بالفيديو .. « تداريب أسبوع الألام » .. أبونا داود لمعي – شاهد و أقرأ – 📹 📝 –

« تداريب أسبوع الألام » .. أبونا داود لمعي

تحتفل الكنيسة القبطية بأسبوع الآلام ، والذى بدأ بأحد الشعانين اليوم ، ويليه اليوم اثنين البصخة ، حيث تتوقف صلوات القداس التى تستمر طوال الصوم الكبير فى الكنائس والأديرة ، وذلك من مساء أحد السعف حتى صباح خميس العهد.   ويُعد هذا الأسبوع أقدس أيام السنة ، وأكثرها روحانية، ويطلق عليه "أسبوع الآلام"، أو بشكل أدقّ " أسبوع البصخة المقدس " ، وتبدأ أحداث أسبوع الآلام بالفرح مع دخول السيد المسيح أورشليم واستقبال أهلها له بسعف النخيل ، ويتوسطه الحزن والألم حيث يتم لفّ أعمدة الكنائس بلفافات سوداء، كما يتم فعل الأمر نفسه بالأيقونات وتعلق الستائر السوداء على بعض جدران الكنيسة، وتُلغى الحفلات ولا تقام الزيجات، ويصوم الأقباط هذه الأيام بشكل انقطاعي وتصل ذروته في يوم الجمعة العظيمة حيث يمتد الصوم الانقطاعي حتى السادسة مساءً، كما يصوم بعض الأقباط ولا يتناولون إلا خبزاً وملحاً وماءً فقط ، وهو ما تفسّره الكنيسة بأنها تضع نفسها فى شركة مع آلام المسيح.

تداريب أسبوع الألام

1- اقفلوا التليفزيونات خالص من الأحد للأحد .. لو سى تى فى او مارمرقس او اغابى ماشى ، غير كده لأ... افصل نفسك خالص عن العالم والدوشة والأخبار

2- احضروا بصخات على اد ما تقدروا، الوجود فى الكنيسة لوحده تدريب.. انك تبقى لاصق فى المسيح الأسبوع ده بالذات زى امنا العذراء ويوحنا الحبيب

3- متتكلموش بقدر الامكان.. خليك حريص اد ما تقدر انك متغلطش بلسانك، وحاولوا تشتروا لبس العيد قبل اسبوع الآلام.

4- انصحكم فى كل يوم من ايام البصخة تصلوا من 10 – 20 مزمور كل يوم.. لو قدرتم تصلوا 20مزمور فى اليوم هتخلصوا المزامير كلها

5- اعمل بصخة فى البيت مع نفسك.. اقرا النبوات وصلى ثوك تى تى جوم والمزمور والانجيل والطلبة .. صلى فى مخدعك فى الخفاء، ده جنب الكنيسة طبعاً

6- قلل نشاطك الاجتماعى والوظيفى كمان.. مش وقت مجاملات، ولا زيارات، ومش وقت شغل ان أمكن

7- لاتكف عن كلمة: "يارب يسوع المسيح ارحمنى أنا الخاطى" .. اطلب الرحمة ليك وللناس كلها

8- امنع الرفاهيات خالص.. يعنى تاكل ما يسد الرمق بس وبلاش تحبيش الاكل والطرشى وكل خفيف.. عايزين ننشغل بالصلاة بس

9- زيارة المرضى والفقراء بما لايخلُ من روح الصلاة.. مش تروحوا تحكوا.. انقلوا الكنيسة لبيوت المرضى والمسنين

10- الصوم الانقطاعى مهم حتى لو صدعت شوية.. اللى يقدر يقدر ومن غير ماندين حد.. ارفع درجة الصوم شوية الأسبوع ده

11- لو عندك صورة او صليب خشب، اقعد تحتيه 1/2 ساعة فى اليوم.. واتخيل مشاعر العدرا ويوحنا والمجدلية.. بص ع المسامير وعلى جنبه وعلى اكليل الشوك وعلى الجلدات.. ركز فى الصليب

12- فى وقت القراءات القبطى فى البصخة، خلى معاك كتاب تعد تقرا فيه زى كتب البابا شنودة مثلاً كتاب لك القوة والمجد .. وكتب تانية كتير .. وبالمناسبة الألحان الطويلة دى فرصة جميلة ان كلمات المزمور نتأمل فيها، لو قدرت تركز فيها حلو، ولو مقدرتش كتابك معاك

13- وزع شوية من بيتك على اد ماتقدر .. الحاجات المركونة .. احنا اتفقنا ان السنة دى هتكون سنة العطاء.. كل يوم وزع حاجة على حد .. العطاء هو تعبير حب للمصلوب.. قل له: انت ادتنى عمرك يارب.. مهما اديت هاديك ايه؟ ومتنسوش غير المؤمنين فى العطاء

14- اى حد زعلان منك او انت زعلان منه تصالحه.. اقلها تليفون او زيارة.. ده المسيح جه مشوار من السما للأرض عشان يصالحنا مع ان احنا اللى مزعلينه .. برده حتى لو هم اللى مزعلينك، قلد المسيح وروح صالح الناس وفرحهم

15- فى شباب بيناموا ع الأرض كنوع من النسك او اذلال النفس، وكنوع من المشاركة مع المتألمين .. دى بركة.

16- ركز على اية من النبوات مثلاً وخليها مادة للتأمل اثناء قراءة المزمور قبطى باللحن .. واتكلم مع ربنا فى الاية دى وممكن كمان تكتب تأملاتك تبقى " تأملات أسبوع الألام 2018 "

17- المسنين اللى ميقدروش ييجوا الكنيسة لوحدهم، ليه متعديش عليه وتروح توصله.. تبقى فرحت بربنا وفرحت قلب واحد ظروفه مش سمحة له بكده

18- قدموا بعضكم على بعض .. الناس تيجى الكنيسة تبقى هتتخانق على الكراسى.. ولما يعد على كرسى يبقى وكأنه فرحان ان اخوه مش لاقى كرسى.. اسبوع آلام ايه كده ؟!! قوم وريح اللى حواليك.. واوعى تذق فى التناول.. ان شاالله تبقى اخر واحد

19- النوم يبقى بحساب .. المسيح فى ليلة واحدة من اسبوع الآلام قال 3مرات " اسهروا "..  يعنى لو طول السنة مقصر .. فى الاسبوع ده نشد على نفسنا شوية .. خد كفايتك بس مش بزيادة

20- متضيعوش الجرعة الروحية اللى اخدتوها طول الصوم فى يوم العيد.. تصلى باكر بذمة وتقرا انجيل القيامة من الاناجيل الـ4 قبل ما تنزل تعيد على قرايبك وزمايلك.. لكن ميبقاش العيد يوم جسدى نختمه بالأكل وخلاص