تفسير سفر الرؤيا – حـ 7 ✟ الانبا رافائيل فى ها أنا أتى سريعا – شاهد و أقرأ – 📹 📝 – ✔

بسم الاب والابنة والروح القدس الاله الواحد امين

تفسير سفر الرؤيا

دراستنا برسائل الكنائس السبعة. إفسس – سميرنا – برغاموس – ثياتيرا – ساردس - فيلادلفيا - لاوديكية. واخدنا خمس كناس

النهاردة بنعمة ربنا ناخد كنيسة فيلادلفيا. - تفسير سفر الرؤيا -

اكتب الى ملاك الكنيسة التي فيه فيلادلفيا. كلمة فيلا دلفيا معناها محبة الاخوة. فيلة او فيلو معناها محبة. واديلفوس الاخ. فا فيلادلفيوس معناها محبة الاخوة. والاسم نفسه فيه رسالة لنا ان احنا نعيش مع بعض في محبة وتآلف. و نفسي نتعلم ثقافة ان الواحد ممكن يختلف مع الناس في رأيهم لكن ما يفقدش محبته. ونحاول دايما يكون لنا رأي واحد لكن طبيعة البشر ان كل واحد يبقى له اتجاه وله مفاهيم وله قناعات وله خلفيات ثقافية وفكرية. و مقدار معين من الزكاء والاستيعاب.

فبالطبيعي لازم هيبقى فيه نوع من الاختلافات في الفكر والرأي والدين والعقيدة. و المبادئ. نفسي مهما اختلفنا نبقى برضو نحتفظ بالمحبة.

معلمنا بطرس في رسالته الاولى الاصحاح تلاتة اية تمانية يقول { والنهاية كونوا جميعا متحدي الرأي بحس واحد ذوي محبة اخوية مشفقين لطفاء }.

يبقى اول درس بناخده من الرسالة دي هو الاسم. فيلادلفيا معناها محبة الاخوة.

الكنيسة في فلادلفيا  زي ما هنشوف في الكلام الموصوف تتسم بالتراخي. ودي معناها احيانا بيبقى الانسان كويس لكنه كسول متراخي. يأجل شغله يسوف ويهمل عشان كده لما الرب يسوع جه يوصف نفسه قال هذا يقوله القدوس الحق. طبعا كلمة قدوس صفة خاصة بالله وحده. يعني واحد فينا لما يكون عدل وكويس يسموه قديس. لكن الوحيد القدوس هو الله. قد يكون الاختلاف ده بين كلمة قدوس وقديس في اللغة العربية فقط. لان في اللغات الاخرى تقريبا نفس التعبير يعني في في القبطي او في اليوناني اجيوس. فيعني الفرق قد يكون في اللغة العربية. لكن كلمة القدوس في العربي معناها الله. وكلمة قدوس معناها الطاهر النقي. والحق ، المسيح هو القدوس وهو الحق. والحق معناها الذي لا يتغير. طبعا عكسها بقى عكس ربنا بالظبط. الشيطان اسمه الروح النجس. وروح الضلال. الله روحه اسمه الروح القدس. وروح الحق المعزى. شوفوا العكس. عشان كده احنا كمان لو ماشي في سكة والحق تبقى تبع ربنا. واحد تاني ماشي في سكة النجاسة والضلال وخداع الناس والنصب ده بتاع الشيطان.

اوعى حد فينا يخدع نفسه ان هو يكون حاسس انه بتاع ربنا هو بيتكلم كلام ما فيهوش حق. و يعني خالف ضميره. في بعض المبادئ للاسف كده. يقول لك اكدب عشان تفيد الناس. او يعني عشان تكتسبهم ناحيتك. قل لهم كلام يراضيهم. الله ما عندوش الحكاية دي. الله قدوس وحق.

و بعدين يوصف نفسه برضو الذي له مفتاح داوود الذي يفتح ولا احد يغلق ويغلق ولا احد يفتح. ايه حكاية مفتاح داوود ديه ؟ موجودة في اشعيا اتنين وعشرين نبوة عن المسيح .

واجعل مفتاح داوود بيت داوود على كتفه فيفتح وليس من يغلق ويغلق وليس من يفتح. واثبته وتدا في موضع امين. ويكون كرسي مجد لبيت ابيه ويعلقون عليه كل مجد بيت ابيه الفروع والقضبان.

لأ النبوة دي لازم نقف قدامها. ده هنا عن المسيح اجعل مفتاح. طبعا المفتاح تفتكره انت مثلا لما يكون فيه ضيف عظيم جدا جاي يزور البلد. فبيدي له مفتاح المدينة. مفتاح المدينة معناها البيت بيتك. اى وقت تيجي ، تخيل انت مدي مفتاح بيتك لواحد صديقك تقول له اي وقت عايز تدخل ده بيتك. فمفتاح بيت داود معناها الملك انك انت تملك على هذا البيت. اجعل مفتاح بيت داود على كتفه. وطبعا الكتف يعبر عن الحمل. زي ما اتقال عن المسيح وتكون الرئاسة على كتفه. مش تاج على الراس. في الفكر المسيحي كلما يترقى الانسان في الكنيسة كلما يبقى حمله تقيل. مش يبقى متعظم اكتر. فعشان كده المسيح كان الرياسة على كتفه. ومفتاح بيت داود على كتفه. فيفتح وليس من يغلق ويغلق وليس من يفتح. يعني له الكلمة الفصل. ما حدش يقدر يراجع على الكلام بتاعه. واثبته وتدا في موضع امين. وتد يعني يبقى بنستند احنا عليه ، تخيل خيمة الوتد بتاعها اهم حاجة فيها لانه لو مرخرخ الهوا يطير الخيمة باللي فيها. لكن طالما في وتد بيربطوا فيه الحبل بتاع الخيمة تبقى امينة.

ويكون كرسي مجد لبيت ابيه. بيت ابيه يعني بيت الاب السماوي شوفوا المسيحي يقول عن هيكل الاورشليم بيتي بيت الصلاة يدعى وانتم جعلتموه مغارة لصوص. وعشان كده لما المسيح طرد الباعة من الهيكل تذكر تلاميذه كلمة غيرة بيتك اكلتني. فهو كان كرسي مجد لبيت الاب ويعلقون عليه كل مجد بيت ابيه يعني كل المجد متعلق بان المسيح يخلصنا ويرجع المجد تاني للبشرية اللي هي بيت الاب.

الفروع والقضبان. طبعا المسيح قال انا الكرمة وانتم الفروع او الأغصان .

فيبقى هنا كلمة لهو مفتاح بيت داود الذي يفتح ولا احد يغلق ويغلق ولا احد يفتح هو المسيح. وطبعا المفتاح ده ايه؟ فيه ناس قالوا انه يرمز الى الحل والربط. لان قال لابائنا الرسل اعطيك مفاتيح ملكوت السماوات. كل ما تربطه على الارض يكون مربوطا في السماوات. وكل ما تحله على الارض يكون محلولا في السماوات. المسيح اعطى المفاتيح دية للاباء الكهنة. عشان يحلوا ويربطوا. خلي بالكم الحتة دي لازم تتفهم صح. كل ما تربطه على الارض يكون مربوط في السما واللي تحله على الارض يكون محلول في السما مش معناها انا ككاهن بحل واربط بمزاجي. لكن ده معناها بالعكس اوعى تربط حاجة السماء بتديها حل. واوعى تحل حاجة تكون السماء ربطاها. يعني يجي لي واحد يقول لي اديني حل اطلق مراتي. اقول له ما فيش حل. يقول لي مش انتم عندكم سلطان الحل والربط؟ ، اقول له لا ما اللي باحله لازم يكون محلول في السما. مش العكس مش انا اول محل السما توافق واربط السما توافق ده بالعكس انا ابص للسما اقول قوانينكو ايه دي تنفع لو تنفع امشيها متنفعش اقول له مقدرش زي الموظف اللي ملوش سلطان انه ياخد قرار من زاته لكن في قوانين بيمشي عليها .

فعشان كده ما تربطه على الارض يكون اصلا مربوط في السما. واذا عملت العكس ابقى مدان. وما تحل على الارض يكون اصلا محلول في السما.

فيبقى دي اول نوع من المفاتيح هو مفتاح الحل والربط. والمفتاح التاني قالوا هو الصليب. فتح باب السما وخلانا ندخل هناك. صليب المسيح والفداء العظيم الذي تم على عود الصليب. والنوع التالت هو فهم الكتاب المقدس. يعني احيانا بيبقى المفتاح اللي انا محتاج له ان لما اقرا نص في الكتاب المقدس افهموا. عشان كده في المزمور مية وتسعة عاشر يقول ايه؟ ، اكشف عن عيني فارى عجائب من شريعتك. غريب انا في الارض لا تخفي عني وصاياك. نفسي يا رب انت تديني المفتاح ده. ان كلما قراءة في الكتاب المقدس الاقي ذهني مفتوح ومستنير وفاهم انت عايز تقول ايه.

فيبقى المسيح عنده مفتاح داوود يفتح ولا احد يغلق ويغلق ولا احد يفتح. اعطى المفاتيح دي للكهنة علشان يسوسوا الكنيسة. يعني يبقى نوع من السياسة اللي تخلي الناس تعيش صح. وبيدي المفتاح ده عن طريق الصليب وبيديه ايضا عن طريق كل انسان يفهم الكتاب المقدس.

طيب عايز يقول له ايه بقى؟ ، قال له انا عارف اعمالك. الكلمة دي مخيفة ومريحة ، مخيفة امتى؟ لما تكون اعمالي وحشة ربنا يقول لي انا عارف اعمالك. اقول له يا رب طب استر علي. يقول لي طب تبطل. من الحاجات العجيبة ان احنا احيانا نبقى الماضي بتاعنا وحش. ونفسنا يتنسي.

واحنا في الحاضر بتاعنا بنكرر نفس الاخطاء. يعني نفسي اللي فات مات طب ما هو ما دام مات ابقى ابتدي بقى بداية جديدة ما فيهاش غلط. الاقي نفسي بكرر نفس الاخطاء. يبقى هيتنسي ازاي؟ .

فربنا يقول انا عارف أعمالك ، الانسان النقي اللي بيعمل اعمال جيدة ، كلمة انا عارف اعمالك بتعزيه . عارف ان انت انسان بتسعد الفقرا الناس مش واخدة بالها لكن انا مسجل عندي عارف ان انت بتصلي في الخفاء ما حدش دريان بك عارف ان انت علاقة خاصة بيا ما حدش دريان بيها. انا عارف اعمالك. فانا ذا قد جعلت امامك بابا مفتوحا ولا يستطيع احد ان يغلقه. يا بخت الانسان اللي ربنا يفتح له الابواب. لان هيبقى الباب مفتوح ما حدش يقدر يقفله قدامك. عشان كده دايما احب ان احنا يكون جهادنا مع ربنا بس. يعني انت تجاهد مع الله في الصلاة. زي قصة يعقوب لما صرع ملاك لغاية الفجر. وبعدين قال له اطلقني. قال له لا اطلقك لم تباركني.

بابا شنودة في الشعر بتاعه قال قد عرفت الان كيف صارعك. الصراع هو ان انا اقعد امسك في ربنا اقول له يا رب مش هسيبك الا لما تفتح لي الباب اللي انت عايزني ادخل منه. ساعة ما ربنا يفتح الباب البشر بقى ( اعلى ما في خيلهم يركبوه ) مش عارف يقفل ، يدبروا لك مؤامرات ومشاورات وحيل و دسيسة و وشاية وكل اللي يعملوه. كل ده ولا له قيمة. ربنا هو اللي عمل. عشان كده ما تخليش جهادك ضد الناس او مع الناس او مع ذاتك مع ضد الشيطان او ضد الخطية هتشتت نفسك. خلي الموضوع في ايد ربنا.

من الحتت الجميلة قوي لما داود كان هربان من وجه ابنه ابشالوم. وطلع راجل من من الشعب يحدفه بالطوب. ويقول له اخرج يا رجل الدماء. ربنا بينتقم منك عشان انت سفكت دماء. فقائد الجيش كان هربان مع داوود قال له اسمح لي اعدي اقتل الراجل ده. لانه بيشتمك. قال له سبه. الرب قال له اشتم داود. يعني كأن داود مش شايف الراجل اللي بيشتمه. شايف ربنا. بيقول لو ربنا مش عايز انا اتهان ما كنش خلاه يعمل كده. فسيبه. انا عيني على ربنا. رب الجنود مش حد تاني. وطبعا تلف الايام ويرجع داود تاني يمسك المملكة ويجي له الراجل اللي كان بيشتمه يسجد له. زي ما هنشوف دلوقتي يسجدون عند قدميك. ويعتذر له. يقول له خلاص. هسامحك. دي بقى الموقف اللي فينا انا عيني على ربنا بس. فانا ازا قد جعلت امامك بابا مفتوحا ولا استطيع احد ان يغلقه.

بولس الرسول في كرونثوس الاولى يقول :

قد لى باب عظيم فعال. ويوجد معاندون كتيرون. طب ايه رأيك يا معلمنا بولس؟ المعاندين دول عرفوا يقفلوا الباب. فقول ما حدش يقدر يقفل الباب لربنا فتحه. خلي بالكم في مرة تانية بولس الرسول قال انفتح امام باب في الحتة الفلانية وربنا قال لأ ما تدخلش. وفكرنا نروح لحتة في الفلانية منعني الروح. ليه؟ لان ربنا قافل. قال له استنى دي مش هدخلك فيها دلوقتي. الانسان اللي ماشي بحسب خطة ربنا بيستريح. وما يضطربش. انت قفلت يبقى انت عارف ان في منه ضرر. وانا مطمن هتفتح ده ، يبقى ده اللي فيه الخير. ولتكن مشيئتك كما في السماء كذلك على الارض. ها انا لقد جعلت امامك بابا مفتوحا. ولا يستطيع احد ان يغلقه. لان لك قوة يسيرة. وقد حفزت كلمتي ولم تنكر اسمي. كلمة قوة يسيرة معناها قوة قليلة. في انسان عنده قوة عظيمة. وفي انسان عنده قوة يسيرة. تفتكروا مين فيهم اللي ربنا ممكن يستخدمه؟ اللي عنده قوة عظيمة ولا عنده قوة يسيرة؟ في رأيي اي حد. لان ربنا يعمل بالقليل وبالكثير. يعمل ببولس الفيلسوف ويعمل ببطرس الصياد. يعمل بأرسانيوس الحكيم معلم الملوك ويعمل موسى الاسود رئيس عصابة شوارعي. فربنا ما عندوش بقى انا ده ينفع ده ما ينفعش. اي انسان يسلم نفسه ليد الله هيبقى حاجة كويسة. عشان كده اذا كنت انت لك قوة عظيمة سلم نفسك لربنا يستخدم لخدمته. القوة العظيمة مش معناها قوة الجسد والبدن يعني. ممكن قوة العقل. ممكن قوة الشخصية ممكن قوة البلاغة في الكلام. ممكن قوة الحكمة واللغات عندك لغات كثيرة. ممكن العلاقات الطيبة مع الناس. ممكن واحد عنده اموال كثيرة بتدي له قوة. كل دوت لو انت سلمته في ايد ربنا هيستخدمك استخدام رائع جدا. طب افرض واحد غلبان زي حالاتي يبقى ما عندوش اي جوة في اي حاجة. الله يستخدمك برضو. بالعكس ممكن يكون الانسان الضعيف اداة طيعة في يد الله اكتر من اللي عنده حاجة زيادة فحاسس ان هو بقوته بيعمل.

عشان كده معلمنا بولس في كرونثوس التانية أصحاح تلاتة يقول ايه؟ لنا ثقة مثل هذه بالمسيح لدى الله. ليس اننا كفاة من انفسنا ان نفتكر شيئا كانه من انفسنا بل كفايتنا من الله ، ليك قوة اخيرة دي مش سبب في انك تحجم عن الخدمة تقول انا ما اعرفش اخدم. اقول كفايتنا من الله. الذي جعلنا كفاة لان نكون خدام عهد جديد. لا الحرف بل الروح.

هنا بقى الكفاية من الله ديت تخليني اي انسان فينا مستعد يخدم طالما انا في ايد ربنا دايما بفكر نفسي بكلمة لساني قلمه كاتب ماهر. يعني في كاتب ماهر وانا مجرد القلم في ايده. الالم ده لا يمكن يفتخر انه كتب مقالة عدلة. لان هو في يد الكاتب. الكاتب هو الفكر. سواء كان قلم غالي قلم رخيص مش هتفرق مع الكاتب الماهر. فاذا كنا احنا ادوات بسيطة عصاية جريدة في يد موسى الله يستخدمها تبقى عصى الله. واذا كنا حاجة فخمة وجبارة ربنا ممكن يستخدمنا. بس دايما احط في بالي كفايتنا من الله. الذي جعلنا كفاة لان نكون خدام عهد جديد. ادي القوة اليسيرة.

ويقول برضو في كرونثوس التانية اصحاح : واحد كان لنا في انفسنا حكم الموت. يعني انا حاسس ان انا دايما في حالة موت. والميت ده بيعمل ايه؟ الميت ده ما لوش حيلة ولا هو. مرمي في الارض. والناس بتقلب فيه. لكي لا نكون متكلين على انفسنا. بل على الله الذي يقيم الاموات. هنا يقيم الاموات معناها يعمل عجايب من لا شيء. الذي نجانا من موت مثل هذا وهو ينجي. الذي لنا رجاء فيه انها سينجي ايضا فيما بعد. يعني باستمرار احنا في ايد ربنا مثل ادوات ميتة لكن هو يعمل منها اعمال عظيمة.

ويقول برضو في كرونثوس التانية - اربعة سبعة - لنا هذا كنز في اواني خزفية. الكنز هو الخدمة. ان انت بتخدم بس انت اناء خزفي. خزف معناها الفخار اللي هو رخيص ويتكسر بسهولة ويترمي. اي واحد عنده قلة فخار بتاعة زمان دي. لما تتكسر بتترمى. ما هياش ازمة كبيرة ان الوعاء ده اتكسر. فانا انا أناء خزف في يد الله هو حاطط الكنز بتاعي جوة الاناء الخزفي. عامل زي ما يكون واحد بيحفر في الارض لقى بلاص فخار. بيكسره لقى جواه كنز. عمره ما هيقعد يعيط البلاص اللي اتكسر. هو المهم الكنز. فاحنا كلنا ما لناش وزن ولا لنا تمن. المهم اللي جوة اللي هو نعمة ربنا. ليكون فضله قوة لله لا منة. وعشان كده لما كان بولس الرسول بيشتكي من شوكة في الجسد. وقعد ي يا رب اشفيني يا رب اشفيني. بولس اللي كان بيشفي الناس. اللي كانوا بياخدوا المناديل والعصائب من على الجروح بتاعته. والصديد والريحة الوحشة يحطوها على المرضى يشفوا. فقال له طب اشفيني يا رب؟ قال له تكفيك نعمتي. لان قوتي في الضعف تكمل. عشان كده قال فبكل السرور افتخر بالحرى في ضعفاتى. لكي تحل علي قوة المسيح. يعني اه اصر بالضعفات بالشتائم بالضربات بالاضطهادات بالضيقات لاجل المسيح. لان حينما انا ضعيف. فحينئذ انا قوي. نفسي نحفظ تكفيك نعمتي لان قواتي الضعف تكمل ،وبعدين الحتة الاخيرة حينما انا ضعيف فحينئذ انا قوي. لما قال له لك قوة يسيرة ، معناها انت انسان ضعيف. بس الميزة اللي فيك بقى بالرغم انك ضعيف لكن حفزت كلمتي ولم تنكر اسمي. طبعا بيجي لنا اوقات الانسان من اجل الضعف ينسى كلمة ربنا. ويجاري الجو. ويمشي في تيارات ويبقى زي قشة في مهب الريح بتاخدها زي ما تكون. وزمان علمونا احنا اطفال قالوا لو في سمكة بسريا عارفين السمك البسريا ده اللي هو قد النمنمة. بس لسه فيها نفس بتشق التيار في البحر. بتمشي ضد الموجة ، لكن لو في حوت كبير زي اللي بلع يونان اكنه ميت. فالموجة بتجرفه قدامها على الشاطئ. فقال لو انت انسان فيك حياة تقدر تمشي ضد التيار.

ولو ما فكش حياة التيار هو اللي بيجرفك. ( عملوا قص شعر كده عامل زيهم. لبسوا اللبس ده اعمل زيهم ) . ما فيش ما فيش رؤية ولا فكر. انا بمشي حسب الدنيا ما هي ماشية. عشان كده الميزة في ملاك كنيسة فلادلفيا انه بيقول له بالرغم ان انت لك قوة يسيرة. لكنك مشيت ضد التيار الوحش. حفظت كلمتي ولم تنكر اسمي. بس برضه الحتة دي عايز انبه ايه؟ مش دايما خالف تعرف. يعني واحد عشان يبين ان هو قوي فيمشي ضد التيار. افرض التيار الصح. امش فيها. يعني امتى تمشي ضد التيار؟ لما تكون تيار غلط. لكن افرض ناس ماشية صح. امشي معهم ، فلازم يبقى عندي تمييز لازم افكر لازم اخد قرار امتى همشي في التيار ده او همشي عكسه ولازم كمان يكون قراري مظبوط لا احكم على الامور بغير ما واقعها يعني اقول التيار ده غلط وهو يكون صح او اقول ده صح وهو يكون غلط .

لك قوة يسيرة قد حفظت كلمتي ولم تنكر اسمي. ها انا دا اجعل الذين من مجمع الشيطان. من القائلين انهم يهود وليسوا يهودا بل يكذبون .. هتعمل لهم ايه؟ انا لا اصيرهم يأت ويسجدون امام رجليك ويعرفون اني انا احببتك.

هنا بقى حكاية الهراطقة اللي بيدعوا ان هم مسيحيين وهم مش مسيحيين. القائلين انهم يهود. كلمة يهود كناية عن المؤمنين. وليسوا يهودا. بل يكذبون. ففي ناس يدعوا الايمان ويدعوا المعرفة ويدعوا التقوى. وهم يسميهم سفر الرؤيا مجمع الشيطان .. ويكذبون. طب هيحصل ايه؟ طبعا اللي بيكزبوا دول وعاملين نفسهم عارفين. طول الوقت يشتموا في رجال الله القديس طول الوقت اتهامات باطلة. ويبقى الواحد من دول واقف يقول له يا رب انقذني من من نميمتهم. زى ما بنقول في القداس ابطل حسدهم و سعايتهم. عارفين السعاية؟ ، ان هو بيسعى ان يوقع ما بين الناس وبعض ، ابطل حسدهم وسعايتهم ونميمتهم وشرهم وجنونهم التي يصنعونها فينا. فربنا يستجيب فأوشية الاجتماعات دي مهمة جدا. يخلي كل المؤامرات تقع. مش كده وبس. يأتون ويسجدون امام رجليه ها انا لا اصيرهم يأتون ويسجدون امام رجليك. ييجي يقول لك انا اسف انا في يوم من الايام شتمتك. تقول له ما جراش حاجة ما جاش عليك الله يسامحك. انا كنت فاهم غلط. تقول له ما علش ما كلنا بنفهم غلط. ياما تلاقي ناس عمالة تشتم في الاخر تيجي المتأسف. ويعرفون اني انا الذى احببتك. هنا الميزة بقى ان ربنا هو اللي بيحبك. عشان كده يدافع عنك. وانت ساكت. حكاية يسجدون امام رجليك. طبعا السجود لله وحده ده سجود العبادة. للرب الهك تسجد واياه وحده. لكن في سجود زي اللي قاله هنا في سفر الرؤيا بتاع الخضوع او بتاع الاحترام او بتاع الاعتذار او بتاع الخوف. يعني مثلا في سفر التكوين يوسف الصديق حلم بالحلم الـ 12 كوكب والشمس والقمر جم سجدوا له. فلما قص على ابيه وعلى اخوته هذا الحلم. انتهره ابوه وقال له ما هذا الحلم الزي حلمت؟ ، هل نأتي انا وامك واخوتك ونسجد لك للارض ؟ ودا اللي حصل. في تكوين اتنين واربعين كان يوسف هو المسلط على الارض في مصر وهو البائع لكل شعب الارض. فاتى اخوة يوسف وسجدوا له بوجوههم الى الارض. اللي في يوم من الايام كانوا بيتآمروا ضده. واللي اخدوه وهو غلبان ما لوش حيلة. رموه في البير واللي اصعدوه من البير وباعوه. وهو ما بيتكلمش زي المسيح اللي هو كنعجة صامتة امام الذي يجزها. ولا صرخ وقال يا جماعة يا اللي بتشتروني دول اخواتي اللي بيبيعوني فيختشوا على دمهم والناس اللي بيشتروا دول يقولوا لهم عيب عليكم تبيعوا اخوكم ولا اتكلم. واتباع. وطبعا احساس بالظلم. تلف الايام واللي كانوا بيتآمروا ضده وعاملين نفسهم اقوى منه. جايين النهاردة يسجدوا له. ده نفس اللي اتقال في سفر الرأؤيا. عشان كده لما ابونا اسحاق بيبارك يعقوب قال يستعبد لك شعوب وتسجد لك قبائل. كن سيدا لاخوتك وليسجد لك بنو امك. هنا معناها السجود بتاع الاحترام وبتاع الاحساس انك انت احسن مننا. و البركة اللي بارك يعقوب لابنه يهوذا قال له يسجد لك بنو ابيك. هنا لازم نبقى فاهمين ان في انواع من السجود لان الناس بتتلخبط. في سجود العبادة ده لله وحده. سجود الاحترام ده بيحصل لاي حد انت عايز تكرمه.

انتم بتشوفوا الجماعة اليابانيين لما بيحييوا بعض بيعملوا طريقة كده فيها انحناء. فدي طرق للتحية بين الشعوب.

فهنا سفر الرؤيا قال الناس اللي بيعاكسوك تلف الايام ويجوا يسجدوا قدامك. ويعرفوا ان انا احببتك. وعلى رأي معلمنا بولس الرسول في روميا 16 لما يقول اله السلام سيسحق الشيطان تحت ارجلكم سريعا. ليه بقى ربنا ادى له الوعد الجميل ده؟ ، انه ييجوا اعداءه يعتذروا له ويسجدوا امام رجليه. قال لانك حفظت كلمة صبري. هنا ليه حط الصبر جنب الكلمة؟ لان الكلمة هي الانجيل وهي الكرازة وهي الخدمة وهي الايمان وهي الفكر السليم. دايما الشيطان يعاكس الانجيل دايما يحارب الفكر السليم. دايما ينشر الضلال. وتلاقى طريقة انتشار الضلال اسرع ، وجماهيره اكتر ما بيسمع كلمة الحق. فدايما يبقى الانسان اللي بيتكلم بالحق متحارب. فربنا يقول له انت حفظت كلمة صبري. انا ايضا ساحفظك من ساعة التجربة العتيدة ان تأتي على العالم كله لتجرب الساكنين على الارض.

في تجربة هتيجي على العالم كله. اللي قال عنها المسيح حينئذ نكون ضيق عظيم لم يكن مثله منذ ابتداء العالم الى الان ولن يكون. ربنا بيدي وعد للانسان اللي يحفظ كلمة يطول باله ويحفظ الايمان ويحفظ الكتاب ويحفظ الامانة المقدسة ما يغيرش في حاجة قال له انت بالذات هحفزك من التجربة اللي جاية على العالم كله. هنا بالمناسبة يعني تاخدوا بالكم بعض الناس بيفسروا ان المسيح هيجى سرا يختطف المؤمنين وبعدين تحصل الضيقة العظيمة. وبعدين مش عارف ييجي يملك الف سنة او الف سنة قبل الضيقة زي ما هم بيفسروا حاجات ملخبطة كده. النص ده هحفظك من ساعة التجربة. معناها ان الضيقة هتيجي قبل الاختطاف. ما هو في ناس مؤمنين اهو ربنا يحفظهم من التجربة. ازاي تقولوا هيخطف المؤمنين؟ وبعدين تحصل التجربة والضيقة. يبقى اقوم اقول له بعد ده لمين؟ احنا متفقين من اول حاجة واحنا بندرس يسافر الرؤيا. ان الاختطاف والمجيء التاني والملك الفي والحياة الابدية والدينونة هي حاجة واحدة. فبلاش الناس يلخبطونا بالافكار بتاعتها. هنا بيقول ناس حفظوا كلمة الله بصبر هحفظكم من الضيقة العظيمة اللي هتيجي على البشرية. اذا هنا الاختطاف ما حصلش. والا كان دول ربنا اخدهم قبل ما يحصل التجربة والضيقة. وبعدين قال ها انا اتي سريعا. لاحظوا الرسالة اللي بعديها بتاعة لاوديكية هيقول ها انا ذا واقف على الباب اقرع. يبقى هنا في فلاديلفيا بيقول انا جاي بسرعة وفي لاوديكية اخر كنيسة انا واقف على الباب. يا ترى احنا بقى في انهي وقت دلوقتي بتاع ها انا اتي سريعا ولا انا على الباب بخبط؟ .

تمسك بما عندك لئلا يأخذ احد اكليلك. الوصية والنصيحة اللي بيقولها ربنا لنا. كل ما يقترب الايام ان احنا نمسك قوي. تمسك بما عندك. بما عندك معناها اللي استلمته. لان لا ياخذ احد اكليلك يعني هتفقد هذا الاكليل. عشان كده معلمنا بولس بينبه تلميذه تيموثاوس . قالوا تمسك بصورة الكلام الصحيح الذي سمعته مني في الايمان والمحبة في المسيح يسوع. ومعلمنا بولس فى عبرانيين يقول يجب ان نتنبه اكثر الى ما سمعنا لان لا نفوته. لانه ان كانت الكلمة التي تكلم بها ملائكة اللي هي الناموس في العهد القديم. قد صارت ثابتة. لان اليهود عندهم عقيدة ناموس تسلم لموسى بيد ملائكة. وقال لهم اذا كان الناموس اللي انتم استلمتوه بيد ملايكة صار ثابت يعني جاري عليكم وليه سلطان. كل تعدي ومعصية نال مجازاة عادلة. كيف نحن ان اهملنا خلاص هذا مقدارة . احنا يعني اكتر من العهد القديم. العهد القديم اللي بيغلط كان بياخد عقوبة. فالممال دلوقتي لما كان عندنا بقى المسيح نفسه جه.

وبعدين في كورنثوس الأولى : الستم تعلمون ان الذين يركضون في الميدان. بيركضوا بيجروا. جميعهم يركضون. لكن واحد يأخذ واحد بياخد الجايزة فكذا اركضوا لكي تنالوا ما تضيعش وقتك. كل من يجاهد يضبط نفسه في كل شيء. اولئك عشان هياخدوا اكليل يفنى اما انتم فاكليل لا يفنى. يبقى تمسك بما عندك لئلا ياخذ احد اكليلك يفوز عليك. لما يكون ربنا بيقولها ها انا اتى سريعا فتمسك بما عندك. لازم نحط في بالنا كلما يقترب الزمن كلما كان مطلوب مننا ان احنا نتمسك. نتمسك بكل اللي عندنا. بلاش نغير حاجة.

من يغلب فسأجعله عمودا في هيكل اله. دي حاجة وعد جميل. العمود ده عامل زي ما اتقال عن يعقوب وبطرس ويوحنا المعتبرون انهم اعمدة. قالها بولس الرسول في اغلاطيا. ويقول الكنيسة كنيسة الله الحي عمود الحق وقاعدته. واللي هيبقى عمود معناها هيبقى موجود. مش هنقدر نستغنى عنه. عارفين العمود في المبنى اهم حاجة. يعني ممكن اشيل حيطة لما اجي اشيل حيطة اسأل المهندس دي هتأثر في المبنى؟ يقول لي لا دي ما لهاش اي قيمة. طب الحتة الخرسانة؟ لأ اوعى تقرب ناحيتها. فالعمود معناها واحد مش هنستغنى عنه.

و لا يعود يخرج الى خارج. ليه؟ لان مع الرب يسوع قال العبد لا يبقى في البيت الى الابد. اما الابن فيبقى الى الابد. ويقول معلمنا بولس نحن الاحياء الباقين سنخطف جميع في السحب لملاقاة الرب في الهواء. وهكذا نكون كل حين مع هنكون معه ولا نعود نخرج الى خارج. جايز واحنا على الارض ممكن انسان يسيب ربنا بارادته ويمشي. زي ما المسيح قال انا هو الباب ان دخل باحد يخلص ويدخل ويخرج ويجد مرعى. يعني هيبقى فيه فرصة ان الانسان يسيب ربنا بارادته. لكن في السما بقى بقينا خلاص معه كل حين.

واكتب عليه اسم الهي واسم مدينة الهي اورشليم الجديدة النازلة من السماء من عند الهي. واسمي الجديد. طبعا انا يعني عايز بس اركز على كلمة الهي. ازاي المسيح يقول عن الاب الهي? متفقين ان المسيح من جهة لاهوته هو ابن يقول له يا ابتاه او ابي. ومن جهة ناسه صار زينا عبد فيتكلم مع الاب ان هو الهه. عشان كده على الصليب قال الهي الهي لماذا تركتني؟ وقال اه للمجدلية اني اصعد الى ابي وابيكم والهي والهكم.

 

 

تفسير سفر الرؤيا