انا مش قد قاعدة فيها كلام بطال. وعلى قد ما كان فيه صور خليعة. ولا اده موقف اطر اغلط فيه. لا مش اجري احسن.
لكن على الاشداء امتحانا شديدا. اليكم ايها الملوك توجيه كلامي لكي تتعلموا الحكمة ولا تسقطوا. رجع تاني يكلم نفسه الفئة ويقول ايه؟ انا باكلمكم انتم يا ملوك الارض. خافوا ربنا. افتكروا انه سلطانكم جاي من السما. وان هترجعوا لربنا بالحساب. وانه اذا كنتم اشداء يجي عليكم امتحان شديد. وانه ممكن يبقى لكم ضحايا كتير او انجازات كبيرة. ما هو كل اما عليت المكانة هتفيد ناس اكتر ولا هتضر ناس اكتر؟ انت لما كت على قدك هتضر نفسك وتفيد نفسك. لكن لما عالية حتى في شغلك يعني بقى تحتيك موظفين كتير. لو مشيت كويس هتنفعت كل دول. رفعتهم. ولو ما مشيتش كويس ضريتهم وكلهم في رقبتك.
اليكم ايها الملوك توجيه كلام لكي تتعلموا الحكمة ولا تسقطوا. فان الذين يحفظون بقداسة ما هو مقدس يقدسون. والذين يتعلمون هذه يجدون ما يحتجون به. يعني ايه؟ حكمة جميلة قوي. تفكرنا باللي قال قديس بولس كل شيء طاهر للطاهرين. يعني تعامل مع كل ما هو مقدس بقداسة. الذين يحفظون بقداسة ما هو مقدس. يقدسون. والاية دي تهمني ليه؟ لان احنا في زمن لم هناك اعتبار كافي للمقدسات. تلاقي واحد داخل الكنيسة موبايل عمال يرن وممكن يرد. او يقعد رجل على رجل. او واحدة تاكل لبانة او تلبس لبس خليعة. او واحد يعلي صوته في الكنيسة. ايه يا حبيبي؟ ده بيت ربنا. ده بيت ملايكة. ده احنا حتة من السما ، الكلام ده تعمله في الدنيا مش في بيت ربنا. خاف بيت ربنا. في بيتك يا رب تليق القداسة. طب طالما بيت ربنا بيت قداسة تسلك فيه القداسة. او واحد يفتح الانجيل ويقعد يشرب شاي. ايه هو ده؟ كلام ربنا هنقعد ناكل ونشرب معه
ازاي توصل لكده؟ بيقول الذين يحفظون بقداسة ما هو مقدس. يعني انت بتبص للاقداس بقداسة. واحد يتجاسر عاوز يدخل بس يلحق التناول. هي التناول ده لعبة؟ فانت تيجي من قبل القداس وتقعد تقضي القداس كله توبة. ومش على نفسك النعمة. لكن داخل بتشد وتتخانق كانك ده حقك. فين القداسة؟ لانك هتفقد نعمة كبيرة قوي لو تقدمت بدون تواضع. يحفظونا بقداسة ما هو مقدس. دول يقدسون.
يبقى مش كل واحد بياخد القداسة كنعمة الا اللي مقدرها. الا اللي بيسعى لها. الا اللي بيجتهد عشان يوصل للقداسة ياخدها. لكن اذا كنت لا تحفظ ما هو مقدس. طب هتتقدس ازاي؟ ما انت اساسا مش بتبص لها كشيء مقدس. واحد مثلا يتريق حتى على ايات ربنا. او يتريق على الايقونات او القديسين ، انت فاكر هستفيد لو عملت كده ، تتشفع بهم ازاي ازا كنت بتتريق عليهم. انت لا تحفظ بقداسة ما هو مقدس يبقى ما تستاهلوش. الحاجات دي مش لك انت خلاص. لانك لم تنظر لها بكرامة.
هذا الجيل يميل الى عدم احترام المقدسات ، مش بعمم في كلامي في ناس قديسين في كل جيل. لكن العالم بيعلمهم كده. ان هم اعتبروا المقدسات غيبيات. كلمة غيبيات يعني امور ايه؟ اقرب للشعوذة والتضليل. لا. احنا ما عندناش شعوذة و ضلال ، احنا عندنا تعليم الهي استلمناه من صاحب السماء والأرض. هو اللي علمنا القداسة. وورانا قديسين انبياء ورسل وابرار وشهداء. وطريق القداسة واضح. وبيت ربنا بيت مقدس. كتاب ربنا اسمه الكتاب المقدس. وكل حاجة في الكنيسة مقدسة. لانها بتعمل بقداسة. واحد يصلي اللحن متعجب بنفسه ولا يحفز المقدسات بقداسة. صلي اللحن من قلبك. مش تتعجب بصوتك. لان لا تفقد النعمة او تاخد دينونة بدل ما تاخد بركة.
الذين يحفزون بقداسة ما هو مقدس يقدسون. والذين يتعلمون هذه يجدون ما يحتجون به. يعني ايه؟ ، اللي اتعلموا درس. تقديس الامور المقدسة. يقفوا قدام ربنا يقولوا له زي ما اتعلمنا عملنا ، قالوا لنا نقف على باب الكنيسة نرسم الصليب ونقول بكثرة رحمتك ادخل بيتك. عملنا كده. نيجي عند الهيكل نسجد. عملنا يا رب كده. بقى عندهم حجة يعني يقولوا لربنا احنا عملنا اللي اتقال لنا يا رب. فدول يجدوا نعمة في عينين ربنا. لانهم سلكوا بقداسة .
فابتغوا كلامي يبقى هنا سليمان بيقول صدقوني يا ملوك الارض اختشوا وابتغوا كلامي اتعلموا كلام الحكمة واحرصوا عليه فتتأدبوا. يبقى ابتغاء الكلام غير الحرص عليه لانك عاوز تتعلم دي حاجة كويسة. وبعدين تحرص على الكلمة اللي أخدتها. تقعد تراجعها وتذاكرها. وتحفظها وتقولها وتمشي بها. وتحاسب نفسك عليها. يبقى انت تبتغي الحكمة وتسلك بحكمة. لان فيه ناس بتقتني المعرفة كمعلومات كافكار. حياتها لا ممكن ما تكونش ماشية على اللي عرفتها. فالمعرفة النظري ما تكفيش. لازم تاخد الكلام وتعمل بيه زي ما المسيح في اخر الموعظة على الجبل. حكى لنا المسل بتاع اللي بيبني بيته على الصخر. واللي بيبني بيته على الرمل. اللي بيبني على الرمل للمنظر شكله حلو اوي. بس شوية هوا شوية ريح او مطر هيوقعه البيت. انما اللي بيبني على صخر ما يخافش لا رمل ولا مطر ولا هوا مش حاجة توقعه.
ابتغوا كلامي واحرصوا عليه فتتأدبوا. فان الحكمة ذات بهائم ونضرة لا تسبل ومشاهدتها متيسرة للذين يحبونها. ووجدانها سهل على الذين يلتمسونها. يعني ايه؟ اللي عاوز الحكمة يوصل لها. اللي عاوز يشوفها طبعا يشوفها هنا معنها المسيح. ممكن يشوفه. بمعنى انت سعيت ورا الحكمة وما خدتش ، انت قعدت مع الانجيل قد ايه. سمعت وعظات وخدتها على نفسك قد ايه؟ رحت لاب اعترافك كم مرة وسمعت كلامه ، سجدت للارض كم مرة وقلت له يا رب اديني حكمة. ممكن تكون بتعمل ده كله وما تاخدش مش ممكن. مش ممكن. لازم هتكون بتاخد. لان اللي يلتمسها يجدها. دي حقيقة. من تعوزه حكمة فليطلب من الله الذي يعطي بسخاء فسيعطى له. يبقى انت ما خدتش لانك ما سعيتش. انت ما اجتهدتش. انت ما عملتش ربع المجهود اللي بتعمله في الدنيا عشان تنجح وتجيب فلوس مثلا. في علاقتك بربنا. لكن لو سعيت بنفس السعي واجتهدت. طبعا هتلاقي تغير وهتشوف الحكمة في حياتك.
الحكمة ذات بهاء وندرة. يعني تديك مجد تديك كرامة حتى قدام الناس. ندرة لا تذبل. مشاهدتها متيسرة. يعني ممكن تشوف الحكمة. للذين يحبونها. اللي يحب الحكمة يلاقيها. وجدانها يعني عشان تجدها سهل على الذين يلتمسونها. الذين يبكرون الي يجدونني ده على اصلاح الحكمة اللي في سفر الامثال نفس المعنى بالظبط.
فهي تسبق فتتجلى للذين يبتغونها. يعني ده انت مجرد تشتهى الحكمة تلاقي هي اللي بتجري عليك. هي اللي تسعى لك. لان ربنا عاوز يعرف نفسه لولاده. عاوز يدي حكمة لولاده. عاوز يخلي البشر شركاؤه في المجد الابدي. لانه خلقنا عشان نبقى اولاده. مش عشان نهلك. وعاوز يدينا. مجد وميراث ابدي وهو ده غرضه من الاول. فلما يلاقي واحد بيسعى له وربنا بيجري عليه. فتلاقي الحكمة هي اللي بتدور عليك. طالما انت بتدور عليها وتعيش قصة حب كده بينك وبين الحكمة. انت بتسعى لها وهي بتسعى لك.
تسبق فتتجلى للذين يبتغونها. فكرني بكلمة التجلي دي. ان بطرس ويعقوب ويوحنا. كانوا لازقين للمسيح. وبيحبوا يسمعوه ومش عاوزين يسيبوه ولا لحظة. وبعدين سحبهم على الجبل. وفاجئهم انه تجلى قدامهم. كانوا نايمين صحيوا على منظره الجميل فهو اللي بادر مبادرة التجلي ليه؟ لان هم بيبتغوه. هم عاوزين يقعدوا معه. لازقين له على طول. فشافوا اللي ما حدش شافه.
من بكر في طلبها لا يتعب. في ناس تعمل ايه تصحى بدري. تقعد مع الانجيل تبكر في طلب الحكمة. تقعد مع الانجيل قعدة حلوة وكانها بتشحت من ربنا الحكمة على الصبح. طبعا دول حكماء. لانه قبل ما ياكل اكل جسدي ولا يحكي مع بشر بياكل اكل سماوي بيحكي مع صاحب السماء والارض. ده شخص حكيم ده مختلف عن اللي يصحى الصبح. يفكر في الاكل والشرب والدنيا والشغل.
من ابتكر في طلبها لا يتعب. هل معنى كده الانسان التقي مش هيتعب؟ لا هيتعب بس ما بيتعبش روحية ما يتغلبش. ما يتغلبش من الشيطان ابدا ما يتعبش في انه يفهم اللي بيحصل ويميز. ويقاوم الشر بسهولة. لكن تاني كل يوم يقع في الخطية ويتزل ويتبهدل ويتخبط ويتلطش. ما هو عشان مش حكيم. طب ليه مش حكيم? عشان مش بيطلب الحكمة. عشان بيجري ورا حاجات تانية ومش مركز مع ربنا.
من ابتكر في طلبها لا يتعب لانه يجدها جالسة عند ابوابه. ساعات كده الواحد يفتح الانجيل يلاقي اية جاهزة مستنياها. هي دي اللي هو محتاجها. او هي دي اللي موضوع الفترة دي. طيب يبقى الحكمة في أانتظرنا بس اللي يدور عليهم.
جالسة عند ابوابه. فالتأمل فيها كمال الفطنة. يبقى واضح انه بيتكلم عن معرفة تبدأ بالقراءة والتأمل. التأمل في الحكمة. يعني ايه تقعد تتأمل في كل كلمة تخرج من فم الله ، تتأمل في خطة الله في خلاص البشرية او تتأمل في الاحداث من منظور ربنا بيعمل ايه كده في الدنيا ليه؟ او تتأمل في حياة الابرار وحياة الاشرار. ابرار حياتهم مشيت ازاي؟ والاسرار مشيت ازاي؟ كل تأمل يغرس فيك الحكمة. تجعلك فطن ، فطن يعني ان الفطنة يعني العمق بتاع الحكمة.
التأمل فيها كمال الفطنة ومن سهر لاجلها لا يلبس له هم. زي ما ااتكلمنا عن تبكر اتكلمنا عن تسهر. في واحد يصحى بدري يركز مع ربنا. في واحد بالليل يركز في ربنا. يا بختهم سهرانين مع ربنا او المبكرين لربنا او اللي بيعملوا دي ودي. ما احنا عندنا صلاة باكر وعندنا صلاة نص الليل. دي بتاعة الحكماء. اللي يبكر حكيم واللي يسهر حكيم. بس المهم يقعد مع ربنا. تأمل فيها كمال الفطنة ومن سهر لاجلها لا يلبس له هم. الشخص لما يقعد مع ربنا كتير الهموم تطير. لان ربنا قعدته حلوة. اول حاجة يعملها من الروح القدس يشيل منك القلق والهم والخوف. لان اي هم يتحط قدام ربنا يدوب. هم ايه اذا كان ربنا نفسه. قاعد معك. ما ينفعش يبقى في هم. فاي حزن رديء اي مشاعر بطالة اي غضب ما لوش معنى. اي خوف رديء. كل ده يطير.
فأنها تجول في طلب هم اهل لها. يعني حكمة ربنا بتدور على مين يستاهلها. مين يستاهلها؟ اللي بيساعدها. اللي بيجتهد في طلبها. اللي بيسهر لها مخصوص. اللي بيبكر لها. اللي بيدور عليها يلاقيها. فتجتهد من الكلام عن الحكمة نفسها.
تجول طلب الذين هم اهل لها. كأن المسيح لو المجد هو اللي بيدور علينا مش احنا اللي بندور عليه. لو هو بيدور علينا واحنا بندور عليه خلاص هنتقابل بسهولة. لكن ان هو يدور علينا واحنا نجري منه. يبقى احنا مش حكماء.
وتتمثل لهم في الطريق باسمة وتتلقاهم كل ما تأملوا فيه. كأن الحكمة دي بتبتسم في وش اللي بيسعوا لها. وتقابلهم بفرح وتعزمهم كده على مائدة سماوية من التأملات والتعزيات.
واول الحكمة .. اولها الخولصة في ابتغاء التأديب. خولصة العربي بتاعها معناها الاخلاص. انك تبقى مخلص في طلب التأديب. والتأديب بمعنى تعليمات الالهية. يعني في واحد يفضل يدور اول ما يلاقي وصية يعلم عليها كده ويركز فيها ويقول له يا رب عاوز اعمل الوصية دي. ساعدني. انا مقصر جدا الكلام ده انا ما عملتوش. فهو مخلص في ابتغاء التأديب. ربنا قال حاجة التأديبات هنا بمعنى التعليمات. الوصايا. اللي بسببها ممكن يبقى فيه تأديب بمعنى عقاب. او بمعنى جزاء. مكافأة. فاذا اخلصت في طلب التأديب تبقى حكيم. لانك انت عاوز تعرف ربنا يرضيه ايه وتعمله. اذا اخلصت في هذا الطريق هتعيش حياتك حكيم وتدخل السما.
وتطلب التأديب هو المحبة. اللي بيركز على وصية ربنا معناها بيحب ربنا. وقالها المسيح بطريقة سهلة قوي. قال من يحبني يحفظ وصاياي. محبة ربنا مش مشاعر. محبة ربنا المحك الاول لها سمعت كلامه ولا لأ ، الموضوع بسيط. مش بتحبه.. طب سمعت كلامه ، ما هيبقى دي هي. هو قال لك اشكر على طول. انت متذمر. وبعدين تقول بحب ربنا ، لأ مش بتحب. بتحبه ازاي؟ هو ما فيش وصية. ربنا بيقول لك ادي بسخاء وزع. وانت عمال تكوش ومش عاوز توزع حاجة. وبعدين تقول بحب ربنا. لا مش بتحبه. من يحبنى ان يحفظ وصاياى. الوصية واضحة. فهنا نفس المعنى بيقول تتطلب التأديب ، يعني السعي وراء الوصية هو عنوان المحبة. اللي عاوز يعرف ربنا بالظبط عاوزه يعمل ايه وبيعمله يبقى ده اللي يقدر يقول بحب ربنا.
والمحبة حفظ الشرائع تأكيد لنفس المعنى. ومراعاة الشرائع سبات الطهارة. يعني لما تحفظ شريعة الله. تراعي كلام ربنا. تركز في كل كلمة تخرج من فم الله. تصل الى الطهارة. الوصايا الالهية في مجموعها تطهر القلب. تنقي الفكر. تصلح الداخل والخارج ، بالتالي ايه اللي يعمل كده؟ كلام ربنا. والتركيز في الطاعة والخضوع لكلام ربنا. لكن كون في خطية واضحة وانت عارف انها خطية. والوصية ضد الخطية وانت ساكت على الخطية. يبقى ما ينفعش تقول بحب ربنا. طب والخطية دي مش راضية تسيبها ليه؟ ، محللها لنفسك ازاي؟ يبقى لأ ناقص حب طبعا.
مراعاة الشرائع سبات الطهارة. كانه بيقول اسبتوا في الطهارة. حافظوا على حياتكم في طهارة. لانه رأوا ان ربنا قايل كلام كتير. ومن طول باله ساكت. فاحنا لما نكون بنعلم ناس تحت ايدينا اولادنا او ناس بيمشوا ورانا. ونقول الكلمة تلات اربع مرات يصعب علينا. طب ده انا قلت كذا مرة. و ربنا بقى. بيقول كلامه كم مرة. بيطلب الاف المرات نفس الطلبات. يوميا نفس الطلبات افرحوا صلوا ااشكروا حبوا بعض اهربوا من الخطية. لكنه باله طويل.
والطهارة تقرب الى الله. الخولصة التي بدونها لن يرى احد الرب. يعني ما تتصورش انك ممكن تقرب من ربنا وانت حياتك مليانة خطية مش هاينفع ، الطهارة تقربك الى الله. ليه بنتشفع بقديسين؟ لان هم قريبين. طب ليه قريبين؟ لان هم اطهاار انقياء. حياتهم مليانة نقاوة. طوبى لانقياء القلب يعاينون الله. فقربهم من ربنا يجعل لهم دالة. والدالة دي تخلينا نتشفع بهم. طب ما هم بشر اه بشر. وكانوا بيغلطوا. لكن اجتهدوا ان يكونوا انقياء واطهار بحفظهم للوصية. ومن هنا بقوا قريبين لربنا.
فابتغاء الحكمة يبلغ الى الملكوت. طلب الحكمة يوصل للسما. يبقى احنا مش عاوزين الحكمة عشان يقولوا علينا احكم من غيرنا. احنا عاوزين نروح السما. عاوز تبلغ الملكوت. خليك حكيم لان الغشيم مش هيدخل السما. الجاهل مش هيوصل. الشرير اللي هو عكس الحكيم اللي الشيطان سحبه. ده رايح مع الشيطان . لكن الحكيم زي العذارى الحكيمات. هم دول اللي داخلين السما. الجاهلات مش داخلين. لكن بالحكمة دخلوا. والحكمة اساسها الوصية. والوصية عاوزة اجتهاد ابتغاء. تسعى لها وتعيش بها وتركز فيها وتوبة بسببها.
فان كنتم تلتجون بالعرش والصولجان. يا ملوك الشعوب فاكرموا الحكمة لكي تملكوا الى الابد. يعني اللي بيتباهوا والعرش والسلطة. انتم بعاد عن الحكمة. لو مديح الناس والكرامة اللي جاية من الدنيا ضحكت عليكم وغشتكم. لو الغنى الارضي لو البهرجة والبريق البشري ضحك على عقل الناس. انتم بعدتم عن الحكمة. الحكمة الحفيفية محتاجة تواضع محتاجة خوف الله. محتاجة وصية ربنا تبقى واضحة قدام عينيكم. ابتغوا الحكمة كي تملكوا الى الابد. يعني اذا كنت ملك في الدنيا دي الدنيا دي قصيرة وهتخلص بسرعة والملك فيها لا يدوم ابدا. والعز فيها ما يدومش ابدا. خليك ناصح وابتغي الملك الابدي. العز الى الابد. كرامة اللي مع ربنا. وبالتالي طريقها الحكمة مش طريقها المجد الباطل. والكرامة اللي في الدنيا.
احبوا نور الحكمة يا حكام الشعوب. دي طبعا تكرار أو الحاح يعني ايه؟ اجروا وراء الحكمة. ركزوا. الحكمة قلنا كلام ربنا. عشان بس ما نتوهش. كل اما تقعد مع كلام ربنا تقول يا رب اديني حكمة. يا رب نور عقلي. وقلبي. عشان اعمل اللي انت عاوزه. احبوا نور الحكمة يا حكام الشعوب. وانا اخبركم ما الحكمة. ولا اكتم عنكم الاسرار. يعني لو جيتوا للحكمة انا اقول لكم الحكمة يعني ربنا ما بيخبيش سره عن ولاده. ربنا ما بيخبيش اسراره عن اولاده لما يقربوا منه. هل الله يعمل شيئا ولم يعلن سره الى أنبيائه .
ان ربنا بيكشف سره لانبياؤه. فربنا ما مش مستكتر يقول أسرار السما لولاده. بس مين عاوز يسمع. مين مهتم يعرف؟ لا اكتم عنكم الاسرار. لكن ابحث عنها من اول كونها. سليمان بيتكلم عن نفسه بيقول انا سعيت لطلب الحكمة. انا سهرت الليالي اقول له اديني حكمة. انا ما خدعنيش بريق الملك اللي خدته من ابويا انا كنت عارف من غير حكمة كل ده هينهار.
ابحث عنها من اول كونها واجعل معرفتها بينة ولا اتجاوز من الحق شيئا. يعني انا مش بيهمني النظريات والمعلومات الحق الالهي. بضيف عليه ولا اخصم منه. كلام ربنا ده مش من حقك تضيف عليه ولا تغير فيه. الحق زى ما يعلنه المسيح نقول امين. نمشي وراه. وعشان كده الهرطقات من اسوأ الخطايا واصعبها. لان الهرطقة معناها واحد حب يضيف على الحقيقة او يطرح منها. وهي الحياة دي بتاعتك عشان تلعب فيها. دي حاجة تربينا. خليك حكيم وقل امين. بمعنى ايه؟ الحقيقة كما اعلنها المسيح. وعاشتها الكنيسة عمود الحق وقاعدته. نعيش فيها. لكن التطاول انك انت تضيف على العقيدة او الحقيقة و تفسرها بمذاجك فأنت مشية وراء الشيطان طبعا .
ladlamp
يسعدنا ان نقدم لكم كل ما يخص المحتوى القبطى باستمرار – كما نتمنى منكم دعمنا و تشجيعكم لنا من خلال مشاركتكم و تعليقاتكم على محتوى موقعنا – حتى نستطيع تقديم المزيد بشكل مستمر
فتابعونا دائما على [ ladlamp.com ]
